ជំនន់ទឹកភ្លៀងប៉ះពាល់ដល់ដំណាំស្រូវ នៅភូមិកាលមេឃ ឃុំត្បូងក្រពើ ស្រុកសន្ទុក ខេត្តកំពង់ធំ កាលពីខែកក្កដា។ រូបថត មន្ទីរកសិកម្មខេត្តកំពង់ធំ
ភ្នំពេញៈ គ្រោះមហន្តរាយទឹកជំនន់ បានបង្កឱ្យប៉ះពាល់ដល់ពលរដ្ឋកម្ពុជាជាង ១ លាន ៥សែនគ្រួសារក្នុងរយៈពេល ៥ ឆ្នាំចុងក្រោយនេះ ហើយមនុស្ស ៦៩នាក់បានស្លាប់ និង ១២០របួស ដោយសារតែគ្រោះអគ្គិភ័យ ខ្យល់កន្រ្ទាក់ និងរន្ទះបាញ់ក្នុងរយៈពេលជាង ៨ខែ នៃឆ្នាំ២០២៤នេះ។
គ្រោះមហន្តរាយទឹកជំនន់បានបង្កឱ្យប៉ះពាល់ដល់ ១ ៥៧០ ៦១៩គ្រួសារ ផលដំណាំស្រូវចំនួន៨៦២ ៨៩៤ហិកតា ហេដ្ឋារចនាសម្ព័ន្ធសំខាន់ៗផ្លូវជាតិចំនួន១៣៦ ១៦៧ម៉ែត្រ និងសាលារៀនចំនួន ៥៩៦ខ្នង។
ក្រៅពីនោះ វាបង្កឱ្យមានការបាត់បង់ អាយុជីវិតមនុស្ស សត្វពាហនៈ ខូចខាតផ្ទះសម្បែង និងទ្រព្យសម្បត្តិជាច្រើន ជាពិសេសបានធ្វើឱ្យប៉ះពាល់ដល់ការប្រកបមុខរបរចិញ្ចឹមជីវិតក៏ដូចជា ប្រាក់ចំណូលផងដែរនៅក្នុងរយៈពេល៥ឆ្នាំចុងក្រោយនេះ។ នេះបើយោងតាម គណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម)។
ដោយឡែកក្នុងឆ្នាំ២០២៤នេះ ជំនន់ទឹកភ្លៀងក៏បានបង្កឱ្យមានផលប៉ះពាល់ និងជនរងគ្រោះជាង២ម៉ឺនគ្រួសារ ក្នុងនោះបានស្លាប់ចំនួន២នាក់ គិតត្រឹមថ្ងៃទី២០ ខែសីហាកន្លងមក។ ក្រៅពីនោះ ដំណាំស្រូវចំនួន ២៥ ៥៦៣ហិកតាបានប៉ះពាល់ ដែលក្នុងនោះមាន ១០ ៥៣៨ហិកតាបានខូចខាត។ ដំណាំរួមផ្សំ ១ ៨៩៦ហិកតាក្នុងចំណោម ៣ ៤៤៤ហិកតាដែលប៉ះពាល់ក៏ត្រូវបំផ្លាញផងដែរ។ បន្ថែមពីនោះ ផ្លូវកៅស៊ូ បេតុង និងផ្លូវជនបទជាង១៦៥គីឡូម៉ែត្រក៏ត្រូវទទួលរងផលប៉ះពាល់ផងដែរ។
អនុប្រធានទី១ នៃគ.ជ.គ.ម លោកទេសរដ្ឋមន្ត្រីគន់ គីមបានលើកឡើងក្នុងពេលប្រកាសដាក់ឱ្យប្រើប្រាស់ផែនការសកម្មភាពជាតិសម្រាប់កាត់បន្ថយហានិភ័យគ្រោះមហន្តរាយ ២០២៤-២០២៨នាដើមសប្តាហ៍នេះថា ប្រទេសក្នុងតំបន់ និងពិភពលោកកំពុងតែឆ្លងកាត់នូវបញ្ហាប្រឈមនឹងហានិភ័យជាច្រើន បង្កដោយធម្មជាតិ និងមនុស្ស ដែលជាបុព្វហេតុនៃគ្រោះមហន្តរាយ។
ដោយឡែក ប្រទេសកម្ពុជា មានមុខសញ្ញាគ្រោះថ្នាក់ជាច្រើនដែលកំពុងជួបប្រទះ ជារៀងរាល់ឆ្នាំ ដូចជា៖ ជំនន់ទឹកភ្លៀង រាំងស្ងួត ខ្យល់កន្រ្តាក់ រន្ទះបាញ់ បាក់ច្រាំងទន្លេ អគ្គីភ័យ និងជំងឺរាតត្បាត។ល។
