ជំនួបរវាងលោក សុខ សូកេន រដ្ឋមន្ត្រីក្រសួងអធិការកិច្ច និងលោក Zaheeruddin Babar Thaheem ឯកអគ្គរដ្ឋទូត សាធារណរដ្ឋអ៊ីស្លាមប៉ាគីស្ថាន ប្រចាំព្រះរាជាណាចក្រកម្ពុជា កាលពីថ្ងៃទី២៨ ខែមេសា។ រូបថត ក្រសួងអធិការកិច្ច
ភ្នំពេញ៖ ក្រសួងអធិការកិច្ចនឹងដាក់ឱ្យប្រើប្រាស់យុទ្ធសាស្ដ្រស្នូលរបស់ខ្លួនទាំង ៨ ចំណុច ដោយផ្ដោតលើ «ព៤ ជ៤» នៅក្នុងសន្និតប្រចាំឆ្នាំនៅសប្ដាហ៍ក្រោយនេះ។
នេះយោងតាមសេចក្តីប្រកាសព័ត៌មាន ស្តីពីលទ្ធផលនៃជំនួបរវាងលោក សុខ សូកេន រដ្ឋមន្ត្រីក្រសួងអធិការកិច្ច និងលោក Zaheeruddin Babar Thaheem ឯកអគ្គរដ្ឋទូត សាធារណរដ្ឋអ៊ីស្លាមប៉ាគីស្ថាន ប្រចាំព្រះរាជាណាចក្រកម្ពុជា។
សេចក្ដីប្រកាសបានឱ្យដឹងថា៖ «ឯកឧត្តមរដ្ឋមន្ត្រី បានជម្រាបជូនអំពីយុទ្ធសាស្ត្រ «ព៤ ជ៤» របស់ក្រសួងអធិការកិច្ច ដែលគ្រោងនឹងដាក់ឱ្យប្រើប្រាស់ជាផ្លូវការក្នុងសន្និបាតបូកសរុបលទ្ធផល ការងារឆ្នាំ២០២៤ និងលើកទិសដៅការងារឆ្នាំ២០២៥ នៅថ្ងៃទី៨-៩ ខែឧសភា ឆ្នាំ២០២៥ ខាងមុខនេះ»។
យុទ្ធសាស្ត្រ «ព៤៨៤» រួមមាន ពង្រឹងការងារអធិការកិច្ច ពង្រឹងការងារដោះស្រាយបណ្ដឹង ពង្រឹងការងារតាមដានការអនុវត្តច្បាប់ ពង្រឹងការងារអប់រំផ្សព្វផ្សាយច្បាប់ និងវេទិកាសាធារណៈ ជំរុញការរៀបចំលិខិតបទដ្ឋានគតិយុត្ត ជំរុញនិងបង្កើនសមត្ថភាពស្ថាប័ន ជំរុញកិច្ចសហប្រតិបត្តិការ និងភាពជាដៃគូ និងជំរុញការប្រើប្រាស់បច្ចេកវិទ្យាឌីជីថល។
ជំនួបរវាងរដ្ឋមន្ដ្រីក្រសួងអធិការកិច្ចកម្ពុជា និងឯកអគ្គរដ្ឋទូត សាធារណរដ្ឋអ៊ីស្លាមប៉ាគីស្ថាន ប្រចាំព្រះរាជាណាចក្រកម្ពុជា ត្រូវបានធ្វើឡើងដើម្បីជំរុញកិច្ចសហប្រតិបត្តិការទ្វេភាគីក្នុងវិស័យអធិការកិច្ចរវាងកម្ពុជា និងប៉ាគីស្ថាន។
លោក Babar Thaheem បានគាំទ្រចំពោះយុទ្ធសាស្ត្រនេះ ហើយលោកមានបំណងសម្របសម្រួលឱ្យមានការផ្លាស់ប្តូរទស្សនកិច្ច និងបទពិសោធល្អៗរវាងក្រសួងអធិការកិច្ចកម្ពុជា និងស្ថាប័នសហព័ន្ធទទួលពាក្យបណ្តឹងរបស់ប៉ាគីស្ថាន។
ស្ថានទូតប៉ាគីស្ថានប្រចាំកម្ពុជាបានបង្ហោះលើ Facebook ថា៖ «យើងបានពង្រឹង និងពង្រីកកិច្ចសហប្រតិបត្តិការទ្វេភាគីរវាងប៉ាគីស្ថាន និងកម្ពុជា»៕
.jpg)
