លោកអ៊ុក ម៉ៅ (ឆ្វេង)បានអះអាងថានឹងបង្កើនសកម្មភាពការពារព្រៃឈើ ជាពិសេសគឺព្រៃឡង់ បន្ទាប់ពីលោកត្រូវបានដោះលែង ឱ្យនៅក្រៅឃុំបណ្តោះអាសន្នកាលពីថ្ងៃអាទិត្យម្សិលមិញ។ រូបថត អាដហុក
ភ្នំពេញៈ ការរួមរឹតដោយពាក្យបណ្តឹងជាង១០ រហូតដល់ត្រូវបានចាប់ឃុំខ្លួននៅពន្ធនាគារអស់រយៈពេល១០ថ្ងៃ មិនបានធ្វើឱ្យលោកអ៊ុក ម៉ៅភ័យខ្លាច ហើយបោះបង់ឆន្ទះ ការពារធនធានធម្មជាតិចោលនោះទេ។ ផ្ទុយទៅវិញ សកម្មជនបរិស្ថាន និងអ្នកកាសែតសហគមន៍ រូបនេះ បានអះអាងថា នឹងនៅតែបន្តសកម្មភាពការពារព្រៃឈើដដែល ជាពិសេសព្រៃឡង់។ ព្រៃឡង់ ដែលលោកចាត់ទុកថា ជាបេះដូងរបស់លោក។
លោកបានលើកឡើងថា ទោះបីជារូបលោក មិនមែនជាអ្នកសារព័ត៌មាន ដែលទទួលបានការចុះបញ្ជីស្របច្បាប់ ក៏លោកនៅតែមានសិទ្ធិការពារព្រៃឈើកម្ពុជាដែរ។
លោកអះអាងថា៖«មុនពេលដែលគេចាប់ខ្ញុំដាក់ពន្ធនាគារ ខ្ញុំការពារព្រៃឈើ១០ភាគរយ តែក្រោយពេលចេញមកវិញនេះ ខ្ញុំនឹងបង្កើនការខិតប្រឹងប្រែងការពារឱ្យឡើងដល់១០០ភាគរយ។ ខ្ញុំនៅតែធ្វើដដែល តែខ្ញុំនឹងការពារព្រៃឈើ ខ្ញុំនឹងធ្វើឱ្យលើសពីមុនទៀត បើទោះបីខ្ញុំត្រូវបានគេធ្វើទុក្ខបុកម្នេញក៏ដោយ»។
លោកអ៊ុក ម៉ៅ អាយុ៥៧ឆ្នាំត្រូវបានកម្លាំងអាជ្ញាធរក្នុងខេត្តស្ទឹងត្រែងចាប់ និងឃុំខ្លួនបណ្ដោះអាសន្ននៅពន្ធនាគារខេត្តកាលពីថ្ងៃទី១៦ ខែឧសភានេះ ក្រោមបទចោទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍ និងបទបរិហារកេរ្តិ៍ជាសាធារណៈ»។ ទោះយ៉ាងណា លោកត្រូវបានតុលាការខេត្តសម្រេចដោះលែងឱ្យនៅក្រៅឃុំវិញកាលពីរសៀលថ្ងៃអាទិត្យ ទី២៥ ខែឧសភាដដែលនេះ។
លោកបានឱ្យដឹងថា ក្រោយពីការដោះលែងនោះមក លោកត្រូវគោរពតាមលក្ខខណ្ឌចំនួន៣ចំណុច។ ក្នុងនោះមានដូចជា៖ ក្រោយពេលមកដល់ផ្ទះបាន៣ថ្ងៃ លោកត្រូវយកដីកាដោះលែងនោះ ទៅផ្តល់ដំណឹងដល់នគរបាលប៉ុស្តិ៍ ហើយលោកត្រូវជូនដំណឹងដល់អាជ្ញាធរមូលដ្ឋាន នៅពេលដែលផ្លាស់ប្តូរទីលំនៅ។ ចុងក្រោយគឺលោកត្រូវបង្ហាញខ្លួននៅចំពោះមុខតុលាការ ទៅតាមការកោះហៅ។
លោកអ៊ុក ម៉ៅ បានអះអាងថា គ្មានការហាមឃាត់ណាមួយ មិនឱ្យលោកបន្តធ្វើសកម្មភាពការពារព្រៃឈើនោះទេ។ ប៉ុន្តែមន្រ្តីសាលាខេត្ត និងតុលាការបានណែនាំលោក«ឱ្យធ្វើអ្វី ត្រឹមត្រូវទៅតាមច្បាប់» ហើយលោកក៏យល់ព្រមទទួលយកផងដែរ។
