ប្រជាពលរដ្ឋទៅទស្សនាព្រឹត្តិការណ៍សមរាត្រី នៅខែមីនា ឆ្នាំ២០២៥។ អាជ្ញាធរជាតិអប្សរា
ភ្ញៀវបរទេសជាង ១,៨លាននាក់បានចូលមកប្រទេសកម្ពុជានៅក្នុងត្រីមាសទី១ ឆ្នាំ២០២៥ កើនជាង ១៦ភាគរយបើធៀបនឹងរយៈពេលដូចគ្នាក្នុងឆ្នាំ២០២៤ ខណៈអាជ្ញាធរជាតិអប្សរាទើបប្រកាសដាក់ឱ្យប្រើប្រាស់សាកល្បងកម្មវិធី«Visit Angkor»។
ទិន្នន័យស្ថិតិភ្ញៀវបរទេសដែលផ្សព្វផ្សាយដោយក្រសួងទេសចរណ៍ កាលពីថ្ងៃទី៨ ខែឧសភា ឱ្យដឹងថា ចន្លោះពីខែមករា ដល់ខែមីនា ឆ្នាំ២០២៥ មានភ្ញៀវបរទេសចូលមកកម្ពុជាសរុប ១,៨៤លាននាក់ កើនឡើង ១៦,១ភាគរយបើធៀបនឹងរយៈពេលដូចគ្នាក្នុងឆ្នាំ២០២៤។ ក្នុងនោះភ្ញៀវមកពីប្រទេសថៃមានចំនួនច្រើនជាងគេ គឺ ៥០១ ៦៦៦នាក់ កើនឡើង ១៩,៥ភាគរយ, វៀតណាម ៣០៤ ៦៣៤នាក់ កើន ១,៨ភាគរយ, ចិន ២៨៦ ១៥៦នាក់ កើន ៥០,៦ភាគរយ និងបណ្តាប្រទេសមួយចំនួនទៀតដូចជា អាមេរិក ឡាវ កូរ៉េ បារាំង ចក្រភពអង់គ្លេស ឥណ្ឌូនេស៊ី និងជប៉ុន ជាដើម។
ក្រសួងបានឱ្យដឹងទៀតថា សម្រាប់ភ្ញៀវទាំងអស់ខាងលើ គឺមកកម្ពុជាតាមរយៈផ្លូវគោក ប្រមាណ ១,០១លាននាក់, ផ្លូវអាកាស ៧៨៩ ៣៨៤នាក់ និងផ្លូវទឹក ៣២ ២០៣នាក់។
ក្នុងគោលបំណងលើកស្ទួយវិស័យទេសចរណ៍ក្នុងខេត្តសៀមរាប និងលើកតម្លៃរមណីយដ្ឋានអង្គរ អាជ្ញាធរជាតិអប្សរា ទើបបានបង្កើតកម្មវិធីមួយដែលមានឈ្មោះថា «Visit Angkor» ដោយអ្នកប្រើប្រាស់អាចទាញយកកម្មវិធីនេះមកប្រើប្រាស់តាមរយៈ App Store ឬ Play Store ឬតាមរយៈ QR Code។
សេចក្តីជូនដំណឹងរបស់អាជ្ញាធរជាតិអប្សរា កាលពីថ្ងៃទី៦ ខែឧសភា ឆ្នាំ២០២៥ ឱ្យដឹងថា កម្មវិធី«Visit Angkor» មានមុខងារសំខាន់ៗចំនួន ៣ រួមមាន ១.មុខងារប្រាសាទៈ ផ្តល់ព័ត៌មានអំពីប្រវត្តិប្រាសាទ ខ្សែទស្សនា ចំណុចទាក់ទាញក្នុងប្រាសាទនីមួយៗ ផែនទីប្រាសាទ និងសម្បទាទេសចរណ៍នានាដូចជា បន្ទប់ទឹក ចំណត និងមជ្ឈមណ្ឌលផ្តល់ព័ត៌មាន, ២.មុខងារក្រៅពីប្រាសាទ: ផ្តល់ព័ត៌មានអំពីព្រឹត្តិការណ៍ប្រចាំឆ្នាំ សារមន្ទីរ សហគមន៍ទេសចរណ៍ និងកន្លែងកម្សាន្តល្បីៗក្នុងខេត្តសៀមរាប, និង ៣.មុខងារក្រមប្រតិបត្តិ: ផ្តល់ព័ត៌មានអំពីសកម្មភាពដែលគួរចៀសវាងនៅពេលចូលទស្សនារមណីយដ្ឋានអង្គរ។
