ក្រចេះ: បទល្មើសនេសាទខុសច្បាប់នៅតំបន់អភិរក្សផ្សោត កាំពី ក្នុងខេត្តក្រចេះមានការថយចុះ ខណៈ ពេលដែលចំនួនសត្វផ្សោតទន្លេមេគង្គរួមទាំងនៅក្នុងខេត្តស្ទឹងត្រែងផងនោះ មានការកើនឡើង ហើយករណីស្លាប់ទៅវិញក៏ពុំទាន់កើតមាន។

ក្នុងរយៈពេល៥ខែ នៃឆ្នាំ២០២៥នេះ បទល្មើសនេសាទនៅកាំពី មាន​ការ​ថយចុះ បើធៀបនឹងកាលពី​៥ខែមុន​ក្នុង​ឆ្នាំ​២០២៤ កន្លងទៅនេះ។ ការបង្ហាញរបាយការណ៍ នៃការ​បង្រ្កាប​បទ​ល្មើសនៅតំបន់កាំពីនេះ ត្រូវបានធ្វើឡើង ដោយលោក ម៉ុក ពន្លក នាយខណ្ឌរដ្ឋបាលជលផលខេត្តក្រចេះ នៅក្នុងកម្មវិធីជួបសំ​ណេះសំណាល​ជាមួយឆ្មាំទន្លេកាំពី ដែលដឹកនាំដោយ អនុរដ្ឋលេខាធិការ​ក្រសួងកសិកម្ម រុក្ខាប្រមាញ់ និងនេសាទ កញ្ញា អ៊ឹម រចនា។

ក្រសួងកសិកម្មបានឱ្យដឹងកាលពីថ្ងៃទី២៩ ខែឧសភាថា បទល្មើសក្នុងរយៈពេល៥ខែ នៃឆ្នាំ២០២៥នេះមានដូចជា បង្រ្កាបបានទូកម៉ាស៊ីនចំនួន៣គ្រឿង អាំងវ័កទ័រឆក់ត្រីចំនួន៣០គ្រឿង អាគុយ២គ្រឿង ភ្ជាប់ដោយខ្សែភ្លើងចំនួន៥០ម៉ែត្រ និងដកហូតមងសន្ទូចរនង១៣៦ខ្សែ។

ក្រៅពីនោះ ក៏មានការចេញលិខិតកោះហៅអ្នកឆក់ខុសច្បាប់បានចំនួន ១៧ករណី និងបាន​អប់រំ​អ្នក​នេសាទចំនួន៣១នាក់ផងដែរ។

តំបន់គ្រប់គ្រងការពារ​ផ្សោត​នេះ មានប្រវែង៨៥គីឡូម៉ែត្រ ដែលគិតចាប់ពីទីរួមខេត្តស្ទឹងត្រែង រហូតដល់ខេត្តក្រចេះ។ ក្នុងតំបន់នេះមានឆ្មាំទន្លេសរុបចំនួន៤៤រូប ដែលកំពុងឈរជើងអភិរក្សជីវចម្រុះ ការពារសត្វផ្សោត ដោយទទួលបានការគាំទ្រពីរដ្ឋាភិបាល តាមរយៈក្រសួងកសិកម្ម រដ្ឋបាលជលផល អាជ្ញាធរខេត្ត និងអង្គការ WWF-កម្ពុជា។

សត្វផ្សោតនៅតំបន់អភិរក្សអន្លង់កាំពី ក្នុងខេត្តក្រចេះ ដែលមានចំនួនកូនផ្សោតកើតថ្មីរហូតដល់ទៅ៥ក្បាលក្នុងរយៈពេល៥ខែ នៃឆ្នាំ២០២៥នេះ។ រូបថត ក្រសួងកសិកម្ម

លោកម៉ុក ពន្លក ដែលជាប្រធានឆ្មាំអភិរក្សសត្វផ្សោតទន្លេមេគង្គប្រចាំខេត្តក្រចេះ រួមនិងឆ្មាំអភិរក្សសត្វ​ផ្សោតទាំងអស់បានលើកឡើង ពីការប្តេជ្ញាចិត្ត​រួមគ្នា​ ក្នុងការអភិរក្សធនធានជលផល និងជីវៈចម្រុះ ជាពិសេសសត្វផ្សោត ដែលជា​ធនធានរតនសម្បត្តិរបស់ជាតិ ដោយធ្វើយ៉ាងណាទប់ស្កាត់បទល្មើស​នេសាទខុសច្បាប់​ឱ្យបានជាអតិបរមា ដើម្បីធានានិរន្តរភាពសត្វផ្សោតក្នុងទន្លេមេគង្គ​ឱ្យឋិតថេរគង់វង្ស​សម្រាប់​កូនចៅជំនាន់ក្រោយ។

