មន្រ្តីមន្ទីរប្រឆាំងគ្រឿងញៀន ចុះត្រួតពិនិត្យមើលសមត្ថភាពសុនខហិតគ្រឿងញៀង នៅអង្គភាពអន្តរាគមន៍ពិសេស បន្ទាប់ពីទទួលបានពីអង្គភាពCMAC។ រូបថត Anti-Drug Department
ភ្នំពេញៈ កម្ពុជាកំពុងតែប្រើប្រាស់សត្វសុនខ ដើម្បីបង្កើនប្រសិទ្ធភាពនៃការទប់ស្កាត់ និងបង្ក្រាបបទល្មើសគ្រឿងញៀន នៅខណៈពេលដែលបញ្ហាគ្រឿងញៀន ទាំងក្នុងតំបន់ និងអន្តរជាតិមានការវិវត្តប្រែប្រួលស្មុគស្មាញ និងគ្រោះថ្នាក់ គួរឱ្យព្រួយបារម្ភ។
លោកឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងគ្រឿងញៀន និងថ្នាក់ដឹកនាំមួយចំនួន នៃមន្ទីរប្រឆាំងគ្រឿងញៀន នាថ្ងៃពុធថ្ងៃទី១៨ ខែមិថុនានេះ បានជួបប្រជុំជាមួយមន្ត្រីជំនាញផ្នែកសុនខ និងត្រួតពិនិត្យ សមត្ថភាពសុនខហិតគ្រឿងញៀន ចំនួន៥ក្បាល នៅអង្គភាពអន្តរាគមន៍ពិសេស ស្ថិតក្នុងសង្កាត់ព្រែកឯង ខណ្ឌច្បារអំពៅ រាជធានីភ្នំពេញ។
សុនខហិតគ្រឿងញៀនទាំងនេះទទួលបានពីមជ្ឈមណ្ឌលសកម្មភាពកំចាត់មីនកម្ពុជា(CMAC) ដែលនឹងត្រូវប្រើប្រាស់ ក្នុងកិច្ចសហការជាមួយ អង្គភាពអន្តរាគមន៍ពិសេស ដើម្បីចូលរួម បង្ការ ទប់ស្កាត់និងបង្រ្កាបបទល្មើសគ្រឿងញៀននៅក្នុងប្រទេសកម្ពុជា ឱ្យកាន់តែមានប្រសិទ្ធខ្ពស់បន្ថែមទៀត។
លោកឧត្តមសេនីយ៍ឯក បានបញ្ជាក់ថា៖«សភាពការណ៍គ្រឿងញៀន ទាំងក្នុងក្របខណ្ឌអន្តរជាតិ និងក្នុងតំបន់ នៅតែមានការវិវត្តប្រែប្រួលស្មុគស្មាញ និងគ្រោះថ្នាក់ គួរឱ្យព្រួយបារម្ភ ដូច្នេះទាមទារឱ្យមន្រ្តីជំនាញពាក់ព័ន្ធទាំងអស់ ត្រូវរួមសហការគ្នាបង្កើនការបង្ការ ទប់ស្កាត់ និងបង្រ្កាប បទល្មើសគ្រឿងញៀន ឱ្យកាន់តែមានប្រសិទ្ធភាពខ្ពស់»។
ក្នុងឱកាសនោះ លោកឃឹង សារ៉ាត់ បានណែនាំដល់មន្រ្តីជំនាញដែលថែទាំសុនខនីមួយៗ ត្រូវចេះថែរក្សាសុខភាពសុនខឱ្យបានល្អ ទាំងការថែទាំ ការឱ្យចំណី និងហ្វឹកហ្វឺនសុនខហិតក្លិនរកគ្រឿងញៀននេះឱ្យមានសមត្ថភាពខ្ពស់ ដើម្បីទប់ស្កាត់បទល្មើសគ្រឿងញៀន នៅក្នុងប្រទេសកម្ពុជា ជាពិសេសនៅក្នុងការចុះប្រតិបត្តិការម្ដងៗ។
អង្គភាពCMAC បានធ្វើអំណោយសត្វសុនខហិតគ្រឿងញៀនចំនួន១០ក្បាលដល់អគ្គស្នងការនគរបាលជាតិ ដើម្បីចូលរួមបង្ការ ទប់ស្កាត់ និងបង្រ្កាបគ្រឿងញៀននៅកម្ពុជា។ រូបថត CMAC
លោកឧត្តមសេនីយ៍ឯក ក៏បានឧបត្ថម្ភដល់មន្រ្តីជំនាញថែទាំសុនខចំនួន១០នាក់។ ក្នុងម្នាក់ទទួលបានថវិកា១០ម៉ឺនរៀល និងមន្រ្តីជំនាញអន្តរាគមន៍ពិសេសមើលថែទាំសុនខចំនួន១០នាក់ ដែល ក្នុងម្នាក់ចំនួន៥ម៉ឺនរៀលផងដែរ។
អគ្គស្នងការដ្ឋាននគរបាលជាតិ និងអង្គភាពCMAC កាលពីខែមករា ឆ្នាំ២០២៥នេះ បានចុះMOU លើកិច្ចសហប្រតិបត្តិការហ្វឹកហ្វឺនជំនាញបច្ចេកទេសបញ្ជាសុនខ និងការផ្គត់ផ្គង់សុនខជំនាញបច្ចេកទេស និងការងារកាត់បន្ថយគ្រោះថ្នាក់ដោយសារមីន និងគ្រាប់យុទ្ធភណ្ឌសង្រ្គាម។
