មន្ត្រីរដ្ឋាភិបាល មន្ដ្រីក្នុងវិស័យធនាគារ ប្រធានផ្នែកព័ត៌មានវិទ្យា សន្តិសុខតាមអ៊ីនធឺណិត ការគ្រប់គ្រងហានិភ័យ និងការអនុលោមតាមធនាគារជាសមាជិកបានចូលរួម «ទិវាសុវត្ថិភាពឌីជីថល ឆ្នាំ២០២៥ » ក្រោមប្រធានបទ «ការទប់ស្កាត់ និងការការពារ» នៅសណ្ឋាគារសុខាភ្នំពេញ។ រូបភាព សហការី
ភ្នំពេញ៖ ដោយសារការគំរាមកំហែងតាមអ៊ីនធឺណិតបន្តកើនឡើងាន់តែស្មុគស្មាញ ការការពារវិស័យហិរញ្ញវត្ថុបានក្លាយជាអាទិភាពបន្ទាន់សម្រាប់កម្ពុជា។
សមាគមធនាគារនៅកម្ពុជា (ABC) បានប្រារព្ធទិវា «ទិវាសុវត្ថិភាពឌីជីថល ឆ្នាំ២០២៥» ក្រោមប្រធានបទ «ការទប់ស្កាត់ និងការការពារ» នៅសណ្ឋាគារសុខាភ្នំពេញ នាថ្ងៃទី២៣ ខែឧសភា ដើម្បីបង្ហាញពីតួនាទីដ៏សំខាន់ដែលសន្តិសុខអ៊ីនធឺណិតការពារប្រព័ន្ធធនាគាររបស់ប្រទេសជាតិ។
គំនិចផ្ដួចផ្ដើមរៀបចំព្រឹត្តិការណ៍នេះ មានគោលបំណងលើកកម្ពស់ការយល់ដឹង ពង្រឹងកិច្ចសហការរវាងភាគីពាក់ព័ន្ធ និងលើកកម្ពស់ឧត្ដមានុវត្តន៍សម្រាប់សុវត្ថិភាពឌីជីថល។
លោក រ័ត្ន សោភ័ណ ប្រធានសមាគមធនាគារនៅកម្ពុជា បានថ្លែងថា៖ «ទិវាសុវត្ថិភាពឌីជីថលលែងជាមុខងារបច្ចេកទេសតែមួយផ្នែកទៀតហើយ វាជាអាទិភាពសម្រាប់គណៈគ្រប់គ្រងស្ថាប័ន និងគ្រឹះស្ថាន ឬក្រុមប្រឹក្សា ភិបាលរបស់គ្រឹះស្ថាន ឬស្ថាប័នហិរញ្ញវត្ថុទាំងមូល»។
លោកបានឱ្យដឹងថា វាក៏មិនមែនជាការទទួលខុសត្រូវរបស់ផ្នែកព័ត៌មានវិទ្យា (IT) ប៉ុណ្ណោះទេ តែអ្នកគ្រប់គ្នានៅក្នុងវិស័យហិរញ្ញវត្ថុជាអ្នកមានតួនាទីក្នុងការទប់ស្កាត់ និងការពារចំពោះបញ្ហានេះ។
លោក សោភ័ណ បានន្ថែមថា រាល់ការចុចលើប្រតិបត្តិការ និងការផ្ទេរទិន្នន័យពិតជាមានសារៈសំខាន់ក្នុងការត្រួតពិនិត្យឱ្យបានម៉ត់ចត់ ព្រោះវាអាចប្រឈមនូវការគំរាមកំហែងរាល់វិនាទី។ ការគំរាមកំហែងមានពិតប្រាកដ និងវិវត្តជាប្រចាំ។
