ទិដ្ឋភាពអ្នកដំណើរនៅក្នុងអាកាសយានដ្ឋានអន្តរជាតិភ្នំពេញ កាលពីពេលថ្មីៗនេះ។ ហ៊ឹន ពិសី
ស្ថានភាពវិស័យអាកាសចរណ៍កម្ពុជាបានបន្តភាពវិជ្ជមានគួរឱ្យកត់សម្គាល់ ដោយក្នុងរយៈពេល ៤ ខែដើមឆ្នាំ ២០២៥ នេះ មានជើងហោះហើរចេញ-ចូល(ទ្វេទិស)ឆ្លងកាត់ជាង ២,២ ម៉ឺនជើង ខណៈអ្នកដំណើរមានចំនួនជាង ២,៥លាននាក់។ នេះបើតាមរដ្ឋលេខាធិការដ្ឋានអាកាសចរណ៍ស៊ីវិល(SSCA)។
របាយការណ៍វឌ្ឍនភាពវិស័យដឹកជញ្ជូនតាមផ្លូវអាកាសរបស់រដ្ឋលេខាធិការដ្ឋានអាកាសចរណ៍ស៊ីវិលកម្ពុជា ដែលភ្នំពេញប៉ុស្តិ៍ទទួលបាននារសៀលថ្ងៃទី៨ ខែឧសភា បង្ហាញថា ចាប់ពីខែមករា ដល់ខែមេសា ឆ្នាំ២០២៥ វិស័យដឹកជញ្ជូនតាមផ្លូវអាកាសរបស់អាកាសយានដ្ឋានអន្តរជាតិទាំង ៣ នៅកម្ពុជា(អាកាសយានដ្ឋានអន្តរជាតិភ្នំពេញ សៀមរាប និងខេត្តព្រះសីហនុ) បានកើនឡើងគួរឱ្យកត់សម្គាល់ ដោយមានជើងហោះហើរចេញ-ចូល(ទ្វេទិស)សរុប ២២ ៦៨៦ជើង កើនឡើង ១៧ភាគរយបើធៀបនឹងរយៈពេលដូចគ្នាក្នុងឆ្នាំ ២០២៤។ សម្រាប់អ្នកដំណើរចេញ-ចូល(ទ្វេទិស) មានចំនួន ២ ៥២៥ ២០៨នាក់ កើនឡើង ១៨ភាគរយ និងទំនិញដឹកជញ្ជូនតាមផ្លូវអាកាសចេញ-ចូល(ទ្វេទិស) មានសរុប ២២ ៣៥០តោន កើនឡើង ៨ ភាគរយ។
របាយការណ៍ឱ្យដឹងទៀតថា សម្រាប់ខែមេសា ឆ្នាំ២០២៥ គឺមានជើងហោះហើរ(ទ្វេទិស) ៥ ២៥២ជើង កើនឡើងជិត ១២ ភាគរយបើធៀបខែមេសា ឆ្នាំ២០២៤, អ្នកដំណើរចំនួន ៥៦៤ ៥៧៣នាក់ កើនជាង ១៥ ភាគរយ និងទំនិញឆ្លងកាត់ ៥ ២០២តោន កើនជិត ៣ ភាគរយ។
រដ្ឋលេខាធិការ និងជាអ្នកនាំពាក្យនៃរដ្ឋលេខាធិការដ្ឋានអាកាសចរណ៍ស៊ីវិល លោក ស៊ីន ចាន់សិរីវុត្ថា បានប្រាប់ភ្នំពេញប៉ុស្តិ៍ថា ចរន្តនៃការធ្វើដំណើរ និងការដឹកជញ្ជូនទំនិញតាមផ្លូវអាកាសនៅអាកាសយានដ្ឋានអន្តរជាតិទាំង ៣ របស់កម្ពុជាបានបន្តវិជ្ជមានជាបន្តបន្ទាប់។ បច្ចុប្បន្នកម្ពុជាមានជើងហោះហើរអន្តរជាតិទៅកាន់ ១២ ប្រទេស ដែលស្មើនឹងគោលដៅ(រាជធានី/ទីក្រុង) សរុបចំនួន ៣៤ នៅក្នុងតំបន់ និងសកលលោក។ បច្ចុប្បន្នមានក្រុមហ៊ុនអាកាសចរណ៍ក្នុងស្រុកចំនួន ៤ និងអន្តរជាតិចំនួន ២៨ កំពុងធ្វើប្រតិបត្តិការនៅប្រទេសកម្ពុជា។
លោកបានថ្លែងថា៖«ប្រទេសចំនួន៦ (Top 6 countries) ក្នុងចំណោមប្រទេស ១២ ដែលមានចំនួនជើងហោះហើរ និងចំនួនអ្នកដំណើរតាមផ្លូវអាកាសចេញ-ចូលកម្ពុជាច្រើនជាងគេ គឺប្រទេសថៃ ចិន វៀតណាម សិង្ហបុរី ម៉ាឡេស៊ី និងប្រទេសកូរ៉េ»។
វិស័យអាកាសចរណ៍កម្ពុជា ត្រូវបានរំពឹងថានឹងបន្តវឌ្ឍនភាពរបស់ខ្លួនបន្ថែមទៀត ដោយនៅថ្ងៃទី១០ ខែកក្កដា ខាងមុខ អាកាសយានដ្ឋានអន្តរជាតិតេជោ ដែលជាអាកាសយានដ្ឋានលំដាប់ 4F គ្រោងនឹងបើក(មិនទាន់ផ្លូវការ)ទទួលការចុះចតរបស់យន្តហោះនានា។ អាកាសយានដ្ឋានថ្មីនេះនឹងត្រូវជំនួសអាកាសយានដ្ឋានអន្តរជាតិភ្នំពេញ។
អាកាសយានដ្ឋានអន្តរជាតិខ្នាតធំលំដាប់ 4F នេះអាចអនុញ្ញាតឱ្យយន្តហោះប្រភេទធុនធំៗដូចជា Airbus A380-800 និង យន្តហោះ Boeing 747-800 ចុះចតបាន។ អាកាសយានដ្ឋាននេះរចនាឡើងជា ៣ ដំណាក់កាល ដោយដំណាក់កាល១ ពីឆ្នាំ២០២០ ដល់២០៣០ អាចទទួលភ្ញៀវបានចំនួន ១៥ លាននាក់, ដំណាក់កាលទី ២ ឆ្នាំ២០៣០ ដល់ឆ្នាំ២០៥០ ទទួលភ្ញៀវបាន ៣០ លាននាក់ និងដំណាក់កាលពី ៣ ចាប់ពីឆ្នាំ២០៥០ អាចទទួលភ្ញៀវបាន ៤៥ លាននាក់។
កាលពីឆ្នាំ ២០២៤ អាកាសយានដ្ឋានអន្តរជាតិទាំង ៣ របស់កម្ពុជា ទទួលបានជើងហោះហើរចេញ-ចូល(ទ្វេទិស) សរុប ៥៨ ៣៥៤ កើនឡើង ១៤ ភាគរយបើធៀបនឹងឆ្នាំ ២០២៣ និងអ្នកដំណើរឆ្លងកាត់ចេញ-ចូល(ទ្វេទិស) មានចំនួន ៦ ២៤១ ៨៤២ នាក់ កើនឡើង ២២ ភាគរយ។ ចំណែកទំនិញដឹកជញ្ជូនតាមផ្លូវអាកាសចេញ-ចូល(ទ្វេទិស) មានចំនួន ៧៧ ៧៥២តោន កើនឡើង ៤០ ភាគរយ។ នេះបើតាម SSCA៕
.jpg)