លោកបានបញ្ជាក់ថា៖«ឥទ្ធិពល នៃការប្រែប្រួលអាកាសធាតុ ក៏ជាកត្តាជំរុញឱ្យគ្រោះមហន្តរាយទាំងនោះកាន់តែកើនឡើងនូវភាពញឹកញាប់ និងផលប៉ះពាល់ថែមមួយកម្រិតទៀត ដែលត្រូវយកចិត្តទុកដាក់...ហើយយើងក៏នៅតែចាត់ទុកថា ការគ្រប់គ្រងគ្រោះមហន្តរាយ គឺជាផ្នែកមួយនៃការកាត់បន្ថយភាពក្រីក្រ និងជួយដល់ការអភិវឌ្ឍប្រកបដោយចីរភាព»។
លោកទេសរដ្ឋមន្ត្រីបានបន្ថែមថា រាជរដ្ឋាភិបាល បានធ្វើអន្តរាគមន៍ឆ្លើយតបភ្លាមៗ និងផ្តល់ជាស្រូវពូជ និងស្បៀងដល់ពលរដ្ឋទាំងនោះផងដែរ។
ក្នុងរយៈពេលជាង៨ខែដើមឆ្នាំនេះដែរ គ្រោះអគ្គិសភ័យបានកើតឡើងជាង៦០០ដង ដែលបង្កការខូចខាតដល់ផ្ទះចំនួន៦២៤ខ្នង តូប១២០ សម្លាប់មនុស្ស ១៥នាក់ និងរបួស៤៥នាក់។ ក្នុងនោះរាជធានីភ្នំពេញមានច្រើនជាងគេ គឺ១០២លើក ខេត្តបាត់ដំបង៦៤លើក និងខេត្តសៀមរាបចំនួន៤១ផងដែរ។ នេះបើយោងតាមរបាយការណ៍របស់ គ.ជ.គ.ម ដដែលនេះ។
ក្នុងរយៈពេលដូចគ្នានេះ ដែរខ្យល់កន្រ្ទាក់ក៏បានកើតឡើងចំនួន២៤១លើក ដែលបានធ្វើឱ្យរលំផ្ទះចំនួន៤៨២ខ្នង របើកចំនួន៣ ៨០០ខ្នង សម្លាប់មនុស្ស៤នាក់ និងរបួស៣២នាក់ផងដែរ។
ដោយឡែកបាតុភូតរន្ទះបាញ់វិញ បានកើតមានចំនួន៩៤លើក ដែលបានសម្លាប់មនុស្សអស់៥០នាក់ និងរបួស៤៣ផ្សេងទៀតផងដែរ។ ក្នុងនោះ ខេត្តសៀមរាបកើតមានច្រើនជាងគេ គឺចំនួន១៤ដង ដែលសម្លាប់មនុស្សចំនួន៨នាក់ ដែលជាចំនួនច្រើនជាងខេត្តផ្សេងៗទៀត។
លោក លី វណ្ណៈ នាយករដ្ឋបាលខេត្តសៀមរាបបានប្រាប់ភ្នំពេញប៉ុស្តិ៍នៅថ្ងៃពុធទី៤ ខែកញ្ញានេះថា ទីតាំងភូមិសាស្រ្តខេត្តសៀមរាប ដែលជាផ្នែកមួយ នៃផ្ទៃបឹងទន្លេសាបក៏ជាកត្តាមួយ ដែលអាចមានបាតុភូតរន្ទះបាញ់នេះកើតឡើងច្រើនដែរ។ ទោះយ៉ាងណា អាជ្ញាធរតែងតែធ្វើការអប់រំ និងផ្សព្វផ្សាយពីបញ្ហានេះជូនដល់ពលរដ្ឋផងដែរ។
លោកថ្លែងថា៖«ក្នុងតំបន់ជុំវិញបឹងទន្លេសាបហ្នឹងមានបញ្ហារន្ទះបាញ់ច្រើន។ បញ្ហាគ្រោះធម្មជាតិពិបាកទប់ស្កាត់កុំឱ្យមាន តែយើងព្យាយាមអប់រំ និងរកវិធានបែបណាដើម្បីកាត់បន្ថយកុំឱ្យបាត់បង់អាយុជីវិតពលរដ្ឋច្រើន។ យើងបានផ្សព្វផ្សាយជូនពួកគាត់ហើយពាក់ព័ន្ធគ្រោះមហន្តរាយ គ្រោះថ្នាក់រន្ទះបាញ់អីហ្នឹង»៕