លោកបានពន្យល់ថា៖ «ជាមួយនឹងការបោកប្រាស់តាមប្រព័ន្ធឌីជីថល មានដូចជា ការបោកប្រាស់តាមរយៈការផ្ញើសារ ឬអ៊ីមែល (phishing) ការវាយប្រហារដោយមេរោគកុំព្យូទ័រ (Ransomware) និងវិធីសាស្ត្រនៃការបោកប្រាស់កាន់តែមានលក្ខណៈស្មុគស្មាញ ដូច្នេះកម្មវិធីនេះមានសារៈសំខាន់ខ្លាំងណាស់ ដើម្បីទប់ស្កាត់ និងការពារហេដ្ឋារចនាសម្ព័ន្ធហិរញ្ញវត្ថុ និងកសាងទំនុកចិត្តពីសំណាក់អតិថិជន»។
កម្ពុជាក៏ដូចទៅនឹងបណ្តាប្រទេសផ្សេងទៀតដែរ ពោលគឺ មិនអាចគេចផុតពីបញ្ហាប្រឈមទាក់ទងទៅនឹងបញ្ហាសាយប័រនេះបានឡើយ។គិតត្រឹមប៉ុន្មានឆ្នាំចុងក្រោយនេះ ការឆបោកតាមប្រព័ន្ធអនឡាញ និងការវាយប្រហារ តាមរយៈការផ្ញើសារ ឬអ៊ីមែល (phishing) ដែលមានលក្ខណៈស្មុគស្មាញបានកើតឡើងជាច្រើនករណី។
បទល្មើសទាំងនេះ ជារឿយៗតែងធ្វើឡើងតាមរយៈអ៊ីមែល សារ SMS និងកម្មវិធីផ្ញើសារផ្សេងៗ ដើម្បីចូលលួចយកព័ត៌មានសម្ងាត់។
ការគំរាមកំហែងដែលគួរឱ្យព្រួយបារម្ភគឺ ជនល្មើសមួយចំនួនបានប្រើឧបករណ៍ (fake BTS) ដើម្បីផ្សព្វផ្សាយសារដែលមានមេរោគតាមរយៈតំណភ្ជាប់ (link) ហើយនៅពេលដែលអ្នកប្រើប្រាស់ចុចចូលទៅកាន់គេហទំព័រក្លែងបន្លំ ឬដំឡើងកម្មវិធីដែលមានហានិភ័យ។
លោក សោភ័ណ្ឌ បានបន្ដថា កត្តាទាំងនេះហើយ តម្រូវការចាំបាច់ក្នុងការលើកកម្ពស់លើការយល់ដឹងអំពីសុវត្ថិភាពឌីជីថល និងវិធានការការពារដ៏សុវត្ថិភាព។
លោក ឡុង វីបុណ្យឫទ្ធ អគ្គនាយករងប្រតិបត្តិការ ធនាគារជាតិនៃកម្ពុជា បានថ្លែងថា៖ «សម្រាប់ធនាគារជាតិនៃកម្ពុជា ការងារស្នូលរបស់ខ្លួនគឺ ការថែរក្សាគុណតម្លៃ និងស្ថិរភាពវិស័យធនាគារ និងហិរញ្ញវត្ថុ និងប្រព័ន្ធធនាគារនិងហិរញ្ញវត្ថុដែលមានបរិយាបន្ន ពិពិធកម្ម និងសុវត្ថិភាព។ យើងទទួលស្គាល់អំពីតួនាទីសំខាន់ដ៏សំខាន់នៃសុវត្ថិភាពឌីជីថល ក្នុងការថែរក្សាទំនុកចិត្តលើសេវាហិរញ្ញវត្ថុឌីជីថល»។
លោកបានបន្ថែមថា ធនាគារជាតិនៃកម្ពុជា ក៏សូមអំពាវនាវដល់ភាគីពាក់ព័ន្ធទាំងអស់ដូចជា និយ័តករ គ្រឹះស្ថានហិរញ្ញវត្ថុ អ្នកផ្តល់សេវាបច្ចេកវិទ្យា និងអតិថិជន មេត្តាចូលរួមជំរុញការយល់ដឹងអំពីសុវត្ថិភាពឌីជីថល ជំរុញនវានុវត្តន៍ និងសហការរួមគ្នា ដើម្បីទប់ស្កាត់ និងការពារសុវត្ថិភាពឌីជីថលនាអនាគតរបស់កម្ពុជា។
