កំពង់ស្ពឺៈ ថ្នាលបណ្តុះកូនឈើថ្នាក់តំបន់ស្ថិតក្នុងខេត្កំពង់ស្ពឺដែលធំជាងគេនៅកម្ពុជា នឹងបញ្ចប់​ការ​សាង​សង់​​​នាចុងខែឧសភានេះ ដែលធ្វើឱ្យក្រសួងបរិស្ថាន​មានលទ្ធភាពអាចផលិត​កូនឈើបាន​រហូត​ដល់​ទៅ​១០លានដើមក្នុង១ឆ្នាំ ពីថ្នាលថ្នាក់តំបន់ទាំង៥។

នេះជាការថ្លែងរបស់រដ្ឋមន្រ្តីក្រសួងបរិស្ថានលោកអ៊ាងសុផល្លែតក្នុងពិធីសម្ពោធបើកការដ្ឋានសាងសង់ផ្លូវចូលទៅតំបន់ភ្នំខ្នងផ្សារ និងហេដ្ឋារចនាសម្ព័ន្ធបម្រើឱ្យគោលដៅលំហែ​បៃតងតំបន់ភ្នំខ្នង​ផ្សារក្នុងឃុំ​តាសាល​ស្រុកឱរ៉ាល់ខេត្តកំពង់ស្ពឺ កាលពីចុងសប្តាហ៍មុន។

លោករដ្ឋមន្រ្តីមានប្រសាសន៍ថា៖«ថ្នាលបណ្តុះកូនឈើដែលធំជាងគេនៅស្រុកខ្មែរ គឺនៅកំពង់ស្ពឺតែម្តង។ ថ្នាលបណ្តុះកូនឈើនៅកំពង់ស្ពឺចុងខែនេះ​សង់ហើយហើយ ដែលអាចផលិត​កូនឈើបាន​ជាង​១លាន​ដើម​ក្នុង១ឆ្នាំ។​ អ៊ីចឹងនឹងចែកចាយនៅតំបន់យើងហ្នឹង គឺកំពត កំពង់ស្ពឺ ក្រុងព្រះសីហនុ ខេត្តកណ្តាល»។

លោកថ្លែងបន្តដូច្នេះថ៖«ឆ្នាំក្រោយ យើងនឹងពង្រីកឱ្យបាន២លានដើម។ មិនត្រឹមតែកូនឈើទេ យើង​មាន​ផ្ទៃដី សម្រាប់ដាំដើមឈើរក្សាទុក៥ឆ្នាំ។ គាស់ អាដើមធំៗយកទៅដាំតាមខេត្ត តាមក្រុងតែម្តង ជូន​អត់​គិត​លុយទៀត។ អ៊ីចឹងកំពង់ស្ពឺត្រូវប៉ាន់ជាងគេ»។

ក្រសួងបរិស្ថានកំពុងតែសាងសង់ស្ថានីយ៍បណ្តុះកូនឈើថ្នាក់តំបន់ចំនួន៥ស្ថានីយ៍។ ក្នុងនោះថ្នាល​បណ្តុះ​កូន​ឈើតំបន់ទី១ទំហំ៣ហិកតា ស្ថិតក្នុងស្រុកអូរ​រាំងឪខេត្តត្បូ​ងឃ្មុំ​, នៅ​សៀមរាប​ទំហំ១០​ហិក​តា,​ កំពង់​ស្ពឺ​ទំហំ ២០ហិកតា,​មណ្ឌលគិរីទំហំ ១០ហិកតា និងខេត្តកោះកុង៣ហិកតាផងដែរ។

លោករដ្ឋមន្រ្តីបញ្ជាក់ថា៖«គោលដៅគឺជំរុញការដាំដុះដើមឈើ ភាពបៃតងរបស់កម្ពុជាយើង។ ភាព​បៃ​តង​ហ្នឹង​ឯង ដែលនាំទៅដល់ខ្យល់បរិសុទ្ធ។ ខ្យល់បរិសុទ្ធមានន័យថាអព្យាក្រឹតកាបូន។ ពាក្យអព្យាក្រឹតកាបូន គឺខ្យល់បរិសុទ្ធ...កាលណាខ្យល់យើងបរិសុទ្ធ កាបូន មេតានសាយភាយចេញទៅ ដើមឈើ​ស្រូប​យក​មក​អស់ ស្មើគ្នាមានតុល្យភាព គឺអព្យាក្រឹតកាបូន ខ្យល់បរិសុទ្ធ»។