ក្រសួងកសិកម្មកាលពីចុងសប្តាហ៍មុន បានប្រកាសពីការប្រទះឃើញកូនផ្សោតថ្មី១ក្បាល នៅអន្លង់កាំពី ស្ថិតក្នុងភូមិជ្រោយបន្ទាយ ឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ ដែលធ្វើឱ្យចំនួនសត្វផ្សោតទន្លេមេគង្គនៅកម្ពុជា កើនដល់ ១១១ក្បាល។

គិតត្រឹម ថ្ងៃទី២៥ ខែឧសភា ក្នុងឆ្នាំ២០២៥នេះ កម្ពុជាទទួលបានកូនផ្សោតកើតថ្មីចំនួន ៧ក្បាល។ ក្នុងនោះ៥ក្បាល កើតនៅខេត្តក្រចេះ និង២ក្បាលនៅខេត្តស្ទឹងត្រែង។ ប៉ុន្តែមិនទាន់​មានករណីផ្សោតស្លាប់នៅឡើយទេ។

ឆ្មាំទន្លេចំនួន៧២រូប ទាំងនៅខេត្តស្ទឹងត្រែង និងក្រចេះ កំពុងតែចូលរួមអភិរក្សសត្វផ្សោតទន្លេមេគង្គ។ កាលពីខែកុម្ភៈ កន្លងមក  ឆ្មាំទន្លេនៅតំបន់ការពារសត្វផ្សោតទន្លេមេគង្គនេះចំនួន៣រូប ត្រូវរដ្ឋបាលខេត្តក្រចេះបញ្ចប់តួនាទី បន្ទាប់ពីរកឃើញថា ពួកគេមានជាប់ពាក់ព័ន្ធនឹងការបើកដៃឱ្យមានបទល្មើសនេសាទខុសច្បាប់ក្នុងតំបន់អភិរក្សនេះ។

នាយខណ្ឌរដ្ឋបាលជលផលខេត្តក្រចេះ លោកម៉ុក ពន្លក ថ្លែងក្នុងកម្មវិធីជួបសំណេះសំណាលជាមួយឆ្មាំទន្លេកាំពី ដែលដឹកនាំដោយ អនុរដ្ឋលេខាធិការក្រសួងកសិកម្ម កញ្ញា អ៊ឹម រចនា។ រូបថត ក្រសួងកសិកម្ម

ក្រសួងបានលើកឡើងថា ការជួបសំណេះសំណាល់របស់កញ្ញាអ៊ឹម រចនា ជាមួយមន្ត្រីឆ្មាំទន្លេនេះ គឺដើម្បីពង្រឹង បង្កើនប្រសិទ្ធភាពការងារអភិរក្ស​សត្វផ្សោតតំបន់កាំពី។

ក្នុងឱកាសនោះ ឆ្មាំអ្នកចូលរួមទាំងអស់ ត្រូវបានបានផ្តល់​ឱកាសឱ្យលើកឡើងពីបញ្ហា​ប្រឈមនៅក្នុងការអនុវត្តការងារ ដើម្បីរួមគ្នាដោះស្រាយផងដែរ។

ក្រសួងកសិកម្មបានបន្តលើកទឹកចិត្ត ដល់មន្រ្តីឆ្មាំ ត្រូវធ្វើការដោយស្មោះត្រង់ មានឆន្ទៈខ្ពស់ ទើបអាចសម្រេចបាននូវប្រសិទ្ធភាព និងប្រសិទ្ធផលនៃការងារ៕

សត្វផ្សោតនៅតំបន់អភិរក្សអន្លង់កាំពី ក្នុងខេត្តក្រចេះ ដែលមានចំនួនកូនផ្សោតកើតថ្មីរហូតដល់ទៅ៥ក្បាលក្នុងរយៈពេល៥ខែ នៃឆ្នាំ២០២៥នេះ។ រូបថត ក្រសួងកសិកម្ម