នាយករដ្ឋមន្ត្រីថៃ Paetongtarn Shinawatra (ឆ្វេង) និង នាយករដ្ឋមន្ត្រីនៃកម្ពុជាលោក ហ៊ុន ម៉ាណែត (ស្តាំ)។ FB
លោក ហ៊ុន ម៉ាណែត នាយករដ្ឋមន្ត្រីនៃកម្ពុជា បានវាយបកទៅលើការអត្ថាធិប្បាយរបស់មេដឹកនាំថៃ ដែលចោទមេដឹកនាំកម្ពុជាថាធ្វើនយោបាយមិនមានវិជ្ជាជីវៈ (unprofessional) ពាក់ព័ន្ធនឹងការបញ្ចេញសារបញ្ហាព្រំដែន និងកិច្ចប្រជុំនានានៅលើបណ្ដាញសង្គម។
លោកថា ការបញ្ចេញសារតាមបណ្ដាញសង្គម គឺជាវិធីសាស្ត្រដែលលឿនបំផុតសម្រាប់ជូនដំណឹងដល់ប្រជាពរលដ្ឋ ដូចដែលមេដឹកនាំនានាលើពិភពលោកតែងតែធ្វើ។ លោកថ្លែងដូច្នេះក្នុងពិធីបិទមហាសន្និបាតវិសាមញ្ញកាយរឹទិ្ធជាតិកម្ពុជា។
លោកថ្លែងថា៖ «អ្នកនយោបាយថៃចោទខ្ញុំ និងសម្ដេចតេជោ ថា ធ្វើនយោបាយអត់ professional ធ្វើនយោបាយតាមហ្វេសប៊ុក។ ស្អីទៅអ្នកនយោបាយធ្វើនយោបាយអត់ professional? គាត់ចង់និយាយយ៉ាងម៉េច គឺគាត់ចង់និយាយថា ស្អីៗយើងអាចជជែគគ្នា ហើយធ្វើនយោបាយតាមហ្វេសប៊ុកអត់កើត»។
លោកថា សូម្បីតែអ្នកដឹកនាំថៃខ្លួនឯងក៏ដូចគ្នាដែរ គឺតែងតែប្រើវិធីសាស្ត្រផ្សព្វផ្សាយព័ត៌មាននៅលើបណ្ដាញសង្គម ដោយពេលខ្លះថែមទាំងគំរាមកម្ពុជា ដូចជាការគំរាមកាត់ផ្ដាច់សេវាមួយចំនួន ដោយមិនបានពិភាក្សាជាមួយកម្ពុជាមុន។
លោកថា៖ «បន្តិចថា កាត់ភ្លើង បន្តិចថាកាត់អ៊ីនធឺណិត បន្តិចថាធ្វើរបងខាន់កម្ពុជានឹងថៃ។ ស្អីទៅអាហ្នឹង តើវា professional ឬអី? និយាយឲ្យច្បាស់តែម្ដង គឺកម្ពុជាអត់មាត់ទេ កម្ពុជាអត់ធ្មត់ណាស់ ព្រោះយើងមិនចង់មានរឿង»។
ការថ្លែងរបស់លោក ហ៊ុន ម៉ាណែត ឆ្លើយតបទៅនឹងការលើកឡើងរបស់នាយករដ្ឋមន្ត្រីថៃ Paetongtarn Shinawatra ដែលបានថ្លែងក្នុងសន្និសីទសារព័ត៌មាននៅថ្ងៃទី១៦ មិថុនាថា ការចរចារបស់រដ្ឋាភិបាលថៃ តែងធ្វើឡើងតាមនិយាមអន្តរជាតិ តាមរយៈបណ្ដាញផ្លូវការរបស់រដ្ឋ។
អ្នកស្រីថា៖ «ការចរចារបស់រដ្ឋាភិបាលថៃ ធ្វើឡើងតាមគោលការណ៍អន្តរជាតិ តាមរយៈបណ្តាញទំនាក់ទំនងផ្លូវការរបស់រដ្ឋ ជៀសវាងការទំនាក់ទំនងប្រចាំថ្ងៃតាមបណ្តាញផ្សេងៗ មិនបង្កហេតុ ឬប្រកួតប្រជែង មិនបង្កើតការយល់ច្រឡំ ដើម្បីគោរពប្រទេសមិត្តភក្តិដែលជាដៃគូចរចា រក្សាបរិយាកាសអំណោយផលដល់ការដោះស្រាយជម្លោះ និងមិនប៉ះពាល់ដល់ស្ថានភាពនយោបាយ សេដ្ឋកិច្ច និងសង្គម»៕
