លោក វ៉ន វាសនា ហៅ Mr. Dorn អធិការងងស្រុកបវែល ខេត្តបាត់ដំបង ដែលត្រូវបានចាប់ខ្លួន។ FB
អធិការរងស្រុកបវែលម្នាក់ និងមន្ត្រីម្នាក់មកពីអគ្គនាយកដ្ឋានសម្ភារៈបច្ចេកទេសនៃក្រសួងការពារជាតិ ត្រូវបានបញ្ជូនទៅគុកព្រៃស ពាក់ព័ន្ធនឹងការប៉ុនប៉ងស៊ីសំណូកសូកប៉ាន់ក្នុងទឹកប្រាក់ជាង ៧៧ម៉ឺន ពីជនជាតិថៃ។
អង្គភាពប្រឆាំងអំពើពុករលួយ (ACU) បានឃាត់ខ្លួនមន្រ្តីនគរបាលម្នាក់ ឈ្មោះ វ៉ន វាសនា ហៅ Mr. Dorn មានតួនាទីជាអធិការរងនគរបាលស្រុកបវេល ខេត្តបាត់ដំបង និង ឈ្មោះ តាំង សំណាង ឬ សុខ ច័ន្ទសំណាង មានតួនាទីជាជំនួយការអគ្គនាយករង នៃអគ្គនាយកដ្ឋានសម្ភារៈបច្ចេកទេស ក្រសួងការពារជាតិ។
អ្នកទាំងពីរត្រូវបានរកឃើញថាបានឃុបឃិតគ្នា ប៉ុនប៉ងរត់ការសូកប៉ាន់ក្នុងទឹកប្រាក់ចំនួន ៧៧ម៉ឺន ៤ពាន់ដុល្លារ ដើម្បីឱ្យមានការដោះលែងជនជាតិថៃ ៤៣នាក់ ដែលសមត្ថកិច្ចចម្រុះបានឃាត់ខ្លួន ពាក់ព័ន្ធនឹងការស្នាក់នៅនិងធ្វើការខុសច្បាប់នៅកម្ពុជា។
លោក សយ ចាន់វិចិត្រ អ្នកនាំពាក្យ ACU បានប្រាប់ភ្នំពេញប៉ុស្តិ៍ថា ការឃាត់ខ្លួននេះផ្តើមចេញពីប្រតិបត្តិការរបស់ក្រុមការងារចម្រុះនៃអគ្គស្នងការនគរបាលជាតិ កាលពីថ្ងៃទី២ ខែឧសភា ដែលបានចុះពិនិត្យ និងវាយតម្លៃចំពោះការស្នាក់នៅ និងធ្វើការដោយខុសច្បាប់របស់ជនជាតិថៃ ៤៣នាក់ ក្នុងក្រុងប៉ោយប៉ែត ខេត្តបន្ទាយមានជ័យ។
ក្រោយមក ពីថ្ងៃទី៤ ដល់ ទី៦ ខែឧសភា ជនសង្ស័យ វ៉ន វាសនា និង តាំង សំណាង បានឃុបឃិតគ្នា យកប្រាក់ចំនួនជាង ៧៧ម៉ឺនដុល្លារ រត់ការសូកប៉ាន់ ដើម្បីឱ្យមានការដោះលែងអ្នកទាំង ៤៣ ដែលបានឃាត់ខ្លួន ប៉ុន្តែផែនការរត់ការដោះលែងមិនបានជោគជ័យ ហើយជនជាតិថៃទាំង ៤៣នាក់ ត្រូវបានសមត្ថកិច្ចបណ្តេញចេញពីកម្ពុជា នៅថ្ងៃទី៨ ខែឧសភា។
យ៉ាងណាក៏ដោយ មិនមានការបញ្ជាក់ថា ជនសង្ស័យទាំងពីរព្យាយាមយកប្រាក់ទៅស៊ូកប៉ាន់អ្នកណាដើម្បីបានការដោះលែងនោះទេ។
លោក ចាន់វិចិត្រ បញ្ជាក់ថា ទង្វើជនសង្ស័យទាំងនោះ មានធាតុផ្សំនៃបទល្មើសប៉ុនប៉ងសូកប៉ាន់ ដូចមានចែងក្នុងច្បាប់ប្រឆាំងអំពើពុករលួយ និងនៅក្នុងក្រមព្រហ្មទណ្ឌ។
ដោយឡែក ឈ្មោះ វ៉ន វាសនា ដែលបានយកប្រាក់ដែលខ្លួនទទួលបានពីកម្រៃរត់ការ ទៅដាក់ធនាគារ និងប្រើប្រាស់ ក៏ជាប់ពាក់ព័ន្ធនឹងបទល្មើសលាងសម្អាតប្រាក់ផងដែរ។
ក្រៅពីជនសង្ស័យដែលត្រូវបានចាប់ខ្លួន មានមនុស្ស ៤ នាក់ទៀតដែលជាបក្ខពួក កំពុងគេចខ្លួន ហើយត្រូវបានចោទប្រកាន់បទល្មើសប៉ុនប៉ងសូកប៉ាន់ផងដែរ។
ជនសង្ស័យទាំងពីរត្រូវបាន ACU ឃាត់ខ្លួននៅថ្ងៃទី២៣ ខែឧសភា ហើយត្រូវបានតុលាការបញ្ជូនទៅឃុំខ្លួនណ្ដោះអាសន្ននៅគុកព្រៃស នៅថ្ងៃទី២៦ ខែឧសភា។
លោក យង់ ពៅ អគ្គលេខាធិការរាជបណ្ឌិត្យសភាកម្ពុជា មន្ត្រីអនុវត្តច្បាប់ដែលល្មើសច្បាប់ គឺជាគ្រោះថ្នាក់ធ្ងន់ធ្ងរសម្រាប់ជាតិ។
លោកថ្លែងថា៖ «ការប្រព្រឹត្តអំពើទុច្ចរិត អំពើពុករលួយជាមួយជនបរទេសដែលប្រព្រឹត្តអំពើខុសច្បាប់នៅកម្ពុជា គឺបានបំផ្លាញទី១ គឺកិត្តិយស មុខមាត់កម្ពុជាលើឆាកអន្តរជាតិ ដោយសារមន្ត្រីខិលខូចដោយសារមន្ត្រី ហើយធ្វើឲ្យខូចនយោបាយការទេសរបស់កម្ពុជា។ ទី២ គឺធ្វើឲ្យខូចប្រព័ន្ធសេដ្ឋកិច្ចជាតិកម្ពុជា និងធ្វើឲ្យមានអំពើអសកម្មផ្សេងទៀតនៅកម្ពុជា»៕
.jpg)
