រដ្ឋមន្ដ្រីមហាផ្ទៃ លោក ស សុខា ដាក់បទបញ្ជាឱ្យអភិបាលខេត្ដតាមបណ្ដោយព្រំដែនថៃពង្រឹងការយកចិត្ដទុកដាក់ខ្ពស់ចំពោះសុវត្ថិភាពប្រជាពលរដ្ឋ។ រូបថត សហការី
ភ្នំពេញ៖ រដ្ឋមន្ដ្រីក្រសួងមហាផ្ទៃ លោក ស សុខា បានចេញសេចក្ដីថ្លែងការណ៍ កាលពីថ្ងៃទី១០ ខែមិថុនា ដោយចេញបទបញ្ជាឱ្យអភិបាលខេត្ដតាមបណ្ដោយព្រំដែនប្រទេសថៃទាំងអស់មានការប្រុងប្រយ័ត្នខ្ពស់ និងត្រៀមអន្ដរាគមន៍ជួយដល់ប្រជាជនក្នុងករណីសភាពការណ៍តាមព្រំដែនកាន់តែតានតឹង។
លោក ស សុខា បានឱ្យដឹងថា ក្រោយពីព្រឹត្តការណ៍នាថ្ងៃទី២៨ ខែឧសភា ឆ្នាំ២០២៥ ដែលកម្លាំងយោធាថៃបានចូលបើកការបាញ់ប្រហារមកលើលេណដ្ឋានកងទ័ពកម្ពុជា បណ្តាលឱ្យទាហានខ្មែរម្នាក់ពលីជីវិត ក្នុងភូមិតេជោមរកត ឃុំមរកត ស្រុកជាំក្សាន្ត ខេត្តព្រះវិហារ ក្រសួងមហាផ្ទៃ បានតាមដានយ៉ាងយកចិត្តទុកដាក់ និងពិនិត្យឃើញថា សភាពការណ៍នៅតាមបណ្តោយខ្សែបន្ទាត់ព្រំដែន កម្ពុជា-ថៃបានវិវត្តប្រែប្រួលកាន់តែស្មុគស្មាញ ពិបាកប៉ាន់ស្មាន និងមានភាពផុយស្រួយ ដែលអាចឈានដល់ការប្រឈមមុខដាក់គ្នាផ្នែកកម្លាំងប្រដាប់អាវុធ។
នៅក្នុងសេចក្ដីថ្លែងការណ៍ លោករដ្ឋមន្ដ្រីមហាផ្ទៃ បានសង្កត់ធ្ងន់លើតម្រូវការនៃការឆ្លើយតប និងគ្រប់គ្រង សភាពការណ៍តានតឹងនាពេលបច្ចុប្បន្នដើម្បីការពារអធិបតេយ្យភាព បូរណភាពទឹកដី និងសណ្តាប់ធ្នាប់សាធារណៈរបស់កម្ពុជា ក៏ដូចជាធានាសុវត្ថិភាព និងសុខុមាលភាពរបស់ប្រជាពលរដ្ឋនៅតាមបណ្តាខេត្តជាប់ព្រំដែន។
ពង្រឹងការល្បាតតាមបណ្ដោយព្រំដែន៖
លោក ស សុខា បានឱ្យដឹងក្នុងសេចក្ដីថ្លែងការណ៍ថា៖ «អភិបាលខេត្ដត្រូវធ្វើការណែនាំដល់កងកម្លាំងមានសមត្ថកិច្ចទាំងអស់ដែលឈរជើងនៅតាមបណ្តោយព្រំដែនឱ្យបន្តតាមដាន ទប់ស្កាត់ឱ្យបានទាន់ពេលវេលា និងកត់ត្រាឱ្យបានច្បាស់លាស់នូវ សកម្មភាពឯកតោភាគីរបស់ថៃ ដែលនាំឱ្យប្រែប្រួលបរិស្ថានតំបន់ព្រំដែន បំពានមាត្រា៥ នៃ អនុស្សរណៈនៃការយោគយល់គ្នាចុះថ្ងៃទី១៤ ខែមិថុនា ឆ្នាំ២០០០ ស្តីពីការវាស់វែងនិង ខណ្ឌព្រំសីមាព្រំដែនគោក»។
រក្សាទំនាក់ទំនងសន្ដិភាព
លោកបានបន្ដថា ខេត្ដនៅតាមបណ្ដោយត្រូវធ្វើការណែនាំដល់កងកម្លាំង និងអាជ្ញាធរមានសមត្ថកិច្ចទាំងអស់រក្សាទំនាក់ទំនងជាមួយកងកម្លាំងនៃភាគីថៃ ក្នុងការដោះស្រាយបញ្ហានានា ដោយសន្តិវិធីនិងការអត់ធ្មត់ ខ្ពស់បំផុត។ ហើយបន្ដនីតិវិធីទៅកាន់ថ្នាក់ជាតិ ក្នុងករណីហួសដែនសមត្ថកិច្ច។
