កិច្ចប្រជុំគណៈកម្មការព្រំដែនចម្រុះ កម្ពុជា-ថៃ (JBC)លេីកទី៦ ចាប់ផ្ដើមនៅម៉ោង ១១ និង ៤៥នាទី ថ្ងៃទី១៤ មិថុនា នៅរាជធានីភ្នំពេញ។
កិច្ចប្រជុំនេះតាមពិតកំណត់ធ្វើឡើងនៅម៉ោង ១០ ប៉ុន្តែត្រូវបានពន្យារបន្តិច ដោយសារភាគីទាំងពីរជួបប្រជុំចង្អៀតមួយ។
នៅក្នុងកិច្ចប្រជុំនេះ ភាគីកម្ពុជាដឹកនាំដោយ លោក ឡាំ ជា រដ្ឋមន្ត្រីទទួលបន្ទុករដ្ឋលេខាធិការដ្ឋានកិច្ចការព្រំដែន ចំណែកភាគីថៃ ដឹកនាំដោយលោក ប្រាសាត ប្រាសាតវិនិឆៃ អតីតឯកអគ្គរាជទូតថៃប្រចាំកម្ពុជាកាលពីឆ្នាំ២០០៩ បច្ចុប្បន្នជាទីប្រឹក្សាកិច្ចការព្រំដែននៃក្រសួងការបរទេសថៃ។
កិច្ចប្រជុំនេះ បានខកខានអស់ ១២ឆ្នាំមកហើយ។ បញ្ហាព្រំដែនពាក់ព័ន្ធប្រាសាទតាមាន់តូច តាមាន់ធំ តាក្របី និង ចំណុចមុំបី មិនមានក្នុងរបៀបវារៈទេ ហើយរឿងបិទព្រំដែនដោយភាគីថៃ ក៏មិនស្ថិតនៅលេីតុប្រជុំដែរ។
គិតត្រឹមថ្ងៃត្រង់នេះ មិនទាន់មានលទ្ធផលអ្វីនៅឡើយទេ ខណៈដែលរបៀបវារៈនៃកិច្ចប្រជុំនេះ បេីគ្មានអ្វីប្រែប្រួលទេ នឹងបន្តរហូតដល់ម៉ោង ៧យប់។
កិច្ចប្រជុំ JBC ធ្វើឡើងស្របពេលបញ្ហាព្រំដែនរវាងប្រទេសទាំងពីរកំពុងមានភាពតានតឹង ដូចជាការបិទព្រំដែនដោយភាគីថៃជាឯកតោភាគី និងការពិចារណាកាត់ផ្ដាច់អគ្គិសនីពីភាគីថៃ ដែលទាំងនេះមានឡើងបន្ទាប់ពីការប៉ះទង្គិចគ្នារវាងកងទ័ពនៃប្រទេសទាំងពីរ នៅថ្ងៃទី២៨ ឧសភា ឆ្នាំ២០២៥។
កម្ពុជាបានឆ្លើយតបទៅនឹងការគំរាមនានារបស់ជនជ្រុលនិយមថៃគាំទ្រដោយយោធា ដោយកាត់ផ្ដាច់ការផ្គត់ផ្គង់អ៊ីនធឺណិត អគ្គិសនី ពីថៃ និងបិទច្រកអន្តរជាតិដូង។
នាយករដ្ឋមន្ត្រីកម្ពុជា លោក ហ៊ុន ម៉ាណែត បញ្ជាក់ថា កម្ពុជានឹងយកលិខិតពាក្យបណ្តឹងទៅតុលាការយុត្តិធម៌អន្តរជាតិនៅថ្ងៃទី១៥ មិថុនានេះ ដែលចំថ្ងៃខួបទី៦៣ នៃការឈ្នះរឿងក្ដីប្រាសាទព្រះវិហារលេីប្រទេសថៃ។
នាយករដ្ឋមន្ត្រីថៃ Paetongtarn Shinawatra ថ្លែងនៅថ្ងៃទី១៣ មិថុនាថា ថៃនឹងមានវិធានការបន្ទាប់យ៉ាងណា អាស្រ័យលេីលទ្ធផលនៃកិច្ចប្រជុំនេះ។
អ្នកវិភាគនិយាយថា នៅពេលប្រទេសទាំងពីរមានទិសដៅផ្សេងៗគ្នាក្នុងការរកដំណោះស្រាយរឿងព្រំដែន ភាពតានតឹងនៅតាមព្រំដែនអាចនឹងឡេីងកម្ដៅកាន់តែខ្លាំង។
