ឯកអគ្គរដ្ឋទូតចិន លោក Wang Wenbin (ឆ្វេង) និងរដ្ឋមន្ត្រីការបរទេស លោក សុខ ចិន្តាសោភា ចាប់ដៃគ្នាក្នុងជំនួបកាលពីខែមុននៅភ្នំពេញ។ ក្រសួងការបរទេស
ភ្នំពេញៈ លោកឧបនាយករដ្ឋមន្ត្រី សុខ ចិន្តាសោភា រដ្ឋមន្ត្រីការបរទេស និងសហប្រតិបត្តិការ អន្តរជាតិ និងលោក វ៉ាង វិនពីន (Wang Wenbin) ឯកអគ្គរដ្ឋទូតចិនប្រចាំកម្ពុជានឹងចុះហត្ថលេខាលើកិច្ចព្រមព្រៀងស្ដីពីមូលនិធិពិសេសសម្រាប់គម្រោងកិច្ចសហប្រតិបត្តិការមេគង្គ-ឡានឆាង (MLC) ឆ្នាំ២០២៤ ដែលមានទឹកប្រាក់ប្រមាណ២លានដុល្លារអាមេរិក នៅថ្ងៃទី៥ ខែកញ្ញា នៅទីស្ដីការក្រសួង។
សេចក្ដីប្រកាសព័ត៌មានក្រសួងការបរទេសកម្ពុជាបញ្ជាក់នាថ្ងៃទី៣ កញ្ញា ថា៖ «ក្នុងក្របខ័ណ្ឌមូលនិធិពិសេសនេះ កម្ពុជានឹងទទួលបានហិរញ្ញប្បទាន ដែលមានទឹកប្រាក់ប្រមាណ២លានដុល្លារអាមេរិកសម្រាប់គម្រោងចំនួន៨»។
គម្រោងទាំងនេះនឹងគ្របដណ្ដប់លើផ្នែកទេសចរណ៍, សកម្មភាពដោះមីន, កសិកម្ម, អភិវឌ្ឍន៍ជនបទ, ការលើកកម្ពស់ការយល់ដឹងពីMLC, ការជំរុញសេដ្ឋកិច្ចក្នុងតំបន់, ការអប់រំបណ្ដុះបណ្ដាលបច្ចេកទេស និង វិជ្ជាជីវៈ (TVET), និងការកសាងសមត្ថភាព និងការគ្រប់គ្រងហានិភ័យទឹកជំនន់។
សេចក្តីប្រកាសព័ត៌មានបន្តថា ក្នុងរយៈពេល៧ឆ្នាំកន្លងមកនេះ មូលនិធិពិសេសនេះបានផ្តល់ហិរញ្ញប្បទានដល់គម្រោងប្រមាណ៩០នៅកម្ពុជា ដែលបង្ហាញពីការប្ដេជ្ញាចិត្តរបស់កម្ពុជា និងចិន ក្នុងការរួមចំណែកដល់ការកសាងសហគមន៍វាសនារួមនៃសន្តិភាព វិបុលភាព និង ការអភិវឌ្ឍប្រកបដោយចីរភាពសម្រាប់បណ្ដាប្រទេសMLCទាំងអស់។
លោក ឯក ប៊ុនលី អ្នកស្រាវជ្រាវនៃមជ្ឈមណ្ឌលខ្មែរសិក្សាកិច្ចការតំបន់ (CCRS) ថ្លែងថា សកម្មភាពនេះបានបង្ហាញពីការប្តេជ្ញាចិត្តរបស់ចិនក្នុងការដាក់ខ្លួនជាតួអង្គដែលមានទំនួលខុសត្រូវក្នុងការអភិវឌ្ឍទន្លេមេគង្គ ដែលជាចំណាត់ការកំពុងទទួលបានភាពវិជ្ជមានពីប្រទេសនៅតំបន់មេគង្គ រួមទាំងប្រទេសកម្ពុជាផងដែរ។ ជំនួយហិរញ្ញវត្ថុដែលផ្តល់តាមរយៈមូលនិធិពិសេសនេះនឹងពិតជារួមចំណែកក្នុងការជំរុញវិស័យសំខាន់ៗដូចជា ទេសចរណ៍ កសិកម្ម និងការអភិវឌ្ឍជនបទនៅកម្ពុជា។
លោកបន្តថា ការវិនិយោគរបស់ចិននៅក្នុងតំបន់មេគង្គមិនត្រឹមតែពង្រឹងកេរ្តិ៍ឈ្មោះរបស់ប្រទេសចិនតែប៉ុណ្ណោះទេ ថែមទាំងពង្រឹងអំណាចទន់របស់ខ្លួននៅក្នុងអាស៊ានផងដែរ។ តាមរយៈការជំរុញទស្សនវិជ្ជមាននៅក្នុងទន្លេមេគង្គ ប្រទេសចិនបានពង្រឹងរូបភាពរបស់ខ្លួននៅទូទាំងអាស៊ីអាគ្នេយ៍ ដែលអាចផ្តល់ប្រយោជន៍នៅពេលដោះស្រាយបញ្ហាដែលមានជម្លោះកាន់តែច្រើន ដូចជាជម្លោះសមុទ្រចិនខាងត្បូងជាដើម។