ពង្រឹងការគ្រប់គ្រងស្ថានភាពតាមព្រំដែន
រដ្ឋបាលខេត្ដត្រូវសម្របសម្រួល និងពិភាក្សាជាមួយអាជ្ញាធរខេត្តនិងកងកម្លាំងមានសមត្ថកិច្ចថៃនៅក្នុងការគ្រប់គ្រងការចេញចូលឆ្លងកាត់ព្រំដែនតាមទីស្នាក់ការត្រួតពិនិត្យច្រកទ្វារព្រំដែនផ្លូវការ តាមស្ថានភាពជាក់ស្តែងរបស់ខេត្តនីមួយៗ និងយកចិត្តទុកដាក់តាមដានស្ថានការណ៍វិវត្តតាមច្រកទ្វារព្រំដែនក្នុងដែនសមត្ថកិច្ចរបស់ខ្លួន។
រដ្ឋបាលខេត្ដត្រូវណែនាំដល់រដ្ឋបាលក្រុង ស្រុក និងកងកម្លាំងមានសមត្ថកិច្ចត្រូវទប់ស្កាត់ និងហាមដាច់ខាតមិនឱ្យ មានការចេញចូលឆ្លងកាត់ព្រំដែនតាមច្រករបៀង ឬច្រកទ្វារពុំផ្លូវការ ដោយត្រូវមានវិធានការច្បាប់ឱ្យបានម៉ឺងម៉ាត់បំផុតចំពោះអ្នកល្មើស។
ការពារប្រជាពលរដ្ឋខ្មែរក្នុងប្រទេសថៃ
សេចក្ដីថ្លែងការណ៍របស់លោករដ្ឋមន្ដ្រី ស សុខា បានបញ្ជាក់ថា៖ «[អភិបាលខេត្ដ] ត្រូវខិតខំការពារនូវផលប្រយោជន៍ស្របច្បាប់របស់ប្រជាពលរដ្ឋខ្មែរដែលកំពុងធ្វើការ រកស៊ី និងរស់នៅក្នុងទឹកដីថៃ ព្រមទាំងត្រៀមវិធានការជម្លៀសប្រជាពលរដ្ឋដែលកំពុងនៅប្រទេសថៃ ឱ្យវិលចូលក្នុងប្រទេសវិញក្នុងករណីមានការប៉ះទង្គិចគ្នាដោយកម្លាំងប្រដាប់វុធ នៅតាមខ្សែបន្ទាត់ព្រំដែន»។
លោកបន្ដថា ទន្ទឹមនេះ រដ្ឋបាលខេត្ដអប់រំណែនាំ និងផ្សព្វផ្សាយដល់ប្រជាពលរដ្ឋកុំឱ្យឆ្លងដែនចូលទៅប្រទេសថៃជាបណ្តោះអាសន្ន ប្រសិនបើមិនចាំបាច់ រួមទាំងការត្រៀមវិធានការសម្រាប់ឆ្លើយតប និងគ្រប់គ្រងស្ថានភាពអាសន្នដែលអាចកើតឡើងជាយថាហេតុ និងផ្តល់កិច្ចសហការឱ្យបានជិតស្និទ្ធជាមួយកងយោធពលខេមរភូមិន្ទ និង នគរបាលជាតិ។
ត្រៀមខ្លួនទបទល់គ្រោះអាសន្ន និងជម្លៀសប្រជាជនក្នុងទ្រង់ទ្រាយធំ
ក្រសួងមហាផ្ទៃបានសង្កត់ធ្ងន់លើសុខសុវត្ថិភាពរបស់ប្រជាជនតាមព្រំដែន ដោយត្រៀមវិធានការបម្រុងទុករួចជាមុននូវផែនការជម្លៀសប្រជាពលរដ្ឋដែលត្រឡប់ចូលមកក្នុងប្រទេសវិញ និងអ្នករស់នៅតំបន់ព្រំដែន ក្នុងករណីមានការប៉ះទង្គិចគ្នាដោយកម្លាំង ប្រដាប់អាវុធដែលអាចកើតឡើងជាយថាហេតុ ឬមានការបិទច្រកទ្វារព្រំដែន ក្នុងនោះត្រូវ រៀបចំទីជម្រកសុវត្ថិភាពបណ្តោះអាសន្ន មធ្យោបាយដឹកជញ្ជូន ជំនួយសង្គ្រោះ ស្បៀងអាហារ ថ្នាំសង្កូវ ទឹកស្អាត អគ្គិសនីជាដើម។
យាមកាម និងរាយការណ៍២៤ម៉ោងលើ២៤ម៉ោង
