គំរូនៃការបង្រៀនបែបថ្មី និងបរិក្ខារសិក្សាប្រកបដោយអនាម័យ រួមជាមួយវិធានការទប់ស្កាត់ជំងឺកូវីដ ១៩ យ៉ាងតឹងរ៉ឹងនៅក្នុងបរិវេណសាលា គឺជាជំហានមួយចំនួនដែលសាលារៀនអន្តរជាតិ ទ្រូ វីហ្សិនកម្ពុជា កំពុងរៀបចំដើម្បីស្វាគមន៍សិស្សានុសិស្សឱ្យវិលត្រឡប់មកថ្នាក់រៀនវិញ។
វាជាបញ្ហាប្រឈមមួយ ប្រសិនបើសាលាមិនយកចិត្តទុកដាក់ឱ្យបានខ្ពស់ទៅលើការគំរាមកំហែងពីជំងឺរាតត្បាតនេះ។ សុវត្ថិភាពសិស្ស និងបុគ្គលិក គឺជាអាទិភាពចម្បង ដូច្នេះការបង្រៀននឹងប្រព្រឹត្តទៅក្នុងបរិយាកាសប្រកបដោយសុវត្ថិភាព និងអនាម័យ ក្រោមការឃ្លាំមើលយ៉ាងយកចិត្តដាក់បំផុតពីគ្រូ។
«អនុសាសន៍របស់ខ្ញុំចំពោះឪពុក-ម្តាយ គឺយើងត្រូវរៀនរស់នៅជាមួយជំងឺកូវីដ ១៩ ហើយយើងមិនចាំបាច់ភ័យខ្លាចទេ ពីព្រោះយើងភាគច្រើននៅទីក្រុងភ្នំពេញបានចាក់វ៉ាក់សាំងយ៉ាងត្រឹមត្រូវ។ សាលាអន្តរជាតិទ្រូវីហ្សិនកម្ពុជាបានអនុវត្តតាមគោលការណ៍ប្រតិបត្តិស្តង់ដា (SOP) ដែលកំណត់ ដោយក្រសួងសុខាភិបាល និងរដ្ឋាភិបាល។
លោក សេង បូណា អគ្គនាយកសាលា ទ្រូ វីហ្សិនកម្ពុជា មានប្រសាសន៍ថា៖ «ដល់ពេលដែលកុមារត្រូវវិលត្រឡប់មកសាលារៀនវិញហើយ ពីព្រោះពួកគេនៅឆ្ងាយពីថ្នាក់រៀនរបស់ពួកគេយូរណាស់ហើយ។ ការបង្រៀនតាមអនឡាញគឺមិនថ្វីទេ ប៉ុន្តែកុមារត្រូវការចូលរៀនជួបជុំគ្រូ និងមិត្តភក្តិរបស់ពួកគេវិញ ពីព្រោះនេះគឺជាវិធីនៃការរៀនសូត្រដែលមានផលិតភាពជាង។ តាមគ្រប់មធ្យោបាយសាលា ទ្រូ វីហ្សិន បានត្រៀមខ្លួនរួចជាស្រេច ដើម្បីស្វាគមន៍សិស្សានុសិស្សរបស់យើង»។
សិស្សវិទ្យាល័យចាប់ពីថ្នាក់ទី ៧ ដល់ទី ១២ បានវិលត្រឡប់មកកាន់បរិវេណសាលាវិញ គិតចាប់តាំងពីខែកញ្ញា នៅពេលដែលរដ្ឋាភិបាលអនុញ្ញាតឱ្យសាលារៀនបើកឡើងវិញ បន្ទាប់ពីត្រូវបានបិទអស់ជាច្រើនខែដោយសារជំងឺរាតត្បាត ខណៈសិស្សថ្នាក់មត្តេយ្យ និងបឋមសិក្សានឹងចូលរៀននៅក្នុងថ្នាក់ធម្មតាឡើងវិញនៅក្នុងសាលារៀន ទ្រូ វីហ្សិន នៅពេលណាដែលរដ្ឋាភិបាលអនុញ្ញាតឱ្យបើកដំណើរការឡើងវិញ។
