និស្សិតចូលរួមស្វែងយល់ពីសន្ទរកថារបស់លោក អេង រតនា ស្ដីពីឱកាសការងារជាមន្ដ្រីពន្ធដារ ដែលធ្វើឡើងនៅ CamEd Business School។ រូបថត ហុង រស្មី
ភ្នំពេញ៖ និស្សិតផ្នែកគណនេយ្យ សវនកម្ម និងពន្ធដារ អាចចាប់យកអាជីពដ៏ជោគជ័យមួយនៅពេលខាងមុខ ខណៈដែលអគ្គនាយកដ្ឋានពន្ធដារកម្ពុជា បើកឱកាសថ្មីសម្រាប់ការប្រកួតប្រជែងជាមន្ត្រីពន្ធដារ។
ក្នុងសន្និសីទនាពេលថ្មីៗនេះ ស្តីពីអាជីពគណនេយ្យ សវនកម្ម និងពន្ធដារ ដែលរៀបចំឡើងនៅសាលា CamEd Business School នៅថ្ងៃទី ២៣ ខែឧសភា លោក អេង រតនា ប្រធាននាយកដ្ឋានគ្រប់គ្រងអ្នកជាប់ពន្ធធំនៃអគ្គនាយកដ្ឋានពន្ធដារ បានសង្កត់ធ្ងន់លើតួនាទីសំខាន់របស់មន្ត្រីពន្ធដារក្នុងការជួយដល់ការអភិវឌ្ឍន៍ជាតិ និងផ្តល់ការយល់ដឹងអំពីទិដ្ឋភាពពន្ធដារដែលកំពុងវិវត្ត។
នេះជាការថ្លែងបើកឱកាសដល់និស្សិតពិចារណាលើអាជីព ដែលរួមបញ្ចូលកំណើនវិជ្ជាជីវៈជាមួយនឹងឱកាសដើម្បីរួមចំណែកដល់អនាគតសេដ្ឋកិច្ចរបស់ប្រទេសកម្ពុជា។
លោក រតនា បានថ្លែងនៅចំពោះមុខនាយក លោកគ្រូអ្នកគ្រូ និស្សិតសាកលវិទ្យាល័យ CamEd Business School ថា៖ «ក្នុងនាមជាជំនាញ ទស្សនៈវិស័យ គឺធ្វើយ៉ាងឱ្យក្លាយជាអង្គភាពសាធារណៈត្រូវបានជឿជាក់ និងគោរព ទទួលស្គាល់លើគុណភាពជំនាញ នៃការប្រមូលពន្ធដើម្បីជំរុញកំណើនសេដ្ឋកិច្ច និងអភិវឌ្ឍចីរភាព»។
លោកបន្ដថា មន្ដ្រីពន្ធដារផ្ដល់សេវាប្រកបដោយគុណភាព ពង្រឹងការអនុវត្ដច្បាប់ និងបទបញ្ញត្ដិស្ដីពីពន្ធដារប្រកបដោយសុច្ចរឹតភាព និងភាពស្មើរគ្នា។
ចំពោះការប្រមូលពន្ធ អគ្គនាយកដ្ឋានពន្ធដារគឺជាអង្គភាពសំខាន់មួយក្នុងការប្រមូលចំណូលពន្ធពីបុគ្គល សហគ្រាស ឬទ្រព្យសម្បត្ដិដើម្បីបញ្ចូលទៅខ្ទង់ចំណាយរបស់រាជរដ្ឋាភិបាលសម្រាប់ការកសាងប្រទេសរួមទាំងសាងសង់ផ្លូវ ស្ពាន និងវិស័យការពារជាតិជាដើម។
លោក អេង រតនា ប្រធាននាយកដ្ឋានគ្រប់គ្រងអ្នកជាប់ពន្ធធំនៃអគ្គនាយកដ្ឋានពន្ធដារ បានថ្លែងនៅចំពោះមុខនាយក លោកគ្រូអ្នកគ្រូ និស្សិតនៅ CamEd Business School។ រូបថត ហុង រស្មី
លោក រតនា បានបញ្ជាក់ថា៖ «ប្រព័ន្ធពន្ធដារដែលយើងធ្វើបានត្រឹមត្រូវសម្រេចបាននូវគោលបំណងរបស់រាជរដ្ឋាភិបាល ជាពិសេស លើកទឹកចិត្ដដល់វិស័យដែលរាជរដ្ឋាភិបាលចង់ផ្ដល់ភាពអនុគ្រោះ»។