លោក ស សុខា បានបន្ដក្នុងសេចក្ដីថ្លែងការណ៍ថា៖«អភិបាលខេត្ដតាមបណ្ដោយព្រំដែនថៃត្រូវបែងចែកវេនជូនថ្នាក់ដឹកនាំមន្ត្រី និងកងកម្លាំងមានសមត្ថកិច្ចនៃរដ្ឋបាលខេត្ត ក្រុង ស្រុក និងឃុំ សង្កាត់ ឱ្យប្រចាំការ ២៤ម៉ោងលើ២៤ម៉ោង ដើម្បីតាមដាន រាយការណ៍ និងគ្រប់គ្រងសភាពការណ៍ព្រំដែនក្នុងដែនសមត្ថកិច្ចរបស់ខ្លួនឱ្យបានជាប់ជាប្រចាំ»។
ផ្សព្វផ្សាយ និងទប់ស្កាត់ព័ត៌មានក្លែងក្លាយ
សេចក្ដីថ្លែងការណ៍ បានលើកឡើងថា រដ្ឋបាលខេត្ដត្រូវបង្កើនការផ្សព្វផ្សាយព័ត៌មានច្បាស់ការណ៍ជូនប្រជាពលរដ្ឋ ច្រានចោលព័ត៌មានមិនពិត ជាពិសេសត្រូវចាត់វិធានការឱ្យបានម៉ឺងម៉ាត់ចំពោះការឃោសនាដែលមានលក្ខណៈ ញុះញង់ បំបាក់ទឹកចិត្តកងទ័ពនិងនគរបាលការពារព្រំដែន បញ្ឆេះកំហឹងនិងអរិភាពរវាង ប្រជាជាតិទាំងពីរ ដែលបើកដៃឱ្យក្រុមជ្រុលនិយមបំភ្លៃសាធារណមតិ និងបំផ្លិចបំផ្លាញ កិច្ចខិតខំរបស់រាជរដ្ឋាភិបាលនៃប្រទេសទាំងពីរ ក្នុងការដោះស្រាយបញ្ហាព្រំដែននិង អធិបតេយ្យដ៏មានសារៈសំខាន់នេះ។
គ្មានកិច្ចព្រមព្រៀងណាមួយរវាងរដ្ឋបាលមូលដ្ឋានជាមួយភាគីថៃ
ក្រសួងមហាផ្ទៃបានសង្កាត់ធ្ងន់ថា ត្រូវបានហាមឃាត់រដ្ឋបាលខេត្ត ក្រុង ស្រុក និងឃុំ សង្កាត់ មិនឱ្យចុះហត្ថលេខាលើកំណត់-ហេតុ ឬឯកសារនានាជាមួយភាគីថៃ រហូតដល់មានការណែនាំជាថ្មីពីក្រសួងមហាផ្ទៃ។
គួរបញ្ជាក់ថា នាពេលថ្មីៗនេះ ភាគីថៃបានបិទ ឬផ្លាស់ប្តូរពេល វេលាចេញចូលឆ្លងកាត់ព្រំដែននៅតាមទីស្នាក់ការត្រួតពិនិត្យច្រកទ្វារព្រំដែនមួយចំនួនជាឯកតោភាគី ដោយមិនបានជូនដំណឹងផ្លូវការជាមុនមកភាគីកម្ពុជា ដូចមានចែងក្នុងកិច្ចព្រមព្រៀងរវាងរដ្ឋាភិបាលនៃ ព្រះរាជាណាចក្រកម្ពុជា និងរដ្ឋាភិបាលនៃព្រះរាជាណាចក្រថៃ ស្តីពីការឆ្លងកាត់ព្រំដែនរវាងប្រទេសទាំងពីរ ចុះថ្ងៃទី១១ ខែកក្កដា ឆ្នាំ២០១៥។
ស្ថានការណ៍នេះ អាចបង្កផលប៉ះពាល់ដល់សន្តិសុខ សុវត្ថិភាព អាយុជីវិត និងទ្រព្យសម្បត្តិប្រជាពលរដ្ឋ ព្រមទាំងជះឥទ្ធិពលអវិជ្ជមានដល់ទំនាក់ទំនងរវាងខេត្តនិងខេត្តជាប់ព្រំដែន ការធ្វើដំណើរចេញ-ចូលឆ្លងកាត់ព្រំដែន ការផ្លាស់ប្តូរសេដ្ឋកិច្ចនិងពាណិជ្ជកម្មរវាងប្រទេសទាំងពីរ ដែលតម្រូវឱ្យដាក់ចេញវិធានការចាំបាច់ បុរេសកម្ម បត់បែន និងឆាប់រហ័ស ដើម្បីការពារឧត្តមប្រយោជន៍ជាតិ និងផលប្រយោជន៍របស់ប្រជាពលរដ្ឋខ្មែរ៕
