កម្លាំងប៉ូលិសសមក្បួនព្យុហយាត្រាដើម្បីត្រៀមរំឭកខួប៨០ឆ្នាំនៃកំណើតនគរបាលជាតិ កាលពីថ្ងៃទី៩ ខែឧសភា។ នគរបាលជាតិ។
ប្រមុខដឹកនាំកម្ពុជាលើកឡើងពីបញ្ហាប្រឈមផ្នែកសន្តិសុខនៅឆ្នាំ២០២៥នេះ ដោយចាត់ទុកសកម្មភាពឆបោកតាមប្រព័ន្ធអ៊ីនធើណេត ជាក្ដីបារម្ភធំមួយក្នុងចំណោមបញ្ហាផ្សេងទៀត ដែលនគរបាលត្រូវយកចិត្តទុកដាក់ខ្ពស់។
ក្ដីបារម្ភនានាត្រូវបានលើកឡើងដោយលោកនាយករដ្ឋមន្ត្រី ហ៊ុន ម៉ាណែត និងលោកឧបនាយករដ្ឋមន្ត្រី លោក ស សុខា រដ្ឋមន្ត្រីក្រសួងមហាផ្ទៃ ក្នុងលិខិតដាច់ដោយឡែកពីគ្នាសម្រាប់កងកម្លាំងនគរបាលជាតិក្នុងទិវារំឭកខួប ៨០ឆ្នាំនៃថ្ងៃកំណើតនគរបាលជាតិ ១៦ ឧសភា។
លោក ហ៊ុន ម៉ាណែត ក្រៅពីបានលើកឡើងពីស្នាដៃជាច្រើន និងកោតសរសើរដល់នគរបាលជាតិសម្រាប់ការរក្សាសន្តិសុខនៅកម្ពុជា ក៏បានលើកឡើងពីសភាពការណ៍ពិភពលោក ដែលលោកថាអាចនឹងបន្តវិវត្តន៍ប្រែប្រួលស្មុគស្មាញ ពិបាកប៉ាន់ស្មាន និងអាចលេចឡើងនូវបញ្ហាប្រឈមមួយចំនួន ជះឥទ្ធិពលប៉ះពាល់ដល់ស្ថិរភាពនយោបាយ សន្តិសុខ សណ្តាប់ធ្នាប់សាធារណៈ និងសុវត្ថិភាពសង្គមនៅកម្ពុជា។
លោកថ្លែងថា សភាពការណ៍ផ្ទៃក្នុងប្រទេស ថ្វីដ្បិតតែកំពុងបន្តរីករាយទទួលផលពីសុខសន្តិភាព ក៏ប៉ុន្តែក្នុងបរិបទដែលមានការគំរាមកំហែងនៃប្រភេទបទល្មើសថ្មី បទល្មើសមិនប្រពៃណី បទល្មើសបច្ចេកវិទ្យា បទល្មើសមានការចាត់តាំងជាដើម។
លោកថា បញ្ហាទាំងនេះ បានធ្វើឱ្យសំណូមពរក្នុងការធានាស្ថិរភាពសន្តិសុខ និងសុវត្ថិភាពសង្គម ដែលជាបរិស្ថានគ្របដណ្តប់នៃយុទ្ធសាស្ត្រ បញ្ចកោណដំណាក់កាលទី១ គឺជាតម្រូវការចាំបាច់មិនអាចខ្វះបាន ដែលថ្នាក់ដឹកនាំ និងមន្ត្រីនគរបាលគ្រប់លំដាប់ថ្នាក់ត្រូវបន្តខិតខំប្រឹងប្រែងឱ្យបានក្លៀវក្លា ប្រកបដោយមនសិការជាតិ ការពលិកម្ម និងការលះបង់ គ្រប់បែបយ៉ាង ដើម្បីឆ្លើយតបប្រកបដោយប្រសិទ្ធភាពរាល់បញ្ហាប្រឈម។
