ភ្នំពេញៈ ថ្នាក់ដឹកនាំក្រសួងបរិស្ថានបានផ្តាំទៅរោងចក្រ សហគ្រាស ជាពិសេស រោងចក្រស្វាយ ឱ្យបញ្ឈប់ការបង្ហូរទឹកកខ្វក់ចូលប្រភពទឹកស្អាត ព្រោះថា នាពេលបច្ចុប្បន្ននេះ ក្រសួង«មានដាវ ដើម្បីកាប់ហើយ»។

ក្នុងពិធីជួបជុំជាមួយអ្នកសារព័ត៌មាន នាពេលថ្មីៗនេះ រដ្ឋមន្រ្តីក្រសួងបរិស្ថាន​ លោកអ៊ាង​ សុផល្លែតបានថ្លែងថា ក្រោយពីទទួលបានព័ត៌មានពីប្រជាពលរដ្ឋ ក៍ដូចជាសេចក្តីរាយការណ៍ពីអ្នកសារព័ត៌មាន ក្រសួងបានចាត់វិធានការជាបន្តបន្ទាប់ទៅលើរោងចក្រ សហគ្រាស ដែលបានលួចបង្ហូរទឹកកខ្វក់ចូលប្រភពទឹកស្អាតសាធារណៈ។ រហូតមកដល់ពេលបច្ចុប្បន្ននេះ រោងចក្រ សហគ្រាស ក៏ដូចជាទីតាំងក្រុមហ៊ុនជាង៣០ទីតាំង ត្រូវបានចាត់វិធានការតាមផ្លូវច្បាប់ ដោយសារតែសកម្មភាពបំពុលប្រភពទឹកស្អាត។

លោកមានប្រសាសន៍ថា៖«ជាអាទិ៍ ទឹកកខ្វក់ គាត់បង្ហូរចេញពីរោងចក្រ អត់មានចម្រោះ ចូលប្រភពទឹកស្អាតរបស់យើង ហើយបង្ហូរនៅម៉ោង១១ ឬ ១២យប់ទៀត។ ពួកយើងអត់ដឹងទេ។ អ៊ីចឹងទៅ បងប្អូនអ្នកសារព័ត៌​មាន​ផ្សាយប្រាប់មក ផ្ញើសារមក យើងចាត់ការភ្លាម។ រហូតមកដល់សព្វថ្ងៃនេះ យើងចាត់ការបានជាង៣០ក្រុមហ៊ុន រោងចក្រហើយ»។

លោករដ្ឋមន្រ្តី បានព្រមានរោងចក្រ សហគ្រាសឱ្យបញ្ឈប់សកម្មភាពលួចបង្ហូរទឹកកខ្វក់នោះតទៅទៀត ហើយបានសំដែងការជឿជាក់ថា ចាប់ពីឆ្នាំ២០២៥នេះតទៅ ប្រភពទឹកស្អាតនឹងលែងមាន ការបំពុលទៀតហើយ។

លោកថ្លែងដូច្នេះថា៖«អ៊ីចឹងឆ្លៀតផ្ញើសារទៅរោងចក្របន្តិចចុះ។ ឈប់ទៅ [បញ្ឈប់ការបង្ហូរទឹកកខ្វក់] បើខ្ញុំចាប់ហើយ ខ្ញុំមានដាវហើយ កាប់ហើយបាទ។ អត់លើកលែងទេ។ ប្រពភពទឹកស្អាតយើង ឆ្នាំ២០២៥នេះ ស្អាតហើយ»។

ការលើកឡើងថា មានដាវដើម្បីកាប់នេះ គឺលោករដ្ឋមន្រ្តីសំដៅទៅលើមូលដ្ឋានច្បាប់យ៉ាងរឹងមាំ ជាពិសេស ការចេញសារាចរលេខ ០៣ សរ ចុះថ្ងៃទី១២ ខែមីនា ឆ្នាំ២០២៥ ស្តីពីវិធានការទប់ស្កាត់ និងកាត់បន្ថយការបំពុលតំបន់ទឹកសាធារណៈ របស់រាជរដ្ឋាភិបាល។ ខ្លឹមសារ នៃសារាចរនេះ ក៏ត្រូវបានបណ្តាញសារព័ត៌មាន ជួយផ្សព្វផ្សាយយ៉ាងផុសផុលផងដែរ។ លើសពីនេះ លោកនាយករដ្ឋមន្ត្រី ហ៊ុន ម៉ាណែត នាពេលថ្មីៗនេះ ក៏បានបញ្ជាឱ្យ​ក្រសួង និងរដ្ឋបាលរាជធានីខេត្តចុះត្រួតពិនិត្យ និងមានចំណាត់ការបញ្ឈប់សកម្មភាពរបស់រោងចក្រណា ដែលបង្កការបង្ហូរទឹកកខ្វក់បំពុលបរិស្ថាន និងប្រភពទឹកសាធារណៈផងដែរ។

ក្នុងពិធី សម្ពោធបើកការដ្ឋានសាងសង់ផ្លូវចូលទៅតំបន់ភ្នំខ្នងផ្សារ និងហេដ្ឋារចនាសម្ព័ន្ធបម្រើឱ្យគោលដៅលំហែបៃតងតំបន់ភ្នំខ្នងផ្សារ ក្នុងខេត្តកំពង់ស្ពឺកាលពីចុងសប្តាហ៍មុន លោករដ្ឋមន្រ្តីក៏បានអំពាវនាវ ដល់ប្រ​ជាព​ល​រដ្ឋ និងអ្នកសារព័ត៌មាន ជួយផ្តល់ព័ត៌មានដល់ក្រសួង​ពីការបំពុលបរិស្ថានណាមួយរបស់រោងចក្រ ឬសហគ្រាស។

ការអំពាវនាវបែបនេះ ដោយសារតែកាលពីខែមីនាកន្លងមក លោកបានធ្វើដំណើរទៅកាន់តំបន់ខ្នងផ្សារ ហើយពេលនោះ ក៏បានធុំក្លិនស្អុយចេញពីរោងចក្រស្វាយមួយកន្លែង ក្នុងស្រុកឱរ៉ាល់ នៅវេលាម៉ោងប្រមាណជា៤ទៀបភ្លឺ។

លោកបញ្ជាក់ថា៖«បើកកាត់រោងចក្រផលិតស្វាយ ស្អុយងោកតែម្តង ម៉ោង៤ភ្លឺ។ ស្អុយខ្លាំងណាស់។ ជួយមើលផង។ អាហ្នឹងហើយបំពុលបរិស្ថាននោះ។ បរិសុទ្ធអីទៀត បើអាហ្នុងចេញមកហើយហ្នឹង។ អាហ្នឹងនិយាយតែខ្យល់ទេណា ចុះបើលួចបង្ហូរចូលក្នុងប្រភពទឹកទៀត មិនងាប់ មិនរលាយ»។

លោកអំពាវនាវដូច្នេះថា៖«អ៊ីចឹងលើមេឃ លើដី លើទឹករបស់យើងជួយខ្ញុំផង ប្រជាសហគមន៍។ លោកប្រធានមន្ទីរ ឧទ្យានុរក្សរបស់យើង មន្រ្តីយើងគ្នាតិចណាស់។ ​ជួនកាល គ្នាទៅមិនដល់ មើលអត់ឃើញ។ អ៊ីចឹងបើប្រជាសហគមន៍ បងប្អូនពលរដ្ឋយើងឃើញ ជួយប្រាប់ផង»៕