លោក លី ធុជ និង ឯកអគ្គរដ្ឋទូតឥណ្ឌា ចូលរួមពិធីប្រកាសស្រុកស្រែអំបិលជាស្រុកអស់មីននៅថ្ងៃទី១០ មិនថុនា។ អាជ្ញាធរមីន
ស្រុកស្រែអំបិល ខេត្តកោះកុង ត្រូវបានប្រកាសជាស្រុកអស់មីននៅថ្ងៃទី១០ ខែមិថុនានេះ ក្រោមកិច្ចប្រឹងប្រែងបោសសម្អាតមីនទទួលបាន ការគាំទ្រពីជំនួយរបស់រដ្ឋាភិបាលឥណ្ឌា។
លោកទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន ថ្លែងអំណរគុណដល់រដ្ឋាភិបាល និងប្រជាជនឥណ្ឌា ដែលបានផ្តល់ការគាំទ្រដល់កិច្ចការបោសសម្អាតមីននៅក្នុងខេត្តកោះកុង ក្នុងការរួមចំណែកផ្តល់នូវដីសុវត្ថិភាព និងលើកកម្ពស់ជីវភាពរស់នៅរបស់ប្រជាពលរដ្ឋនៅតាមមូលដ្ឋាន។
លោកថ្លែងថា កិច្ចគាំត្រនេះ «បានបង្ហាញអំពីការបោះជំហានទៅមុខបន្ថែមទៀតក្នុងការពង្រឹង និងពង្រីកនូវទំនាក់ទំនង មិត្តភាព និងកិច្ចសហប្រតិបត្តិការយូរអង្វែងរវាងប្រទេសកម្ពុជា និងឥណ្ឌា ក្នុងការរួមចំណែកដល់ការអភិវឌ្ឍនៅកម្ពុជា ក៏ដូចជាគាំទ្រដល់កិច្ចខិតខំប្រឹងប្រែងរបស់រាជរដ្ឋាភិបាលក្នុងកិច្ចការបោសសម្អាតមីន»។
លោកបន្តថា កិច្ចការបោសសម្អាតមីន គឺជាការងារដ៏មានសារៈសំខាន់ និងមានការយកចិត្តទុកដាក់ខ្ពស់លោកនាយករដ្ឋមន្រ្តី ហ៊ុន ម៉ាណែត ក្នុងការធានាឱ្យប្រជាជនកម្ពុជាគ្រប់រូបទទួលបាននូវសុខសុវត្ថិភាពក្នុងប្រើប្រាស់ដី សុខសន្តិភាព និងរួចផុតពីគំរាមកំហែងដោយសារមីន និងសំណល់ជាតិផ្ទុះពីសង្រ្គាម ដូចជាកាករណីខេត្តកោះកុងនេះជាសក្ខីភាពជាក់ស្តែង។
បើតាមលោក លី ធុជ កម្ពុជាត្រូវការពេលវេលា និងធនធានជាច្រើនបន្ថែមទៀតក្នុងការដោះស្រាយបញ្ហាដែលនៅសេសសល់ ជាពិសេសត្រូវការការគាំទ្រពីប្រទេសជាមិត្ត និងដៃគូអភិវឌ្ឍន៍ រួមទាំងប្រទេសឥណ្ឌា ក្នុងការសម្រេចបាននូវចក្ខុវិស័យឆ្ពោះទៅរកកម្ពុជាមួយគ្មានផលប៉ះពាល់ដោយសារមីន និងសំណល់ជាតិផ្ទុះពីសង្រ្គាម។
ឯកអគ្គរដ្ឋទូតឥណ្ឌាប្រចាំកម្ពុជា លោក Vanlalvawna Bawitlung ថ្លែងក្នុងពិធីនេះថា លោកមានមោទនភាពដែលប្រទេសឥណ្ឌាបានរួមចំណែកចំពោះសមិទ្ធផលទាំងនោះ រហូតដល់ប្រកាសស្រុកចំនួន២ក្នុងខេត្តកោះកុង ជាស្រុកអស់មីន ក្រោមកិច្ចសហប្រតិបត្តិការរវាងកម្ពុជា និងឥណ្ឌា។ ស្រុកទី១ ដែលត្រូវបានប្រកាសថាអស់មីន គឺស្រុកបុទុមសាគរ ដែលត្រូវបានប្រកាសកាលពីចុងខែមេសា។
លោកនិយាយថា កិច្ចការបោសសម្អាតមីន មិនត្រឹមតែលប់បំបាត់ការគំរាមកំហែងដោយសារគ្រាប់មីន និងសំណល់ជាតិផ្ទុះពីសង្រ្គាម ប៉ុណ្ណោះទេ វាថែមទាំងបង្កើននូវសុខសុវត្ថិភាព និងសេចក្តីថ្លៃថ្នូរបស់មនុស្ស។
លោកបញ្ជាក់ថា៖ «រដ្ឋាភិបាលឥណ្ឌា នឹងបន្តគាំទ្រ និងផ្តល់កិច្ចសហប្រតិបត្តិការដល់កិច្ចខិតប្រឹងប្រែងរបស់រាជរដ្ឋាភិបាលកម្ពុជា ទាំងការងារបោសសម្អាតមីន និងកិច្ចសង្រ្គោះជនរងគ្រោះថ្នាក់ដោយសារមីន និងយុទ្ធភណ្ឌគ្រឿងផ្ទុះដទៃទៀត រហូតដល់ប្រទេសកម្ពុជា សម្រេចនូវគោលដៅជាប្រទេសគ្មានមីន»៕
