ប្រធានព្រឹទ្ធសភា លោក ហ៊ុន សែន ថ្លែងសារពិសេសអំពីបញ្ហាព្រំដែន នៅថ្ងៃទី២៩ ខែមេសា ព្រឹកមិញ។ TVK
លោក ហ៊ុន សែន ប្រធានព្រឹទ្ធសភា បានបញ្ជាក់ថា តំបន់ដែលមានការប៉ះទង្គិចគ្នារវាងទាហានថៃ និង ទាហានកម្ពុជា កាលពីព្រលឹមថ្ងៃទី២៨ ឧសភា គឺជាទឹកដីកម្ពុជា ដែលលោកបានទៅកាលពីឆ្នាំ២០០៩។ ការប៉ះទង្គិចគ្នានេះបណ្ដាលឲ្យមានទាហានខ្មែរម្នាក់បាត់បង់ជីវិត។
ថ្លែងក្នុងសារពិសេសនៅព្រឹកថ្ងៃទី២៩ ខែឧសភា នេះ លោក ហ៊ុន សែន ថ្លែងបញ្ជាក់ថា៖ «កន្លែងដែលមានបញ្ហាពីម្សិលមិញ កាលពីឆ្នាំ២០០៩ ខ្ញុំបានទៅអង្គុយកន្លែងហ្នឹង។ ហេតុអ្វីបានជាទឹកដីគេ? ខ្ញុំមិនអស់ចិត្ត ហេតុអីបានទាហានរបស់យើងទៅស្លាប់កន្លែងហ្នឹង?»។
ប្រធានព្រឹទ្ធសភា ក៏បានបញ្ជាក់ប្រាប់ដល់ប្រជាជនកម្ពុជាថា ការចល័តកងទ័ព និង អាវុធធុនធ្ងន់ទៅព្រំដែនគឺមិនមែនដើម្បីទៅធ្វើសង្គ្រាមជាមួយថៃនោះទេ គឺដើម្បីត្រៀមលក្ខណៈរួចរាល់សម្រាប់ហេតុការណ៍អាក្រក់បំផុតដែលបានកើតឡើង ដូចពីឆ្នាំ ២០០៨ ដល់ឆ្នាំ ២០១១។ លោកស្នើឲ្យប្រជាពលរដ្ឋទុកចិត្តលើសមត្ថភាពនៃការដឹកនាំរបស់រដ្ឋាភិបាល និងសមត្ថភាពកងទ័ព និងមានភាពស្ងប់ស្ងាត់។
បើតាមលោក ហ៊ុន សែន នៅល្ងាចនេះ មេបញ្ជាការរងកងទ័ពជើងគោក និង ជាមេបញ្ជាការកងពលធំ អន្តរាគមន៍លេខ៣ នឹងជួបជាមួយភាគីថៃ ដើម្បីរកដំណោះស្រាយ ហើយលោករំពឹងថា សភាពការនៅមុំបី នឹងវិលត្រឡប់ទៅរកស្ថានភាពដូចមុនម៉ោង ៥ ថ្ងៃទី២៨ ខែឧសភា គឺស្ថានភាពដែលមិនមានការប៉ះទង្គិចគ្នា។
ការប៉ះទង្គិចគ្នាកាលពីព្រលឹមថ្ងៃទី២៨ ខែឧសភា នៅចំណុចមុំបី ក្នុងភូមិតេជោមរតក ឃុំមរតក ស្រុកជាំក្សាន្ត ខេត្តព្រះវិហារ បានបណ្ដាលឲ្យទាហានកម្ពុជាមួយរូប គឺលោក សួន រ៉ោន អាយុ ៤៨ឆ្នាំ បានស្លាប់។ លោកគឺជាពលរដ្ឋនៅកំពេញ ឃុំយាង ស្រុកជាំក្សាន្ត ខេត្តព្រះវិហារ។
ឆ្លើយតបទៅនឹងសំណួរនៅលើបណ្ដាញសង្គមដែលសួរថា កម្ពុជាបានត្រៀមខ្លួនហើយនៅខណៈដែលថៃបានត្រៀមប្រើយន្តហោះចម្បាំង លោក ហ៊ុន សែន បញ្ជាក់ថា៖ «សំណួរនេះគ្រាន់តែជាពាក្យអុចអាលទេ ប៉ុន្តែ បើជារឿងពិត កម្ពុជាក៏សុំប្រាប់ត្រឡប់ទៅវិញថា កម្ពុជាបានត្រៀមអាវុធបាញ់ហោះហើយ តែប៉ុណ្ណឹងទេ ខ្ញុំប្រាប់ទៅអ្នក comment»។ លោកបន្តថា៖ «រៀបចំរួចហើយ កាំភ្លើងសម្រាប់បាញ់យន្តហោះនោះ»។
ពិធីបុណ្យសពពលទាហាន លោក សួន រ៉ោន ដែលបានស្លាប់ក្នុងការប៉ះទង្គិច កាលពីថ្ងៃទី២៨ ឧសភា។ មន្ទីរព័ត៌មានខេត្តព្រះវិហារ
លោក ហ៊ុន សែន រំពឹងថា សភាពការណ៍ដែលមានភាពតានតឹងនៅមុំបី មិនអាចរាលដាលទៅតំបន់ផ្សេងទេ ដូចជានៅប្រាសាទតាមាន់ ប្រាសាទតាក្របី និងប្រាសាទព្រះវិហារ និងទូទាំងព្រំដែន។ ទិដ្ឋភាពយោធា ឲ្យវានៅត្រឹមហ្នឹង កុំឲ្យវាពាក់ព័ន្ធនឹងយោធារួម។
លោកបញ្ជាក់ថា៖ «ខ្ញុំសង្ឃឹមថា រាជរដ្ឋាភិបាលថៃ ថ្នាក់ដឹកនាំថៃក៏មានចិត្តគំនិតដូចខាងកម្ពុជាដែរ គឺចង់ពង្រឹងទំនាក់ទំនងជិតខាងល្អ។ ទស្សនកិច្ចនៅខែមេសាកន្លងទៅរបស់នាយករដ្ឋមន្ត្រី Paetongtarn Shinawatra ក៏បាននាំមកនូវផ្លែផ្កាបន្ថែមទៀតនៃកិច្ចសហប្រតិបត្តិការ មិនគួរត្រូវមានរឿងបែបនេះទេ»។
លោកថា កម្ពុជានៅតែចង់បានការកសាងខ្សែព្រំដែនមួយជាខ្សែព្រំដែនសន្តិភាព មិត្តភាព សហប្រតិបត្តិការ និងការអភិវឌ្ឍ៕
.jpg)