ទិវាសុវត្ថិភាពឌីជីថលនេះ មានកិច្ចពិភាក្សាសំខាន់ៗចំនួនបី ដែលផ្តោតសំខាន់លើការអភិវឌ្ឍគោលនយោបាយសុវត្ថិភាពឌីជីថល ការទប់ស្កាត់ការបោកប្រាស់ និងការធានាសុវត្ថិភាពលើប្រព័ន្ធឌីជីថលក្នុងវិស័យធនាគារ និងហិរញ្ញវត្ថុ។
ស្ថាប័នសំខាន់ៗ ដូចជា៖ ធនាគារជាតិនៃកម្ពុជា (NBC) នាយកដ្ឋានប្រឆាំងបទល្មើសបច្ចេកវិទ្យានៃក្រសួងមហាផ្ទៃ ក្រុមហ៊ុន Mastercard និងអង្គភាពស៊ើបការណ៍ហិរញ្ញវត្ថុកម្ពុជា (CAFIU) បានចែករំលែកការយល់ដឹង និងយុទ្ធសាស្ត្រក្នុងការប្រយុទ្ធប្រឆាំងនឹងការគំរាមកំហែងដែលកំពុងមានការកើនឡើង។
លោកស្រី Wong Winnie នាយកប្រចាំប្រទេសរបស់ក្រុមហ៊ុន Mastercard ប្រចាំប្រទេសវៀតណាម ឡាវ និងកម្ពុជា បានឱ្យដឹងថា៖ «ក្រុមហ៊ុន Mastercard ធ្វើការយ៉ាងជិតស្និទ្ធជាមួយដៃគូរដ្ឋ និងវិស័យធនាគារ និងហិរញ្ញវត្ថុ ដើម្បីចែករំលែកព័ត៌មានអំពីហានិភ័យ ដំណោះស្រាយដ៏ប្រសិទ្ធភាពលើសុវត្ថិភាពសាយប័រ និងអភិវឌ្ឍគោលនយោបាយគាំទ្រ ដើម្បីធ្វើឱ្យប្រសើរឡើងនូវ ភាពធន់នៃសាយប័រថ្នាក់ជាតិ»។
លោកស្រីបន្ដថា៖ «នៅក្នុងប្រទេសកម្ពុជា កិច្ចសហការជាមួយនិយ័តករ និងគ្រឹះស្ថានហិរញ្ញវត្ថុ គឺជាគន្លឹះក្នុងការពង្រឹងវិធានសុវត្ថិភាពឌីជីថល រាប់ចាប់ពីការធានាលើសុវត្ថិភាពអត្តសញ្ញាណឌីជីថល រហូតដល់ការកសាងប្រព័ន្ធទូទាត់ប្រាក់ដែលមានភាពធន់»។
លោកស្រី Winnie បានលើកឡើងថា សុវត្ថិភាពឌីជីថល មិនមែនជាការព្រួយបារម្ភអំពីប្រព័ន្ធព័ត៌មានវិទ្យាទៀតនោះទេ វាបានក្លាយជាយុទ្ធសាស្ត្រអាទិភាព ដែលទាមទារឱ្យមានកិច្ចសហការយ៉ាងជិតស្និទ្ធរវាងវិស័យរដ្ឋ និងឯកជន ដើម្បីឆ្លើយតបនឹងហានិភ័យដែលកំពុងមានការកើនឡើង»។
ទិវាសុវត្ថិភាពឌីជីថល ឆ្នាំ២០២៥ មិនត្រឹមតែជំរុញឱ្យមានការសន្ទនារវាងភាគីពាក់ព័ន្ធប៉ុណ្ណោះទេ ប៉ុន្តែក៏មានគោលបំណងបង្កើនចំណេះដឹងផ្នែកឌីជីថលសម្រាប់អ្នកជំនាញក្នុងវិស័យធនាគារ និងហិរញ្ញវត្ថុ និងលើកកម្ពស់វប្បធម៌នៃការការពារតាមប្រព័ន្ធអ៊ីនធើណិតប្រកបដោយបុរេសកម្ម៕
.jpg)