លោកបាននិយាយថា៖«ខ្ញុំអត់ខ្លាចទេ។ អ្វីដែលខ្ញុំធ្វើ គឺដើម្បីព្រៃឈើ ប្រជាពលរដ្ឋខ្ញុំ ប្រទេសជាតិរបស់ខ្ញុំ។ បើខ្ញុំទៅកាប់បំផ្លាញ អាហ្នឹងបានខ្ញុំខ្លាចគុក ខ្លាចច្រវ៉ាក់ តែបើទៅការពារអ៊ីចឹង ខ្ញុំមិនខ្លាចទេ មន្រ្តីគ្រាប់ល្ពៅមួយចំនួននោះ»។
ការចាប់ឃុំខ្លួនលោក អ៊ុក ម៉ៅបង្កឱ្យមានការរិះគន់ពី អង្គការសង្គមស៊ីវិល និងសារព័ត៌មានបរទេសមួយចំនួនផងដែរ។ ក្រសួងព័ត៌មាន នៅថ្ងៃទី២២ ខែឧសភា បានធ្វើការបំភ្លឺថា លោកអ៊ុក ម៉ៅ មានបណ្ដឹងចំនួន១៥ សំណុំរឿងផ្សេងៗគ្នា ពាក់ព័ន្ធនឹងការប្រព្រឹត្តអំពើល្មើសច្បាប់នានារបស់ខ្លួន តាំងពីខែកុម្ភៈ ឆ្នាំ២០២២មក និងត្រូវបានចាប់ខ្លួនពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ និងបរិហាកេរ្តិ៍ជា សាធារណៈ បង្កហិង្សា និងការកាប់ទន្ទ្រានដីព្រៃរដ្ឋខុសច្បាប់។
ក្រសួងបញ្ជាក់ថា លោកអ៊ុក ម៉ៅ គឺជាអ្នកបម្រើការនៅអង្គភាព ឥន្ទ្រីផ្លើស ញូស៍ ប៉ុន្តែលោកមិនមានបណ្ណសារព័ត៌មាន ដែលចេញដោយក្រសួងព័ត៌មានឡើយ ដោយសារលោកមិនអាចបំពេញលក្ខខណ្ឌក្នុងការស្នើសុំបណ្ណ។ ពោល គឺរាល់អ្នកសារព័ត៌មានដែលស្នើសុំបណ្ណ ត្រូវតែមិនមានជាប់ពាក់ព័ន្ធនឹងបណ្ដឹងតវ៉ា ឬស្ថិតក្នុងនីតិវិធីតុលាការឡើយ។
បន្ថែមពីនោះ រដ្ឋបាលខេត្តស្ទឹងត្រែងក៏បានបំភ្លឺជូនសាធារណជនផងដែរថា ផ្ទះរបស់លោអ៊ុក ម៉ៅដែលត្រូវភ្លើងឆេះនោះ គឺពាក់ព័ន្ធទៅនឹងទំនាស់បុគ្គលរឿងលក់ដី។ លើសពីនោះ លោកអ៊ុក ម៉ៅ ក៏ត្រូវបានចោទប្រកាន់ថាបានទន្រ្ទានកាន់កាប់ដីព្រៃជាច្រើនផងដែរ។ ទោះយ៉ាងណា លោកអ៊ុក ម៉ៅបានច្រានចោលការចោទប្រកាន់នេះ។
លោកអះអាងប្រាប់ភ្នំពេញប៉ុស្តិ៍ថា៖«ខ្ញុំសុំប្រាប់ដោយស្ម័គ្រ ដោយចិត្ត បេះដូង ដោយការជាក់ស្តែងថា ជាង១០សំណុំរឿងដែលប្តឹងទាំងអស់ហ្នឹង ខ្ញុំអត់មានប្រព្រឹត្តសោះតែម្តង។ អត់មានសោះ អារឿងថា ខ្ញុំនេះកាប់បំផ្លាញព្រៃឈើ សូម្បីតែបន្តិចក៏មិនមានដែរ។ ខ្ញុំមិនបានទៅរុករាន ឬកាប់ដីព្រៃនោះទេ»។ លោកបានបន្តថា ប៉ុន្តែលោកធ្លាប់បានទិញដីមែន តែមិនមែនដីព្រៃទេ។ លោកថា លោកបានទិញដីតពីមន្រ្តីអាជ្ញាធរមួយចំនួន ដែលមានដូចជាប្រធានភូមិផងដែរ។
លោកអ៊ុក ម៉ៅ ដែលមានកូនរហូតដល់ទៅ៧នាក់ក្នុងបន្ទុកនោះ បានសំណូមពរឱ្យតុលាការទំលាក់ចោលនូវរាល់ពាក្យបណ្តឹង និងបទចោទប្រឆាំងនឹងរូបលោក។ ប៉ុន្តែលោកក៏មិនខ្លាចនឹងទទួលទោសផងដែរ ប្រសិនបើរូបលោកបានប្រព្រឹត្តដូចការចោទប្រកាន់នោះ៕
.jpg)
