លោកនាយករដ្ឋមន្ដ្រី ហ៊ុន ម៉ាណែត ថតរូបជាមួយកម្មការិនីនាពេលកន្លងមក។ រូបថត STPM
ភ្នំពេញ៖ ក្នុងករណីមានការវិលត្រឡប់ទ្រង់ទ្រាយធំដោយមូលហេតុណាមួយ លោកនាយករដ្ឋមន្ដ្រី ហ៊ុន ម៉ាណែត បានគិតគូរ និងត្រៀមទាំងការដឹកជញ្ជូន ការស្នាក់នៅ ហូបចុក ឱកាសការងារក្នុងស្រុក រួមទាំងស្នើដល់សមាគមធនាគារ និងមីក្រូហិរញ្ញវត្ថុកម្ពុជាពិនិត្យលទ្ធភាពជួយសម្រួលបំណុលតាមដែលអាចធ្វើទៅបាន។
លោកបានសរសេរនៅលើបណ្ដាញសង្គមនៅរសៀលថ្ងៃទី១៤ ខែមិថុនាថា៖ «ពេលប្រទេសជាតិនិងប្រជាពលរដ្ឋខ្មែរយើងប្រឈមនឹងបញ្ហា ស្មារតីសាមគ្គីឯកភាពជាតិ និងការជួយគ្នាទៅវិញទៅមក គឺជាចំណុចខ្លាំងរបស់ប្រជាជាតិខ្មែរយើង»។
លោកនាយករដ្ឋមន្ដ្រីបានបញ្ជាឱ្យក្រសួង-ស្ថាប័នពាក់ព័ន្ធ កងកម្លាំងប្រដាប់អាវុធគ្រប់ប្រភេទ និងរដ្ឋបាលខេត្តជាប់ព្រំដែនថៃទាំង៧ ត្រៀមសម្របសម្រួលការឆ្លងកាត់ព្រំដែន និងស្នាក់នៅ ហូបចុក បណ្ដោះអាសន្នរបស់ប្រជាពលរដ្ឋនៅតំបន់ព្រំដែន។
ក្រសួងការពារជាតិ កងទ័ពជើងគោក សាលារាជធានីភ្នំពេញ ត្រៀមរថយន្ត ដើម្បីដឹកជញ្ជូនបងប្អូនពីព្រំដែន ត្រឡប់ទៅស្រុកកំណើត។
លើសពីនេះ លោកបានថ្លែងថា៖ «ក្រសួងការងារ និងបណ្ដុះបណ្ដាលវិជ្ជាជីវៈ ត្រៀមជួយស្វែងរកការងារក្នុងប្រទេសជូនបងប្អូនដែលត្រលប់មកវិញ ដោយបច្ចុប្បន្ននៅក្នុងប្រទេសយើងនៅខ្វះកម្លាំងពលកម្មជាមធ្យមជាង ៧ម៉ឺននាក់»។
ក្រសួងសេដ្ឋកិច្ចនិងហិរញ្ញវត្ថុ ក្រសួងស្ថាប័នពាក់ព័ន្ធ ត្រៀមលក្ខណៈក្នុងការជួយអន្តរាគមន៍ ដល់បងប្អូនពលករខ្មែរដែលត្រូវត្រឡប់មកវិញក្នុងការសម្រួលជីវភាពប្រចាំថ្ងៃ តាមរយៈកញ្ចប់អន្តរាគមន៍សេដ្ឋកិច្ចនិងសង្គមកិច្ចមួយចំនួន។
លោកនាយករដ្ឋមន្ដ្រី បានលើកឡើងថា៖ «ជាមួយគ្នានេះ ខ្ញុំសូមអំពាវនាវឲ្យសមាគមធនាគារនៅកម្ពុជា និង សមាគមមីក្រូហិរញ្ញវត្ថុកម្ពុជា ពិនិត្យលទ្ធភាពក្នុងការជួយសម្រាលបន្ទុកហិរញ្ញវត្ថុសម្រាប់បងប្អូនប្រជាពលករដែលត្រលប់មកពីថៃវិញ ចំពោះអ្នកដែលមានជាប់ជំពាក់បំណុលជាមួយធនាគារ ឬគ្រឹះស្ថានមីក្រូហិរញ្ញវត្ថុ ទៅតាមលទ្ធភាព ឬ ក្នុងមួយរយៈពេលកំណត់ណាមួយដែលអាចធ្វើទៅបាន»៕
