លោក ឈាង រ៉ា រដ្ឋមន្ត្រីក្រសួងសុខាភិបាល ថ្លែងក្នុងពិធីប្រកាសដាក់ឱ្យអនុវត្តជាផ្លូវការ «ផែនការជាតិប្រយុទ្ធនឹងជំងឺមហារីក ២០២៥-២០៣០» នៅព្រឹកថ្ងៃទី៥ ខែឧសភា។ STPM
នៅកម្ពុជា ជារៀងរាល់ឆ្នាំ មានករណីជំងឺមហារីកថ្មីប្រមាណ ២ម៉ឺនករណី ហើយការស្លាប់ពីជំងឺនេះមានប្រមាណ ១ម៉ឺន ៤ពាន់នាក់ក្នុងមួយឆ្នាំៗ។ ចំនួននេះអាចតិចជាងនៅប្រទេសផ្សេង ប៉ុន្តែជាតួលេខខ្ពស់ធៀបនឹងចំនួនប្រជាជន ១៧លាននាក់។
លោក ឈាង រ៉ា រដ្ឋមន្ត្រីក្រសួងសុខាភិបាលថ្លែងនៅក្នុងពិធីប្រកាសដាក់ឱ្យអនុវត្តជាផ្លូវការ «ផែនការជាតិប្រយុទ្ធនឹងជំងឺមហារីក ២០២៥-២០៣០» នៅព្រឹកថ្ងៃទី៥ ខែឧសភាថា តួលេខនៃករណីថ្មីនិងករណីស្លាប់ប្រចាំឆ្នាំឆ្លុះបញ្ចាំងពីភាពបន្ទាន់ក្នុងការចាត់វិធានការទប់ស្កាត់។
លោកថា៖ «ជាបឋម ឧប្បត្តិហេតុនៃករណីប្រមាណ ២ម៉ឺនករណីក្នុងមួយឆ្នាំនេះ បើប្រៀបធៀបនឹងប្រទេសជឿនលឿនជាងយើង ឧប្បត្តិហេតុនេះហាក់បីដូចជាមានកម្រិតទាបគួរសម។ ប៉ុន្តែតាមពិត មានការពន្យល់មួយផ្នែកថាការស្រាវជ្រាវនេះនៅមិនទាន់គ្រប់គ្រាន់ ហើយករណីខ្លះក៏មិនទាន់ត្រូវបានធ្វើរោគវិនិច្ឆ័យនៅឡើយ»។
លោកបន្តថា៖ «បាតុភូតផ្សេងទៀត អត្រាមរណៈបង្កដោយមហារីក មនុស្សស្លាប់ជិត១ម៉ឺន ៤ពាន់នាក់ក្នុងមួយឆ្នាំ ស្មើនឹងអត្រាខ្ពស់លើស ៧០ភាគរយ ពីព្រោះអត្រាជាមធ្យមនៅលើពិភពលោកគឺ ៤៨ភាគរយ។ អត្រាមរណភាពដោយសារជំងឺមហារីកនេះមានន័យថា មានមនុស្សស្លាប់ម្នាក់ដោយសារជំងឺមហារីករៀងរាល់ ៤០នាទីម្ដងនៅកម្ពុជា ឬប្រមាណ ៣៨នាក់ក្នុងមួយថ្ងៃ ធ្វើឲ្យគ្រួសារជាច្រើនធ្លាក់ទៅក្នុងទុក្ខលំបាក បន្សល់ទុកនូវកូនកំព្រា បុរសពោះម៉ាយ ស្ត្រីមេម៉ាយទុរគត»។
លោកបន្តថា សោកនាដកម្មនៃជំងឺមហារីកក៏មានទៅលើកុមារផងដែរ ដែលក្នុងមួយឆ្នាំៗមានកុមារប្រមាណ៦០០នាក់បានកើតជំងឺមហារីក។ នៅលើពិភពលោក ៨០ភាគរយនៃជំងឺមហារីកលើកុមារអាចព្យាបាលបានជាសះស្បើយ ប៉ុន្តែ នៅកម្ពុជា ការព្យាបាលជាសះស្បើយ មានក្រោម ២០ភាគរយ។
លោកបន្តថា ប្រសិនបើស្ថានភាពបច្ចុប្បន្នមិនត្រូវបានធ្វើឲ្យប្រសើរឡើងនោះទេ មនុស្សគ្រប់វ័យចំនួន ២១ម៉ឺននាក់នៅក្នុងរយៈពេល ១៥ឆ្នាំទាំងមុខ។
លោករដ្ឋមន្ត្រីសុខាភិបាល ថ្លែងថាផែនការយុទ្ធសាស្ត្រថ្មីដាក់ចេញក្នុងគោលបំណងលើកកម្ពស់កាងបង្ការបឋមនៃជំងឺមហារីក, ស្រាវជ្រាវរកឲ្យឃើញជំងឺមហារីកនៅដំណាក់កាលដំបូងដើម្បីព្យាបាលបានទាន់ពេលវេលា, ធានានិរន្តរភាពនិងសមធម៌ក្នុងការទទួលបានសេវាធ្វើរោគវិនិច្ឆ័យត្រឹមត្រូវ ការទទួលបានការព្យាបាល ដែលសមស្របនឹងមានគុណភាព, ពង្រឹងប្រព័ន្ធព័ត៌មាននិងតាមដាននៃជំងឺមហារីក និងការពង្រឹងអភិបាលកិច្ច ការសម្របសម្រួលនិងការត្រៀមខ្លួននៅពេលមានការប្រយុទ្ធនឹងជំងឺមហារីក។
បើតាមលោក ឈាង រ៉ា មហារីកមាត់ស្បូនជាជំងឺមហារីកភាគច្រើនសម្រាប់ស្ត្រី ខណៈដែលបុរសភាគច្រើនមានជំងឺមហារីកថ្លើមដែលភាគច្រើនបណ្ដាលមកពីជំងឺរលាកថ្លើមប្រភេទ B ដែលអាចចាក់ថ្នាំការពារតាំងពីរកំណើត និង មហារីកក្រពះដែលបណ្ដាលពីអនាម័យមិនល្អនៅវ័យកុមារ។
លោកនាយករដ្ឋមន្ត្រី ហ៊ុន ម៉ាណែត ស្នើឲ្យក្រសួងសុខាភិបាល និងក្រសួងពាក់ព័ន្ធរិះរកវិធីដើម្បីកាត់បន្ថយចំនួនករណីថ្មីឲ្យថយចុះពីប្រមាណ ២ម៉ឺនករណីក្នុងមួយឆ្នាំ មកនៅត្រឹមពាន់ករណី។ លោកលើកទឹកចិត្តឲ្យគ្រប់គ្រងលើគុណភាពអាហារ ហាមឃាត់គ្រឿងដែលរួមចំណែកដល់ការកើតជំងឺមហារីក និងលើកទឹកចិត្តឲ្យប្រជាពលរដ្ឋលេងកីឡាឲ្យបានច្រើន៕
.jpg)
