.jpg)
DragonFly និយាយថាខ្លួនធ្វើការយ៉ាងជិតស្និទ្ធជាមួយដៃគូស្ថាប័នឯកជននៅក្នុងសហគមន៍កីឡាអេឡិចត្រូនិក។ រូបថត Supplied
សាលាកីឡាអេឡិចត្រូនិក DragonFly E-Learning''s Academy ដែលមានស្នាក់ការនៅទីក្រុងភ្នំពេញ កំពុងដាក់ឱ្យដំណើរការកម្មវិធីបណ្តុះបណ្តាល ដើម្បីបង្កើតអ្នកលេងកីឡាអេឡិចត្រូនិកអាជីពសម្រាប់គំរូអាជីវកម្មដែលកំពុងរីកចម្រើនយ៉ាងឆាប់រហ័សមួយនេះ។
ក្រុមហ៊ុនកំពុងលើកទឹកចិត្តយុវជនកម្ពុជាឱ្យចូលរួមក្នុងកម្មវិធីផ្តល់អាហារូបករណ៍ដំបូង (ISO) របស់ខ្លួន ដែលសិក្ខាកាមត្រូវបានបង្រៀនអំពីទ្រឹស្តី និងការអនុវត្តជាក់ស្តែងអំពីកីឡាអេឡិចត្រូនិក។
លោក រិទ្ធ វណ្ណៈ នាយកសាលា DragonFly E-Learning បានមានប្រសាសន៍ថា៖ «យើងកំពុងផ្តល់ឱកាសដល់យុវជនកម្ពុជា ដើម្បីស្វែងយល់អំពីគំរូនៃការលេង ដែលកំពុងតែពេញនិយម។ វាគឺជាឧស្សាហកម្មដែលកំពុងរីកចម្រើនខ្លាំងនៅក្នុងប្រទេសហ្វីលីពីន និងប្រទេសថៃ។ ប្រទេសកម្ពុជាមានមូលដ្ឋានគ្រឹះកីឡាអេឡិចត្រូនិកផ្ទាល់ខ្លួន ហើយយើងគិតថាវាជាពេលវេលាដ៏ល្អ ដើម្បីណែនាំគំរូនេះ ជាពិសេសក្នុងអំឡុងជំងឺកូវីដ ១៩ រាតត្បាត។
កីឡាអេឡិចត្រូនិកថ្មីនេះ អនុញ្ញាតឱ្យអ្នកលេងកីឡាអេឡិកត្រូនិកអាចរកប្រាក់ចំណូលបាន ឬទ្រព្យឌីជីថល។ សាលាកីឡាអេឡិចត្រូនិកនេះមានទីតាំងស្ថិតនៅអគារ Aquation Office Park ផ្តល់ការបណ្តុះបណ្តាលជំនាញ និងកន្លែងការងារសម្រាប់សិក្ខាកាមនៅកម្ពុជា ដែលមានបំណងចង់បន្តអាជីពក្នុងវិស័យកីឡាអេឡិចត្រូនិកអាជីព តាមរយៈកម្មវិធី ISO ។
កម្មវិធីរៀនកីឡាអេឡិចត្រូនិក របស់សាលា DragonFly E-Learning គឺផ្តោតលើការជ្រើសរើស និងបណ្តុះបណ្តាល អ្នកមានទេពកោសល្យ សម្រាប់ឧស្សាហកម្មកីឡាអេឡិចត្រូនិកប្រកបដោយជំនាញវិជ្ជាជីវៈ ក៏ដូចជាការផ្តល់ឱ្យពួកគេនូវផ្លូវរីកចម្រើននៅក្នុងអាជីពច្បាស់លាស់ និងទូលំទូលាយ។
«យើងមានក្តីរីករាយក្នុងការបើកដំណើរការសាលាបណ្តុះបណ្តាលនេះនៅក្នុងប្រទេសកម្ពុជា និងនាំមកនូវឱកាសការងារដល់សហគមន៍នៅកម្ពុជា។ ជាមួយយុវជនជំនាន់ក្រោយដែលមានចំណេះដឹងផ្នែកបច្ចេកវិទ្យា ប្រទេសកម្ពុជាមានសក្តានុពលច្រើននៅក្នុងការអភិវឌ្ឍកីឡាអេឡិចត្រូនិករបស់ខ្លួន»។
