ជំនន់ទឹកភ្លៀងធ្វើឲ្យលិចមណ្ឌលសុខភាពដារ ក្នុងឃុំដារ ស្រុកចិត្របុរី ខេត្តក្រចេះកាលពីយប់ឈានចូលថ្ងៃទី១៧ ខែកញ្ញានេះ។ រូបថតគណៈកម្មាធិការជាតិគ្រប់គ្រងគ្រោះមហន្តរាយ
ក្រចេះ៖ ភូមិចំនួន៥ ក្នុងឃុំដារ ស្រុកចិត្របុរីបានទទួលរងផលប៉ះពាល់ពីជំនន់ទឹកភ្លៀង ដែលធ្វើឱ្យយ៉ាងហោចណាស់ផ្ទះពលរដ្ឋ ២០ខ្នងត្រូវបានទឹកលិចក្រោមផ្ទះនិងទឹកលិចផ្លូវជាង ៨គីឡូម៉ែត្រ ក្រោយពីមានភ្លៀងធ្លាក់កាលពីយប់ឈានចូលថ្ងៃទី១៧ ខែកញ្ញានេះ។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោកសុទ្ធ គឹមកុលមុនី បានឱ្យដឹងថា ភ្លៀងបានចាប់ផ្តើមធ្លាក់ចាប់ពីម៉ោង១ រហូតដល់ម៉ោង ៤ទៀប ដែលបង្កឱ្យមានជំនន់ប៉ះពាល់ភូមិចំនួន ៥ ក្នុងឃុំដារ ស្រុកចិត្របុរី។ ក្នុងនោះរួមមានលិចទីធ្លាវត្តដារ១កន្លែង លិចសាលាបឋមសិក្សាដារ ១កន្លែង និងលិចមណ្ឌលសុខភាពដារ ជម្រៅ ១,៤០ម ហើយស្រ្តីសម្រាលកូនម្នាក់ត្រូវបានក្រុមការងារសម្រួលគាត់ឱ្យស្នាក់នៅជាន់ទី១។
ក្រៅពីនោះក៏មានលិច និងទឹកហូរកាត់ផ្លូវ ១០កន្លែង ប្រវែង៨ ១០០ម និងលិចក្រោមផ្ទះ ចំនួន ២០ខ្នងផ្ទះ។ ប៉ុន្តែមិនបង្កឱ្យប៉ះពាល់ដល់អាយុជីវិតមនុស្សនោះទេ។
អាជ្ញាធរពាក់ព័ន្ធកំពុងតែចុះពិនិត្យស្ថានភាពនិងត្រៀមកម្លាំង សម្ភារ និង មធ្យោបាយចុះអន្តរាគមន៍ជួយដល់ប្រជាពលរដ្ឋក្នុងករណីទឹកនៅបន្តកើនឡើង ហើយនៅបន្តតាមដានស្ថានភាពអាកាសធាតុ និងកម្ពស់ទឹកទន្លេមេគង្គដើម្បីឆ្លើយតបទាន់ពេលវេលា។
ទោះយ៉ាងណា លោក សេក រុន នាយករងរដ្ឋបាលស្រុកបានឱ្យដឹងថា ទឹកបានចាប់ផ្តើមស្រក ហើយក៏មិនមានការជំលៀសពលរដ្ឋចេញពីផ្ទះនោះដែរ។
លោកបញ្ជាក់ថា៖ «វាភ្លៀងមួយយប់ទល់ភ្លឺ ដែលធ្វើឱ្យមាន ២០ខ្នងផ្ទះប៉ះពាល់។ វាជន់ទឹកភ្លៀង តែលូវ វាហូទៅហ្នឹងស្រកវិញអស់មួយចំនួនហើយ»។
ក្រសួងធនធានទឹក និង ឧតុនិយមបានអំពាវនាវឱ្យមានការបង្កើនការយកចិត្តទុកដាក់ប្រុងប្រយ័ត្នខ្ពស់ ដើម្បីជៀសវាងគ្រោះថ្នាក់ផ្សេងៗនៅពេលដែលកម្ពស់ទឹកទន្លេមេគង្គកំពុងតែហក់ឡើង។
ក្រសួងបានជូនដំណឹងថា កន្លងមក ដោយសារមានឥទ្ធិពលពីព្យុះយ៉ាកជី (Yagi) បានធ្វើឱ្យមានភ្លៀងធ្លាក់ច្រើនជាបន្តបន្ទាប់ លើតំបន់ផ្ទៃរងទឹកភ្លៀងរបស់ទន្លេមេគង្គក្នុងប្រទេសថៃ និង ប្រទេសឡាវដែលបង្កឱ្យទឹកទន្លេមេគង្គហក់ ឡើងខ្លាំងរហូតដល់មានការជន់លិចមួយចំនួន។
ក្រៅពីនោះ ព្យុះទី១៣ ឈ្មោះប៊ីប៊ីនកា (Bebinca) និង សម្ពាធទាប បានគ្របដណ្តប់លើឈូងសមុទ្របេងហ្គាល់ (Bay of Bengal) មានឥទ្ធិពលលើខ្យល់មូសុងនិរតី ដែលបក់លើសមុទ្រអានដាម៉ែន (Andaman Sea) និងឈូងសមុទ្រថៃ ខណៈសម្ពាធទាបគ្របដណ្តប់លើភាគកណ្តាលនៃអាងទន្លេមេគង្គ សមុទ្រចិនខាងត្បូងនិងលើកម្ពុជា។
ក្នុងសប្តាហ៍នេះ ទឹកទន្លេមេគង្គផ្នែកខាងលើនៅកម្ពុជាកំពុងតែហក់ឡើងជាបន្តបន្ទាប់ផងដែរ ហើយនឹងហូរចូលតាមព្រែកនិងតំបន់ទំនាបនានាដែលស្ថិតនៅអមសងខាងទន្លេមេគង្គ។
ក្រសួងបានប្រកាសនៅថ្ងៃអង្គារទី១៧ ខែកញ្ញានេះថា៖ «ស្ថានភាពទឹកទន្លេមេគង្គ ទន្លេសាប និងទន្លេបាសាក់ បាននិងកំពុងហក់ឡើងជាបន្តបន្ទាប់។ អាស្រ័យហេតុនេះ សូមក្រសួង-ស្ថាប័ន អាជ្ញាធរដែនដីពាក់ព័ន្ធ និងបងប្អូន ពលរដ្ឋ ដែលរស់នៅតាមដងទន្លេមេគង្គ ទន្លេសាប និង ទន្លេបាសាក់ ជ្រាបជាព័ត៌មាន និងបង្កើនការយកចិត្តទុកដាក់ប្រុងប្រយ័ត្នខ្ពស់ ដើម្បីជៀសវាងគ្រោះថ្នាក់ផ្សេងៗដែលអាចកើតមានឡើងជាយថាហេតុ»៕