សេចក្តីជូនដំណឹងបានសរសេរទៀតថា៖«ក្រៅពីមុខងារសំខាន់ៗខាងលើ កម្មវិធីក៏នឹងមានជូនដំណឹងជាប្រចាំអំពីសកម្មភាពការងាររបស់អាជ្ញាធរជាតិអប្សរា ព្រឹត្តិការណ៍ប្រចាំឆ្នាំ មធ្យោបាយក្នុងការទំនាក់ទំនងទៅកាន់អាជ្ញាធរមានសមត្ថកិច្ចដែលអាចជួយសម្រួល និងជួយសង្គ្រោះក្នុងករណីភ្ញៀវមានបញ្ហាអំឡុងពេលទស្សនាប្រាសាទក្នុងរមណីយដ្ឋានអង្គរ ព្រមទាំងមានចំណុចចូលរួមផ្តល់ជាមតិយោបល់ ដែលអាចអនុញ្ញាតឱ្យអ្នកប្រើប្រាស់ផ្ញើសារជាសម្ងាត់មកកាន់ក្រុមការងារក្នុងន័យផ្តល់ការកែលម្អ និងស្ថាបនាលើសកម្មភាពការងាររបស់អាជ្ញាធរជាតិអប្សរាដូចជា បញ្ហាអនាម័យ និងបរិស្ថានជាដើម»។
ប្រធានសមាគមមគ្គុទ្ទេសក៍ទេសចរអង្គរ លោក ខៀវ ធី បានបង្ហាញការស្វាគមន៍ចំពោះការដាក់ឱ្យប្រើប្រាស់កម្មវិធី«Visit Angkor» និងបានចាត់ទុកថានឹងជួយបង្កភាពងាយស្រួលកាន់តែច្រើនទៅដល់ភ្ញៀវទេសចរ ឬអ្នកចង់ស្វែងយល់អំពីប្រាសាទបុរាណក្នុងខេត្តសៀមរាប។ កម្មវិធីតាមប្រព័ន្ធអនឡាញ មិនត្រឹមតែជួយឱ្យអ្នកមានតម្រូវការ អាចធ្វើការស្វែរកព័ត៌មាន ឬបំពេញឯកសារពីចម្ងាយប៉ុណ្ណោះទេ ប៉ុន្តែក៏ជួយកាត់បន្ថយការចំណាយបានច្រើនផងដែរ។
លោកប្រាប់ទៀតថា ការដាក់ឱ្យដំណើរការកម្មវិធីតាមប្រព័ន្ធអនឡាញរបស់អាជ្ញាធរជាតិអប្សរា គឺមិនមែនជាលើកទី១ ទេ ដោយកន្លងមកក៏បានដាក់ឱ្យដំណើរការការទិញសំបុត្រចូលទស្សនារមណីយដ្ឋានអង្គរផងដែរ។
លោកបានប្រាប់ភ្នំពេញប៉ុស្តិ៍ថា៖«ការបង្កភាពងាយស្រួលទៅដល់ភ្ញៀវ គឺជាផ្នែកមួយនៃការលើកទឹកចិត្ត និងទាក់ទាញចំណាប់អារម្មណ៍ភ្ញៀវឱ្យមកទស្សនាតំបន់ប្រាសាទបុរាណក្នុងខេត្តសៀមរាមកាន់តែច្រើន»។
ទិន្នន័យរបស់គ្រឹះស្ថានអង្គរ(Angkor Enterprise)ឱ្យដឹងថា ចាប់ពីខែមករា ដល់ខែមេសា ឆ្នាំ២០២៥ មានភ្ញៀវទេសចរបរទេស ៤៧៤ ៨១០នាក់បានទិញសំបុត្រចូលទស្សនារមណីយដ្ឋានអង្គរ ដែលជួយឱ្យអង្គភាពមួយនេះរកចំណូលបានប្រមាណ ២២,២លានដុល្លារ កើនឡើង ១១,៥ភាគរយបើធៀបរយៈពេលដូចគ្នាក្នុងឆ្នាំ២០២៤៕
.jpg)
