
មន្ដ្រីអាជ្ញាធរជាតិអប្សរាលាងរបួសឱ្យភ្ញៀវទេសចរដែលត្រូវបានសត្វស្វាវាយប្រហារ។ រូបថត ANA
សៀមរាប៖ អាជ្ញាធរជាតិអប្សរា បានចេញសេចក្ដីប្រកាសព័ត៌មាននៅថ្ងៃទី៤ ខែកុម្ភៈនេះ ដោយអំពាវនាវជាសាធារណៈ ស្នើសាធារណជនទាំងអស់ នៅឱ្យឆ្ងាយពីសត្វស្វា បញ្ឈប់ការផ្តល់ចំណី ចៀសវាងប៉ះពាល់ ឬលេងជាមួយសត្វស្វាជាដើម។
នៅក្នុងសេចក្ដីប្រកាសបានបង្ហាញថា៖ «ក្នុងរយៈ កាលថ្មីៗនេះ ចំនួនសត្វស្វានៅក្នុងតំបន់រមណីយដ្ឋានអង្គរ មានការកើនឡើងគួរឱ្យកត់សម្គាល់»។
សេចក្ដីប្រកាសបានបន្ដថា៖ «បច្ចុប្បន្ន តាមរយៈការផ្តល់ចំណីជាប្រចាំរបស់ក្រុមបុគ្គលមួយចំនួនតូច ក្នុងគោលបំណងផលិតមាតិកាជាប្រយោជន៍ផ្ទាល់ខ្លួន បានផ្លាស់ប្តូរនូវទម្លាប់រស់នៅបែបធម្មជាតិរបស់សត្វស្វា ពីសត្វព្រៃ ទៅជាសត្វស្រុក ដែលមានចរឹតកាច ចេះដណ្ដើមចំណី និងឈានរហូតដល់ការបង្កជារបួសស្នាមទៅលើមនុស្សជាដើម»។

ហ្វូងស្វា មានចំនួនកាន់តែច្រើនឡើង ដោយនាំគ្នាមកចំណីពីភ្ញៀវទេសចរ។ រូបថត ANA
អាជ្ញាធរជាតិអប្សរា ធ្វើការជាមួយស្ថាប័នជំនាញនានារបស់ក្រសួងកសិកម្ម រុក្ខាប្រមាញ់ និងនេសាទ ដូចជា រដ្ឋបាលព្រៃឈើ និងមន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាបដើម្បីស្វែងរកដំណោះស្រាយក្នុងពេលឆាប់ៗខាងមុខ។
អាជ្ញាធរជាតិអប្សរា បានទទូចដល់សាធារណជន ភ្ញៀវទេសចរជាតិ-អន្តរជាតិ មគ្គុទ្ទេសក៍ទេសចរណ៍ និងប្រតិបត្តិករវិស័យទេសចរណ៍ក្នុងខេត្តសៀមរាបទាំងអស់ ផ្សព្វផ្សាយនូវខ្លឹមសារនេះ ក៏ដូចជាណែនាំ និងបញ្ឈប់នូវសកម្មភាពណាមួយដែលអាចនាំមកនូវបញ្ហាបង្កឡើងដោយសត្វស្វាជាយថាហេតុ។

ក្រុមអ្នកបង្កើតមាតិកាវីដេអូផ្ដិតយកសកម្មភាពហ្វូងស្វាក្នុងបរិវេណប្រាសាទអង្គរធំ។ រូបថត ANA
លោក ឡុង កុសល អ្នកនាំពាក្យអាជ្ញាធរជាតិអប្សរា បានថ្លែងថា មហាជនរួមទាំងភ្ញៀវទេសចររមែងរងនូវការវាយប្រហារពីសំណាក់ពពួកសត្វស្វា។
លោកបានប្រាប់ភ្នំពេញប៉ុស្ដិ៍ថា៖ «វាមិនមានតួលេខជាក់លាក់នោះទេ ដោយអ្នកខ្លះត្រូវស្វាធ្វើឱ្យរបួសរលាត់ស្បែក និងដណ្ដើមចំណីជាដើម»។
លោកបានបន្ថែមថា អ្នកជំនាញកំពុងតែរិះរកវិធីល្អក្នុងការដោះស្រាយបញ្ហានេះ ដើម្បីបញ្ចៀសពីផលប៉ះពាល់ដល់ភ្ញៀវផង និងមិនរងការរិះគន់ចំពោះការជញ្ជូនសត្វទៅកន្លែងផ្សេងផង៕