បាត់ដំបង៖ មហោស្រពសិល្បៈទីក្រុងស្អាត កំពុងក្លាយជាព្រឹត្តិការណ៍ដ៏សំខាន់មួយសម្រាប់ខេត្តបាត់ដំបង ដោយឆ្លុះបញ្ចាំងពីគោលដៅបេតិកភណ្ឌសិល្បៈដ៏សម្បូរបែប។
ជាមួយនឹងមហោស្រពសិល្បៈលើកទី៤ ដែលគ្រោងនឹងធ្វើឡើងនៅថ្ងៃទី៣ ដល់ទី៨ ខែវិច្ឆិកា ឆ្នាំ ២០២៥ ខាងមុខ លើសពីការតាំងបង្ហាញស្នាដៃសិល្បៈ វាគឺជាចលនាវប្បធម៌ដែលអាចផ្ដល់បទពិសោធន៍ថ្មីសម្រាប់ប្រជាជនកម្ពុជា។
រៀបចំឡើងដោយ ហ្វារពន្លឺសិល្បៈ សហការជាមួយមូលនិធិ TUI Care មហោស្រពនេះមានការតាំងបង្ហាញផ្ទាំងគំនូរខ្នាតធំ ការសម្ដែងផ្ទាល់ ការតាំងពិព័រណ៍ សិក្ខាសាលា និងក្បួនដង្ហែរសិល្បៈដ៏ល្បីល្បាញ ឆ្លងកាត់ទីប្រជុំជនបេតិកភណ្ឌខេត្តបាត់ដំបង។
ប្រធានបទឆ្នាំនេះ «វប្បធម៌ចម្រុះពណ៌» ស្ថិតបេសកកម្មមហោស្រពឆ្នាំនេះ មានបំណងជំរុញការស្រឡាញ់វប្បធម៌ និងការចូលរួមពីសិល្បករខ្មែរ និងអន្តរជាតិដើម្បីបង្កើតការសន្ទនាជាសកលតាមរយៈសិល្បៈ។
លោក Osman Khawaja នាយកប្រតិបត្តិនៃអង្គការហ្វាពន្លឺសិល្បៈ បានសង្កត់ធ្ងន់ថា មហោស្រពនេះដើរតួនាទីយ៉ាងសំខាន់ក្នុងការប្រែក្លាយទីធ្លាសាធារណៈទៅជាវេទិកាសម្រាប់ការបញ្ចេញមតិវប្បធម៌។
លោកបានប្រាប់ភ្នំពេញប៉ុស្តិ៍ថា៖ «មហោស្រពសិល្បៈទីក្រុងស្អាតផ្តល់សិទ្ធិអំណាចដល់សិល្បករអាចប្រើប្រាស់កន្លែងសាធារណៈ និងប្រែក្លាយតំបន់បេតិកភណ្ឌទៅជាផ្ទាំងក្រណាត់សម្រាប់ការស្នាដៃវប្បធម៌ ដែលក្លាយជាការទាក់ទាញភ្ញៀវជាតិ និងអន្ដរជាតិ»។
ការផ្លាស់ប្តូរនេះអាចមើលឃើញនៅក្នុងផ្ទាំងគំនូរដែលនឹងត្រូបានរៀបចំតាមគោលដៅជាច្រើនក្នុងទីក្រុង ដែលមិនត្រឹមតែធ្វើឱ្យខេត្តបាត់ដំបងមានភាពស្រស់ស្អាតប៉ុណ្ណោះទេ ប៉ុន្តែថែមទាំងផ្តល់នូវកន្លែងស័ក្តិសមសម្រាប់ថតរូបបង្ហោះលើ Instagram ដែលទាក់ទាញចំនួនអ្នកទស្សនាកាន់តែច្រើនឡើង។
លើសពីផ្ទាំងគំនូរ មហោស្រពនេះផ្តល់ឱកាសឱ្យទទួលបានបទពិសោធន៍ប្រទេសកម្ពុជាពីទស្សនៈថ្មី លើសពីប្រាសាទ និងសោកនាគកម្មប្រវត្តិសាស្ត្រខ្មែរក្រហម។
លោក Khawaja បានឱ្យដឹងថា៖ «មហោស្រពសិល្បៈទីក្រុងស្អាត ផ្តល់ឱ្យអ្នកទស្សនានូវឱកាសដើម្បីភ្ជាប់ជាមួយនឹងអត្តសញ្ញាណវប្បធម៌ដែលកំពុងវិវត្តរបស់កម្ពុជា។ វាបង្កើតវេទិកាសម្រាប់ការសន្ទនាប្រកបដោយអត្ថន័យ កិច្ចសហការ និងការចែករំលែករឿងរ៉ាវចម្រុះ ដែលធ្វើឱ្យវាក្លាយជាបទពិសោធន៍រួមសម្រាប់ទាំងអ្នកស្រុក និងអ្នកទេសចរ»។
ខេត្តបាត់ដំបងបានត្រៀមខ្លួនជាស្រេចដើម្បីបន្តដំណើររបស់ខ្លួនជាមជ្ឈមណ្ឌលវប្បធម៌ ប្រពៃណី និងភាពទំនើប ហើយផ្តល់ជូននូវទិសដៅបំផុសគំនិតសម្រាប់អ្នកធ្វើដំណើរដែលស្វែងរកបទពិសោធន៍ប្រកបដោយភាពច្នៃប្រឌិត និងពិតប្រាកដនៅកម្ពុជា៕
Photos: Diversified arts show turn Battambang into cultural hub. Supplied
.jpg)
