សិក្ខាសាលាផ្សព្វផ្សាយអំពី «ផលិតផលធានារ៉ាប់រងអាយុជីវិត» ក្នុងខេត្តពោធិ៍សាត់។ រូបថត សហការី
ពោធិ៍សាត់៖ និយ័តករធានារ៉ាប់រងកម្ពុជា (ន.ធ.ក.) ថ្ងៃទី៥ ខែមិថុនានេះ បានរៀបចំសិក្ខាសាលាផ្សព្វផ្សាយអំពី «ផលិតផលធានារ៉ាប់រងអាយុជីវិត» ក្នុងខេត្តពោធិ៍សាត់ ដើម្បីផ្សព្វផ្សាយ និងបញ្ជ្រាបចំណេះដឹងពីអត្ថប្រយោជន៍របស់ផលិតផលធានារ៉ាប់រងអាយុជីវិត ក៏ដូចជាឱកាសការងារ បើសិនជាក្រុមហ៊ុនធានារ៉ាប់រងបោះជំហានចូលខេត្ដពោធិ៍សាត់នេះ។
លោក គិត សុផា អភិបាលរងខេត្ដពោធិ៍សាត់ បានឱ្យដឹងថា ជាមួយប្រជាជនសរុបជិត ៥៥ម៉ឺននាក់ និងផលិតផលក្នុងស្រុកសរុប (ផ.ស.ស) ១៥៧៤ ដុល្លារសម្រាប់ម្នាក់ បច្ចុប្បន្នមានតែធនាគារជាដៃគូរបស់ក្រុមហ៊ុនធានារ៉ាប់រងប៉ុណ្ណោះ ដែលមានវត្ដមាននៅក្នុងខេត្ដពោធិ៍សាត់ ដោយមិនមានក្រុមហ៊ុនធានារ៉ាប់រងឯកជនប្រតិ្ដការនៅខេត្ដនេះនៅឡើយ។
នៅចំពោះមុខមន្ដ្រីរាជការ តំណាងគ្រឹះស្ថានឯក និងសិស្ស-និស្សិត លោក សុផា បានថ្លែងថា៖ «ខ្ញុំសូមលើកទឹកចិត្ដ និងសំណូមពរដល់និយ័តករធានារ៉ាប់រងកម្ពុជា ត្រួតពិនិត្យលទ្ធភាព និងសម្របសម្រួលឱ្យមានការបើកសាខារបស់ក្រុមហ៊ុនធានារ៉ាប់រងនៅខេត្ដពោធិ៍សាត់ក្នុងន័យបង្កើតនូវឱកាសការងារជូនដល់ប្រជាពលរដ្ឋក្នុងខេត្ដ ក៏ដូចជាជួយកាត់បន្ថយហានិភ័យហិរញ្ញវត្ថុផងដែរ»។
លោក ប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជា បានលើកឡើងថា វិស័យធានារ៉ាប់រងគឺជាវិស័យហិរញ្ញវត្ថុមិនមែនធនាគារ ដែលបាននិងកំពុងដើរតួនាទីជាសមាសភាគមួយដ៏សំខាន់ក្នុងការទ្រទ្រង់វិស័យសន្ដិសុខសង្គម និងសេដ្ឋកិច្ចជាតិ។
លោកបន្ដថា៖ «ដើម្បីជំរុញការអភិវឌ្ឍវិស័យធានារ៉ាប់រងកម្ពុជាបន្ថែមទៀតប្រកបដោយចដីរភាព កាលពីឆ្នាំ២០២១ រាជរដ្ឋាភិបាលកម្ពុជាបានធ្វើកំណែទម្រង់យន្ដការស្ថាប័ន ដោយបង្កើតនិយ័តករធានារ៉ាប់រងកម្ពុជា នៃអាជ្ញាធរសេវាហិរញ្ញវត្ថុមិនមែនធនាគារ ដែលជាស្ថាប័នថ្មីមួយដើរតួនាទីជាសេនាធិការឱ្យរាជរដ្ឋាភិបាលក្នុងការគ្រប់គ្រង និងអភិវឌ្ឍន៍វិស័យធានារ៉ាប់រងកម្ពុជា»។
ជាមួយនឹងកំណើនជាមធ្យមប្រចាំឆ្នាំប្រមាណ ២០% បច្ចុប្បន្ន ទំហំទីផ្សារធានារ៉ាប់រង កើនឡើងដល់ប្រមាណ ៣៧០ លានដុល្លារអាមេរិក ក្នុងឆ្នាំ២០២៤។
លោក ច័ន្ទភីរូ បានបន្ដថា យ៉ាងណាម៉ិញ ទំហំទីផ្សារនេះ បានរួមភាគទានក្នុងសេដ្ឋកិច្ចកម្ពុជាតែប្រមាណ ១.១៧% ហើយដង់ស៊ីតេ ធានារ៉ាប់រង មានតែ ២២ ដុល្លារ សម្រាប់មនុស្សម្នាក់ ដែលអត្រានេះនៅមាន កម្រិតទាប បើធៀបនឹងប្រទេសក្នុងតំបន់ និងសកលលោក។
លោកបានបន្ថែមថា សូចនាករទាំងនេះអាចបញ្ជាក់បានថា ការអភិវឌ្ឍនៃវិស័យធានារ៉ាប់រងកម្ពុជា នៅមានបញ្ហាប្រឈមមួយចំនួន ដូចជាកង្វះការយល់ដឹងរបស់សាធារណជនអំពីអត្ថប្រយោជន៍នៃការធានារ៉ាប់រងចំពោះបុគ្គលម្នាក់ៗ គ្រួសារនីមួយៗ និងសង្គមជាតិទាំងមូល។
យោងតាមនិយ័តករធានារ៉ាប់រងកម្ពុជា បានឱ្យដឹងថា ទឹកប្រាក់ធានារ៉ាប់រងអាយុជីវិតខែមេសា ឆ្នាំ២០២៥ មានទំហំ១.៦លានដុល្លារ កើនឡើង ២៦,២៧ភាគរយ បើធៀបនឹងរយៈពេលដូចគ្នាក្នុងឆ្នាំ២០២៤៕