ដូចស្ថាប័នអប់រំដទៃទៀតនៅកម្ពុជាដែរ ការបង្រៀនក្នុងថ្នាក់របស់សាលា ទ្រូ វីហ្សិន ត្រូវបានរំខានដោយជំងឺរាតត្បាត ដែលបង្ខំឱ្យសិស្សនៅឆ្ងាយពីថ្នាក់រៀន។
សាលា ទ្រូ វីហ្សិន បានដាក់ចេញយុទ្ធសាស្ត្រផ្ទាល់ ដើម្បីកែសម្រួលវិធីសាស្ត្របង្រៀនរបស់ខ្លួនយ៉ាងឆាប់រហ័ស ដោយការបង្រៀនបែបប្រពៃណី ត្រូវបានជំនួសដោយឧបករណ៍ឌីជីថល និងការបង្រៀនតាមអនឡាញ ដើម្បីឱ្យសិស្សអាចបន្តការសិក្សាដោយគ្មានការអាក់ខាន។
ជាមួយនឹងស្ថានភាពបានផ្លាស់ប្តូរ ខណៈករណីជំងឺកូវីដ ១៩ កំពុងបង្ហាញពីការធ្លាក់ចុះ រដ្ឋាភិបាលកំពុងអនុញ្ញាតឱ្យអាជីវកម្ម និងសាលារៀនបើកដំណើរការឡើងវិញបន្តិចម្តងៗ ហើយការគ្រប់គ្រងរបស់សាលា ទ្រូ វីហ្សិន កំពុងធ្វើឱ្យឪពុក- ម្តាយមានទំនុកចិត្តក្នុងការបញ្ជូនកូនរបស់ពួកគេមកកាន់សាលារៀនវិញ ដោយធានាពីសុវត្ថិភាព សុខភាពរបស់ពួកគេ។
«ឪពុកម្តាយខ្លះនៅតែស្ទាក់ស្ទើរក្នុងការបញ្ជូនកូនរបស់ពួកគេមកសាលារៀនវិញ ប៉ុន្តែខ្ញុំសូមលើកទឹកចិត្តឪពុកម្តាយឱ្យបញ្ជូនពួកគេមកសាលារៀន ពីព្រោះនេះគឺជាបទដ្ឋានថ្មី ហើយយើងត្រូវតែរៀនសម្របខ្លួន និងរស់នៅក្នុងយុគសម័យថ្មី»។
«បុគ្គលិករបស់យើងដឹងយ៉ាងច្បាស់ក្នុងការមើលថែកុមារ។ ឧទាហរណ៍ ពួកគេមិនត្រូវបានអនុញ្ញាតឱ្យប៉ះពាល់រាងកាយដោយផ្ទាល់ឡើយ ហើយយើងពិនិត្យសីតុណ្ហភាពរបស់សិស្សគ្រប់រូប មុនពេលចូលទៅក្នុងបរិវេណសាលា»។
លោក សេង បូណា បានបន្តថា៖ «បច្ចុប្បន្ន ទំហំថ្នាក់រៀននីមួយៗត្រូវបានបន្ថយមកពាក់កណ្តាលពី ១៨ ទៅ ២០ នាក់ មុនពេលជំងឺកូវីដ មកនៅត្រឹមតែប្រមាណ ១០ នាក់ប៉ុណ្ណោះនៅក្នុងថ្នាក់នីមួយៗ។ សិស្ស ត្រូវបានអនុញ្ញាតឱ្យឈប់សម្រាករៀងរាល់ ២០ នាទីម្តង បន្ទាប់ពីការសិក្សារៀងរាល់ ៤០ នាទី។ នៅក្នុងថ្នាក់រៀន យើងមិនបើកម៉ាស៊ីនត្រជាក់ទេ ប៉ុន្តែប្រើតែកង្ហារប៉ុណ្ណោះ ហើយយើងបើកទ្វារ និងបង្អួចដើម្បីឱ្យមានខ្យល់ចេញចូលគ្រប់គ្រាន់។ បន្ទប់ដោយឡែកក៏ត្រូវបានរៀបចំផងដែរ ក្នុងករណីបន្ទាន់»។
