ពលរដ្ឋខ្មែរ និងពលរដ្ឋថៃ ឆ្លងកាត់ច្រកប៉ោយប៉ែត នៅថ្ងៃទី១៤ មិថុនា ២០២៥។ ភ្នំពេញប៉ុស្តិ៍
ប្រធានព្រឹទ្ធសភា លោក ហ៊ុន សែន នៅរសៀលថ្ងៃទី១៤ មិថុនានេះ អំពាវនាវឲ្យពលករខ្មែរដែលរស់នៅប្រទេសថៃត្រឡប់ចូលមកកម្ពុជាវិញ មិនថាមានឯកសារឬគ្មានឯកសារ ដោយមើលឃើញថា ពេលអាជ្ញាធរថៃអាចនឹងបណ្ដេញពួកគេចេញនាពេលខាងមុខ។
នៅក្នុងសារបង្ហោះលើហ្វេសប៊ុកនៅរសៀលនេះ លោកថ្លែងថា៖ «សូមបងប្អូនពលករវិលត្រឡប់មកមាតុភូមិវិញមុនពេលអាជ្ញាធរថៃបណ្តេញចេញនិងការប្រមាថ។ ខ្ញុំនិយាយបែបនេះព្រោះខ្ញុំយល់ច្បាស់ ថាជម្លោះព្រំដែនកម្ពុជា-ថៃនឹងអូសបន្លាយពេលយូរពិសេសនៅពេលកម្ពុជាដាក់ពាក្យប្តឹងទៅកាន់តុលាការយុត្តិធម៌អន្តរជាតិ ICJ ពេលនោះពួក ជ្រុលនិយមថៃនិងយោធាថៃមួយចំនួននឹងរករឿងធ្វើបាបបងប្អូន»។
លោកថ្លែងថា មានពលរដ្ឋខ្មែរខ្លះបានលើកឡើងពីការចងវិលត្រឡប់មករស់នៅ មើលម្តាយដែលមានអាយុ៨០ឆ្នាំតែគាត់ពុំមានឯកសារ។ ករណីនេះលោកឆ្លើយតបជារួមថា៖ «ខ្ញុំអាចឆ្លើយបានថាអ្នកណាក៏ដោយឲ្យតែជាខ្មែរ ទោះមានឬគ្មានឯកសាររាជរដ្ឋាភិបាលទទួលយកបានទាំងអស់ដោយ គ្មានការរើសអើង»។
លោកគាំទ្រដល់វិធានការត្រៀមទទួលពលករខ្មែរ ដូចដែលលោកនាយករដ្ឋមន្ត្រី ហ៊ុន ម៉ាណែត បានលើកឡើងនៅមុននេះបន្តិច៕