លោកនាយឧត្តមសេនីយ៍ ស ថេត អគ្គស្នងការនគរបាលជាតិ បានមានប្រសាសន៍ក្នុងឱកាសនោះថា ការសហការជាមួយមជ្ឈមណ្ឌលសកម្មភាពកំចាត់មីនកម្ពុជានេះ ត្រូវបានធ្វើឡើង បន្ទាប់ពីទទួលបានការណែនាំរបស់ លោកស សុខាឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដើម្បីឱ្យស្ថាប័នទាំង២ រួមសហការគ្នាឱ្យកាន់តែជិតស្និទ្ធបន្ថែមទៀត លើការហ្វឹកហ្វឺនជំនាញបច្ចេកទេសបញ្ជាសុនខនេះ ដើម្បីលើកកម្ពស់កិច្ចការងារសន្តិសុខ សណ្ដាប់ធ្នាប់សាធារណៈ ជូនថ្នាក់ដឹកនាំជាតិ អន្តរជាតិ និងប្រជាពលរដ្ឋឱ្យកាន់តែមានប្រសិទ្ធភាពបន្ថែមទៀត។
មន្រ្តីប្រឆាំងគ្រឿងញៀនចំនួន២០រូបបានចូលរួមនៅក្នុងវគ្គហ្វឹកហ្វឺនសុនខប្រឆាំងគ្រឿង នៅវិទ្យាស្ថានបច្ចេកទេសសកម្មភាពកម្ចាត់មីនខេត្តកំពង់ឆ្នាំង ដើម្បីឱ្យក្លាយជាអ្នកជំនាញកាន់សុនខ។ នៅពេលបិទវគ្គ នាថ្ងៃទី១១ ខែមិថុនានេះ អង្គភាពCMAC ក៏បានប្រគល់សុនខប្រឆាំងគ្រឿងញៀនចំនួន១០ក្បាល ជាអំណោយ ជូនអគ្គស្នងការនគរបាលជាតិផងដែរ។
ប្រតិភូរាជរដ្ឋាភិបាល ទទួលបន្ទុកជាអគ្គនាយក អង្គភាពCMAC លោកហេង រតនាបានលើកឡើងក្នុងឱកាសនោះថា រាជរដ្ឋាភិបាលអណត្តិទី៧ បានបន្តខិតខំប្រយុទ្ធប្រឆាំងគ្រឿងញៀន ខណៈដែលលោកឧបនាយករដ្ឋមន្ត្រី ស សុខាបានខិតខំពង្រឹងបច្ចកវិទ្យានិងកម្លាំងជំនាញ ដើម្បីអនុវត្តសកម្មភាពប្រឆាំងគ្រឿងញៀននេះយ៉ាងសកម្ម។
មន្រ្តីមន្ទីរប្រឆាំងគ្រឿងញៀន ចុះត្រួតពិនិត្យមើលសមត្ថភាពសុនខហិតគ្រឿងញៀង នៅអង្គភាពអន្តរាគមន៍ពិសេស បន្ទាប់ពីទទួលបានពីអង្គភាពCMAC។ រូបថត Anti-Drug Department
អង្គភាពCMAC មានសមត្ថភាព និងសុនខ អាចបំពាក់ជំនាញសំខាន់ៗដូចជា សុនខហិតមីន សុនខសន្តិភាព សុនខល្បាតតាមព្រៃ និងសុនខប្រឆាំងគ្រឿងញៀនជាដើម។
លោកមានប្រសាសន៍ថា៖«ស្របតាម "ស្មារតីខែ្មរធ្វើបាន" កម្ពុជាមានសមត្ថភាពគ្រប់គ្រាន់ប្រកបដោយទេពកោសល្យ និងបទពិសោធន៍ និងម្ចាស់ការបាន១០០ភាគរយ លើការងារបង្កាត់ពូជ ហ្វឹកហ្វឺនជំនាញសុនខ សម្រាប់ប្រើតាមតម្រូវការរបស់រាជរដ្ឋាភិបាល និងសង្គមជាតិ។ បច្ចុប្បន្ននេះ អង្គការ CMAC មានសមត្ថភាពអាចផ្គត់ផ្គង់សុនខជំនាញសកម្មភាពកម្ចាត់មីនទៅអន្តរជាតិផងដែរ»។
យ៉ាងហោចណាស់សារធាតុញៀន និងសារធាតុគីមីផ្សំជាង ២តោនត្រូវបានរកឃើញ និងរឹបអូសក្នុងយុទ្ធនាការបង្រ្កាបបទល្មើសគ្រឿងញៀនរួមចំនួន ៤ ១៣៤ករណី ក្នុងរយៈពេលជាង៥ខែដើមឆ្នាំ២០២៥នេះ។ ក្នុងនោះ មនុស្សចំនួន១០ ៧៦៥នាក់ ដែលមានស្រ្តីចំនួន ៨៦២នាក់ផងដែរ ត្រូវបានឃាត់ខ្លូន៕