លោក ប៊ុនលី ប្រាប់ភ្នំពេញប៉ុស្តិ៍នាថ្ងៃទី៤ កញ្ញា ថា៖ «ដូច្នេះ ការដាំដុះសុច្ឆន្ទៈក្នុងតំបន់មេគង្គ អាចជំរុញដោយប្រយោលនូវជំហរការទូតរបស់ចិននៅក្នុងអាស៊ាន ដោយផ្តល់នូវឥទ្ធិពល និងសក្ដានុពលក្នុងតំបន់ឱ្យកាន់តែទូលំទូលាយ។ មូលនិធិពិសេសនេះ នឹងពង្រឹងឥទ្ធិពលរបស់ចិនបន្ថែមទៀតនៅក្នុងអាងទន្លេមេគង្គ។ ប្រសិនបើទីក្រុងប៉េកាំងបន្តរក្សានិរន្តរភាព និងទាញយកប្រយោជន៍ពីសន្ទុះនេះ ការយល់ឃើញនៅក្នុងតំបន់អាស៊ីអាគ្នេយ៍អាចទំនងនឹងលំអៀងទៅរកប្រទេសចិនកាន់តែខ្លាំងលើមហាអំណាចពិភពលោកផ្សេងទៀតដែលនៅក្នុងតំបន់តែមួយ»។
អ្នកវិភាគរូបនេះពន្យល់ថា ទោះជាយ៉ាងណាក៏ដោយ ភាពផ្ទុយគ្នាកើតឡើងនៅក្នុងយុទ្ធសាស្ត្រក្នុងតំបន់របស់ចិន។ ខណៈពេលដែលនៅក្នុងទន្លេមេគង្គ ប្រទេសចិនបានបង្ហាញនូវរូបភាពដែលផ្តោតលើកិច្ចសហប្រតិបត្តិការ និងការអភិវឌ្ឍ ដោយបានចូលរួមយ៉ាងសកម្មក្នុងការសន្ទនា និងផ្តល់ការគាំទ្រផ្នែកអភិវឌ្ឍន៍យ៉ាងច្រើន។ ឥរិយាបថរបស់ប្រទេសចិននៅសមុទ្រចិនខាងត្បូងគឺមានរូបភាពខុសគ្នាស្រលះ។
លោក ប៊ុនលី បន្ថែមថា តាមទស្សនៈរបស់ប្រទេសដូចជាហ្វីលីពីន និងវៀតណាម សកម្មភាពរបស់ចិនក្នុងតំបន់ដែនសមុទ្រនោះហាក់មានការប្រឈមមុខដាក់គ្នាជាខ្លាំង។ ទោះបីជាវិធីសាស្ត្រពីរនេះអាចបម្រើផលប្រយោជន៍របស់ប្រទេសចិនក្នុងរយៈពេលខ្លីក៏ដោយ ប៉ុន្តែភាពជោគជ័យរយៈពេលវែងគឺពឹងផ្អែកលើការធានាថារដ្ឋសមាជិកអាស៊ានមានការយល់ឃើញល្អរួមគ្នាចំពោះចិនមិនត្រឹមតែនៅក្នុងទន្លេមេគង្គប៉ុណ្ណោះទេ ប៉ុន្តែនៅទូទាំងទិដ្ឋភាពភូមិសាស្ត្រនយោបាយដ៏ទូលំទូលាយ។
លោកថ្លែងថា៖ «ការសម្រេចបាននូវភាពស៊ីចង្វាក់គ្នាបែបនេះ គឺជារឿងសំខាន់សម្រាប់ចិន ដែលជាប្រយោជន៍នៅក្នុងតំបន់អាស៊ីអាគ្នេយ៍ក្នុងរយៈពេលវែង»។
ក្រសួងបញ្ជាក់ក្នុងសេចក្ដីប្រកាសព័ត៌មានកាលពីថ្ងៃទី៨ សីហា ថា ក្នុងជំនួបជាមួយលោក វ៉ាង វិនពីន នៅថ្ងៃដដែលនេះ លោក សុខ ចិន្តាសោភា បានបញ្ជាក់ពីការត្រៀមសហការជិតស្និទ្ធរបស់ក្រសួងជាមួយលោកឯកអគ្គរដ្ឋទូត និងស្ថានទូតចិនដើម្បីរួមចំណែកលើកកម្ពស់ទំនាក់ទំនងទ្វេភាគីកម្ពុជា-ចិនបន្ថែមទៀត។
ក្រសួងបញ្ជាក់ថា៖ [ភាគីទាំងពីរ] បានវាយតម្លៃខ្ពស់ចំពោះការរីកចម្រើនឥតឈប់ឈរនៃទំនាក់ទំនងទ្វេភាគី និងកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយរវាងកម្ពុជា និងចិន ដែលគ្របដណ្ដប់ស្ទើរគ្រប់វិស័យ»។
ភាគីទាំងពីរក៏បានពិភាក្សាអំពីការបន្តពង្រឹងមិត្តភាពដែកថែប និងការធ្វើឱ្យកាន់តែស៊ីជម្រៅនូវកិច្ចសហប្រតិបត្តិការត្បូងពេជ្រ ដើម្បីរួមចំណែកកសាងសហគមន៍វាសនារួមកម្ពុជា-ចិន ប្រកបដោយគុណភាពខ្ពស់កម្រិតខ្ពស់ និងស្តង់ដារខ្ពស់៕