ក្រោយពីពិធីសម្ពោធបើកការដ្ឋានសាងសង់ផ្លូវចូលទៅតំបន់ភ្នំខ្នងផ្សារនិងហេដ្ឋារចនាសម្ព័ន្ធនោះ លោក​រដ្ឋមន្រ្តី ក៏បានចុះទៅពិនិត្យការ​សាសង់ថ្នាលបណ្តុះ​កូនឈើថ្នាក់តំបន់​នៅក្នុងខេត្ត​កំពង់ស្ពឺ​នោះ​ផង​ដែរ។ ក្នុងឱកាសនោះ លោករដ្ឋមន្រ្តី បានឱ្យដឹងថា នៅឆ្នាំ២០២៥​នេះក្រសួងបរិស្ថាន​នឹងរៀប​ចំពិព័រណ៍​និង​ចែក​កូនឈើក្រោមមូលបទ»ពន្លកបៃតង»ដើម្បីចែកជូនកូនឈើដល់ប្រជាពលរដ្ឋដោយឥតគិតថ្លៃចំនួន៣លានដើម។ ក្នុងនោះមានកូនឈើ៣ប្រភេទ ដូចជាប្រភេទឈើប្រណីតឈើហូបផ្លែនិងដើមត្នោតចំនួន​១លានដើមផងដែរ។

យុទ្ធនាការបណ្តុះគំនិត«ពន្លកបៃតង»នេះនឹងប្រារព្ធឡើងជាលើកទី២បន្ទាប់ពីលើកទី១ត្រូវបានរៀបចំឡើងកាលពីថ្ងៃទី១០-១៦ខែកក្កដា​ឆ្នាំ២០២៤និងបានចែក​កូនឈើជូន​ប្រជាពលរដ្ឋ​យកទៅដាំ​តាមទី​សាធារណៈ​ដាំតាមសហគមន៍និងដាំស្តារព្រៃបានចំនួន១,៣លានដើម។

ភាពបៃតងជាសសរស្តម្ភទី២នៃយុទ្ធសាស្រ្តចក្រាវិស័យបរិស្ថានដែលបានដាក់ចេញអនុលោមតាមយុទ្ធសាស្រ្តបញ្ចកោណដំណាក់កាលទី១នៃរាជដ្ឋាភិបាលកម្ពុជានីតិកាលទី៧នៃរដ្ឋសភា។

លោករដ្ឋមន្រ្តីសុផល្លែតបានសំដែងនូវសេចក្តីសង្ឃឹមថា៖«នៅឆ្នាំបន្ទាប់ទៀតក្រសួងបរិស្ថានអាចបណ្តុះកូនឈើបានចំនួន១០លានដើមជារៀងរាល់ឆ្នាំចែកជូនប្រជាពលរដ្ឋយកទៅដាំដែលឆ្លើយតបនឹងការប្តេជ្ញាចិត្តរបស់កម្ពុជាពង្រីកគម្របព្រៃឈើឱ្យបានច្រើនចូលរួមចំណែកក្នុងការទប់ស្កាត់និងកាត់បន្ថយការប្រែប្រួលអាកាសធាតុធ្វើឱ្យសហគមន៍មូលដ្ឋានមានភាពបៃតងនិងកូនចៅជំនាន់ក្រោយស្គាល់ពីតម្លៃនៃធនធានធម្មជាតិទាំងអស់នេះ»។

លើសពីនេះដើមឈើដែលបានដាំដុះទាំងអស់នោះផ្តល់ប្រយោជន៍ដល់ការអភិវឌ្ឍប្រទេសជាតិតាមរយៈឥណទានកាបូននិងចូលរួមចំណែកដល់ការអភិវឌ្ឍសេដ្ឋកិច្ចហេដ្ឋរចនាសម្ព័ន្ធរបស់ប្រជាពលរដ្ឋនៅតាមសហគមន៍មូលដ្ឋានតាមរយៈការអភិវឌ្ឍគោលដៅលំហែបៃតង។

យុទ្ធនាការ«ពន្លកបៃតង»នឹងចែកកូនឈើចំនួន៣លានដើមនៅឆ្នាំ២០២៥ជួយបង្កើនគម្របបៃតងនៅកម្ពុជា ដើម្បីអនុវត្តយុទ្ធសាស្ត្រកម្ពុជាបៃតងនិងសម្រេចគោលដៅជាប្រទេសអព្យាក្រឹតកាបូននៅឆ្នាំ២០៥០៕