ការយកចិត្តទុកដាក់អំពីសុខភាពរបស់សាលា ទ្រូ វីហ្សិន មិនមែនមានតែនៅក្នុងថ្នាក់រៀនប៉ុណ្ណោះទេ។ សាលាមិនអនុញ្ញាតឱ្យហាង ឬតូបណាមួយអាចលក់អាហារ ឬភេសជ្ជៈដល់សិស្សបានទេ នៅក្នុងបរិវេណជុំវិញ គឺអនុញ្ញាតឱ្យមាតាបិតា រៀបចំអាហារ ឬចំណី ពីផ្ទះក៏ដូចជាអាហារថ្ងៃត្រង់ សម្រាប់សិស្សដែលស្នាក់នៅច្រើនម៉ោងនៅសាលា។
ដើម្បីឱ្យការបើកសាលារៀនវិញមានសុវត្ថិភាព ទាំងគ្រូបង្រៀន សិស្ស និងបុគ្គលិកសិក្សា ត្រូវបង្ហាញបណ្ណចាក់វ៉ាក់សាំង មុនពេលចូលទៅក្នុងបរិវេណសាលា។
លោក សេង បូណា បានថ្លែងថា៖ «សម្រាប់សិស្សដែលមិនបានចាក់វ៉ាក់សាំងដោយមិនមានបញ្ហាសុខភាពពួកគេមិនត្រូវបានអនុញ្ញាតឱ្យចូលសាលារៀនឡើយ ប៉ុន្តែសិស្សានុសិស្សអាចធ្វើការរៀនពីចម្ងាយនៅផ្ទះជាធម្មតា។ លើសពីនេះដោយមានការសម្របសម្រួលពីអាជ្ញាធរមូលដ្ឋានលោកគ្រូ-អ្នកគ្រូ និងបុគ្គលិកទាំងអស់ត្រូវបានអនុញ្ញាតឱ្យធ្វើតេស្តឆាប់រហ័ស (Rapid-Test) ដើម្បីឱ្យប្រាកដថា បុគ្គលិកទាំងអស់ត្រូវបានតេស្តអវិជ្ជមានជំងឺកូវីដ ១៩»។
គ្រូបង្រៀន និងបុគ្គលិកសិក្សា ដែលមានអាយុលើសពី ៥០ ឆ្នាំឡើងដែលមិនត្រូវបានចាក់វ៉ាក់សាំងដោយបញ្ហាសុខភាព និងសិស្សដែលមានបញ្ហាសុខភាពដែលមិនបានចាក់វ៉ាក់សាំងត្រូវបានតម្រូវឱ្យបង្រៀន និងរៀនពីចម្ងាយ។
សាលាអន្តរជាតិ ទ្រូ វីហ្សិនកម្ពុជា ត្រូវបានបង្កើតឡើងក្នុងឆ្នាំ ២០១៣ ក្រោមបេសកកម្មដែលកំណត់យ៉ាងច្បាស់លាស់ ពោលគឺសាលារៀនអន្តរជាតិ ទ្រូ វីហ្សិនកម្ពុជា មានការតាំងចិត្តខ្ពស់ និងប្រាកដប្រជាក្នុងការកសាងសមត្ថភាព និងអភិវឌ្ឍន៍ជំនាញរបស់សិស្ស។ ស្ថាប័ននេះផ្តល់ការអប់រំទាំងភាសាអង់គ្លេស ខ្មែរ និងចិន ចាប់ពីថ្នាក់មត្តេយ្យ រហូតដល់កម្រិតវិទ្យាល័យ ហើយបច្ចុប្បន្នមាន ៧ សាខា៕