លោកបានពន្យល់ថា តាមការសិក្សាស្រាវជ្រាវ កម្រិតផលិតផលក្នុងស្រុកសរុប (ផ.ស.ស) ដើរស្របនឹងចំណូលពន្ធ។ រយៈពេលជាង១០ឆ្នាំចុងក្រោយនេះ ពន្ធដារប្រមូលពន្ធមានការកើនឡើងរហូត ដែលរត់ទៅតាមកំណើន (ផ.ស.ស)។
យ៉ាងណាមិញ លោកទទួលស្គាល់ថា សម្រាប់ឆ្នាំ២០២៤-២០២៥ ប្រព័ន្ធទាំងពីរនេះមិនរត់ស្របគ្នាទេ ដោយសាររាជរដ្ឋាភិបាលអាណត្ដិថ្មីនេះ លើកទឹកចិត្ដជួយប្រជាពលរដ្ឋរងគ្រោះដោយកូវីដ-១៩ និងផលប៉ះពាល់ពីសេដ្ឋកិច្ចសកល ពោលគឺការស្ដាសេដ្ឋកិច្ច និងគាំទ្រសង្គម ជាជាងការប្រមូលពន្ធតាមផែនការ។
ជាចំណែកមួយនៃមុំចំនួន៥ របស់រាជរដ្ឋាភិបាល គឺការអភិវឌ្ឍធនធានមនុស្ស (Human capital development) ដែលគ្រឹះស្ថានអប់រំពិតជាទីកន្លែងដ៏មានសារសំខាន់ណាស់ ហើយមុំចុងក្រោយគឺសេដ្ឋកិច្ច និងសង្គមឌីជីថល។
ពន្ធដារមានគោលសំខាន់ ៣ ចំណុច គឺបង្កើតអនុលោមភាព មានន័យថា ពង្រឹងការគោរពច្បាប់ ដែលទាមទារអ្នកចេះផ្នែកគណនេយ្យ ចេះគោរពច្បាប់ ដែលនិស្សិតទាំងអស់ពិតជាផ្នែកមួយដ៏សំខាន់។
លោក រតនា បានបន្ដថា ទីពីរ គឺបដិវត្ដកម្មឌីជីថល ដែលកម្ពុជាកំពុងតែអនុវត្ដ និងទីបី គឺការពង្រឹងធនធានមនុស្ស។
លោកបានថ្លែងថា៖ «ឯកសារពន្ធដារ ជាប់កន្លែង មន្ដ្រីណារក្សាទុក យើងអាចមើលដឹង និងតាមរកឃើញ តាមរយៈការឆែកដោយខ្លួនឯង។ បន្ដិចទៀត យើងបង្កើត Tax Application ដំណើរការដោយបញ្ហាសិប្បនិម្មិត (AI) ដោយការចូលមើលអំពីទឹកប្រាក់ត្រូវបង់ពន្ធ ជំពាក់ពន្ធប៉ុន្មាន។ ដោយឡែក ប្អូនជាសិស្ស ចង់សួរសំណួរ សួរ និងឆ្លើយភ្លាមៗប្រកបដោយភាពត្រឹមត្រូវ»។
លោក រតនា បានបន្ដថា មុខងារស្នូលរបស់ពន្ធដារ កន្លងមក ធ្វើដោយដៃ តែបច្ចុប្បន្ននេះ វាត្រូវបានប្ដូរមកជាអេឡិចត្រូនិកទាំងអស់ ហើយរយៈពេល ៣ខែ ពន្ធដារផ្ដល់សេវាកម្មជិត ១ម៉ឺនករណី។
ប្រធាននាយកដ្ឋាន បានលើកឡើងថា ធ្វើជាមន្ដ្រីពន្ធដារ ហាក់ទទួលបានប្លង់រឹងមួយ ដែលខុសពីការងារនៅក្រុមហ៊ុនឯកជន ក៏ដូចជាទទួលបានឱកាសដណ្ដើមបានអាហារូបករណ៍ជាច្រើនកន្លែងទាំងក្នុង និងក្រៅប្រទេស។
លោកបានអះអាងថា៖ «កុំបារម្ភ! បើប្អូនៗចេះ គឺជាប់ ហើយពេលប្អូនៗជាប់ក្នុងផ្នែកពន្ធដារ ប្រាក់ខែ និងចំណូលមិនចាញ់ក្រុមហ៊ុនឯកជនទេ»។
.jpg)