លោក វណ្ណៈ បន្ថែមថា៖ «នេះគឺជាឱកាសមួយសម្រាប់អ្នកចូលរួមថ្មីនៅក្នុងឧស្សាហកម្មកីឡាអេឡិចត្រូនិក ដើម្បីឈានទៅដល់កម្រិតអាចលេងបាន ដែលត្រូវទទួលការបណ្តុះបណ្តាល និងធ្វើការនៅកន្លែងការងារដែលមានប្រាក់ខែល្អ និងអាចឱ្យពួកគេលេង និងរកប្រាក់ចំណូលបានក្នុងពេលតែមួយ»។
កម្មវិធី ISO ធ្វើការយ៉ាងជិតស្និទ្ធជាមួយដៃគូស្ថាប័នឯកជននៅក្នុងសហគមន៍កីឡាមួយនេះ ដើម្បីផ្តល់មូលនិធិ ក៏ដូចជាការបណ្តុះបណ្តាលជំនាញវិជ្ជាជីវៈ និងឱកាសការងារសម្រាប់សិក្ខាកាម ដែលមានសក្តានុពលរបស់ខ្លួន។
សាលាមានទីតាំងស្ថិតនៅអគារ Aquation Office Park នៅកោះពេជ្រ។
ក្រុមបណ្តុះបណ្តាលរបស់សាលា DragonFly E-Learning ដែលរួមមានអ្នកលេងកីឡាអេឡិចត្រូនិកអាជីព គឺពឹងផ្អែកលើកម្មវិធីសិក្សាដ៏ទូលំទូលាយ ដើម្បីណែនាំអ្នកចូលរួមតាមរយៈដំណើរការមួយជំហានម្តងៗ ដែលត្រូវបានរៀបចំឡើងដើម្បីដឹកនាំពួកគេតាំងពីចាប់ផ្តើមដំបូងសម្រាប់អ្នក ដែលមានជំនាញតិចតួច ឬគ្មាន និងអ្នកមានបទពិសោធដែលកំពុងមានតម្រូវការខ្ពស់ពីសហគមន៍កីឡាអេឡិចត្រូនិក។
កីឡាអេឡិចត្រូនិកកម្ពុជា គឺជាឧស្សាហកម្មដែលមានតម្លៃរាប់ពាន់លានដុល្លារ នេះបើយោងតាមអ្នកជំនាញ ដែលវាគឺជាមធ្យោបាយមួយដើម្បីជួយអភិវឌ្ឍសេដ្ឋកិច្ចកម្ពុជាបន្ថែមទៀត ហើយវាក៏ត្រូវបានគេប៉ាន់ប្រមាណថាមានអ្នកលេងកីឡាអេឡិចត្រូនិកច្រើនជាង ២ លាននាក់នៅក្នុងប្រទេសកម្ពុជា ហើយចំនួននេះទំនងជានឹងកើនឡើងបន្ថែមទៀត ខណៈឱកាសកាន់តែបើកចំហនៅក្នុងវិស័យមួយនេះ។
សាលាកីឡាអេឡិចត្រូនិក DragonFly E-Learning''s Academy នៅកម្ពុជា គឺជាមជ្ឈមណ្ឌលដំបូងគេបង្អស់ ដែលត្រូវបានបង្កើតឡើងដោយស្ថាប័ន ហើយរំពឹងថានឹងជ្រើសរើស ក៏ដូចជាបណ្តុះបណ្តាលសិក្ខាកាមថ្មីចំនួន ១០ ម៉ឺននាក់ ត្រឹមចុងឆ្នាំ ២០២២។
មានការប៉ាន់ស្មានថានៅកម្ពុជាមានអ្នកលេងកីឡាអេឡិចត្រូនិកប្រមាណ ២ លាននាក់។
ចំនួនសិក្ខាកាមត្រូវបានរំពឹងថានឹងកើនឡើងបន្ថែមទៀត ស្របជាមួយកំណើននៃចំនួនកន្លែងបណ្តុះបណ្តាលដែលបង្កើតឡើងដោយ DragonFly E-Learning Academy នៅទូទាំងបណ្តាប្រទេសអាស៊ីអាគ្នេយ៍ផ្សេងទៀត ក្នុងរយៈពេលដ៏ខ្លី។
លោក វណ្ណៈ បានបន្តថា៖ «ខណៈឧស្សាហកម្មកីឡាអេឡិចត្រូនិកបន្តរីកចម្រើន ហើយមនុស្សកំពុងគិតឡើងវិញអំពីអាជីពរបស់ពួកគេ សាលា DragonFly E-Learning Academy តាមរយៈកម្មវិធី ISO របស់ខ្លួនបានច្នៃប្រឌិតវិធីសាស្ត្រ ដើម្បីបង្កើតអ្នកលេងកីឡាជំនាញ ដែលកំពុងមានតម្រូវការខ្ពស់នៅក្នុងឧស្សាហកម្មកីឡាអេឡិចត្រូនិក»៕