លោកថ្លែងថា៖ «ខ្ញុំមានក្តីសង្ឃឹម និងជឿជាក់យ៉ាងមុតមាំចំពោះមនសិការស្នេហាជាតិ ស្នេហាមាតុភូមិ និងភក្តីភាព របស់កងកម្លាំងនគរបាលជាតិ និងសូមសម្តែងនូវការពេញចិត្ត បន្តជួយឧបត្ថម្ភ គាំទ្រទាំងស្មារតី និងសម្ភារៈ ដល់កងកម្លាំងនគរបាលជាតិ ឱ្យបានស័ក្តិសមជាកម្លាំងអនុវត្តច្បាប់ប្រកបដោយគុណភាព ប្រសិទ្ធភាព និង កិត្យានុភាព»។
ស្រដៀងគ្នានេះ លោក ស សុខា បានលើកឡើងនៅក្នុងលិខិតរបស់លោកថា ឆ្នាំ២០២៥ ក៏ដូចជាបណ្តាឆ្នាំខាងមុខដែរ សភាពការណ៍សកលលោកនៅតែបន្តស្ថិតក្នុងស្ថានភាព ស្មុគស្មាញ ប្រែប្រួលមិនអាចប៉ាន់ស្មានបាន អាស្រ័យដោយកត្តាសកម្មភាពប្រកួតប្រជែងភូមិសាស្ត្រនយោបាយ និងឧត្តមភាពយោធារបស់មហាអំណាច ការធ្វើសង្គ្រាម ជម្លោះជនជាតិ សាសនានៅតាមតំបន់ជាច្រើន។
លោកបន្តថា ទន្ទឹមនេះក៏មានការកើនឡើងនូវសកម្មភាពឧក្រិដ្ឋកម្មឆ្លងដែនគ្រប់ប្រភេទ ជាពិសេសបទល្មើសបច្ចេកវិទ្យា ពិតជាបង្ក ផលប៉ះពាល់ ទោះតិច ឬច្រើនដល់កម្ពុជា។
ទោះបីជាលោកជឿជាក់ថា កម្ពុជានឹងឈានដល់ការសម្រេចបាននូវឋានៈជាប្រទេសមានចំណូលមធ្យមកម្រិតខ្ពស់នាឆ្នាំ២០៣០ ក៏ដោយក៏នៅមានបញ្ហាសេសសល់ និងបញ្ហាប្រឈម មួយចំនួនដែលអាចជះឥទ្ធិពលអវិជ្ជមានដល់ខឿនសន្តិសុខជាតិ សន្តិសុខសណ្តាប់ធ្នាប់សាធារណៈ និង សុវត្ថិភាពសង្គម។
លោក ស សុខា ថាបញ្ហាទាំងនោះរួមមាន ឧបាយកលពិសពុលរបស់មជ្ឈដ្ឋានប្រឆាំង ដែលនៅតែចិញ្ចឹមមហិច្ឆតាផ្តួលរំលំ រាជរដ្ឋាភិបាលតាមរបៀបបដិវត្តពណ៌ សកម្មភាពបទល្មើសលួច ឆក់ ប្លន់ ការចរាចរ ជួញដូរគ្រឿងញៀន ខុសច្បាប់ ការជួញដូរមនុស្ស ពិសេសការលេចឡើងនូវសកម្មភាពឆបោកតាមប្រព័ន្ធអ៊ីនធើណេតជាដើម ដែលបញ្ហាទាំងនេះទាក់ទងសំខាន់ចំពោះតួនាទីភារកិច្ចរបស់កងកម្លាំងនគរបាលជាតិ។
លោកបញ្ជាក់ដូច្នេះថា៖ «ដូចនេះ កងកម្លាំង នគរបាលជាតិគ្រប់ជាន់ថ្នាក់ ត្រូវមានស្មារតីប្រុងប្រយ័ត្នខ្ពស់ជាប់ជានិច្ចក្នុងការបំពេញភារកិច្ច ប្រកបដោយ មនសិការ វិជ្ជាជីវៈ ដើម្បីរួមគ្នាការពារសន្តិភាព ឯករាជ្យ អធិបតេយ្យជាតិ បូរណភាពទឹកដី ធានាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ការពារសមិទ្ធផលជាតិ លើកស្ទួយកិត្តិយស និងកិត្យានុភាពជាតិ ព្រមទាំងបម្រើប្រជាពលរដ្ឋដោយភក្ដីភាព៕
.jpg)
