រមណីយដ្ឋានថ្ងៃបាំងឆត្រគឺជាកន្លែងសម្រាប់សម្រាកលម្ហែដ៏មនោរម្យ ខណៈប្រទេសកម្ពុជាចាប់ផ្តើម បើកប្រទេសឡើងវិញសន្សឹមៗពីការរឹតបន្តឹងដោយជំងឺកូវីដ ១៩។ ទន្ទឹមនឹងនេះមេចុងភៅនៃរមណីយដ្ឋានដ៏ប្រណីតនេះបានឱ្យដឹងថា ឥឡូវនេះ វាជាពេលវេលាដើម្បី «បញ្ចូលថាមពលធ្វើឱ្យស្រស់ស្រាយ និងផ្តល់ផាសុកភាព។ លោក Jay Scaif ដែលជាមេចុងភៅជនជាតិកាណាដាដ៏ល្បីឈ្មោះនៅក្នុងអំឡុងពេលរឹតបន្តឹងនេះ លោកបានប្រើពេលសង្កេត និងកែប្រែមុខ ម្ហូបនៅភោជនីយដ្ឋាន The Strand ដែលជាភោជនីយដ្ឋានលំដាប់ខ្ពស់នៅក្នុងខេត្តកែប ខណៈមុខម្ហូបថ្មីរបស់ភោជនីយដ្ឋាន និងបារ៍ Sailing Club នឹងបើសម្ពោធនៅក្នុងពិធីបុណ្យអុំទូកនាពេលខាងមុខ។
«បញ្ជីមុខម្ហូបនៅភោជនីយដ្ឋាន The Strand ត្រូវបានរចនាឡើងដើម្បីរសជាតិពិសេស បន្ទាប់ពីរយៈពេល ២ ឆ្នាំចុងក្រោយនៃការរឹតត្បិត ពេលនេះភ្ញៀវអាចធ្វើដំណើរឡើងវិញបានហើយ។
បញ្ចីមុខម្ហូបពិសេសនេះ មានអាហារចម្រុះបែបបារាំង និងអ៊ីតាលី។ ឥឡូវនេះមានម្ហូបបែបខ្មែរ បែបបារាំង បែបអ៊ីតាលី និងមានម្ហូបបែបជប៉ុនខ្លះដែរ ដែលផ្តោតការយកចិត្តទុកដាក់ខ្ពស់លើរសជាតិដែលភ្ញៀវពេញចិត្ត»។
«ដោយផ្អែកលើចក្ខុវិស័យនិរន្តរភាពដើម្បីការ «កាត់បន្ថយ ប្រើប្រាស់ឡើងវិញ និងការកែច្នៃ» យើងបានបង្កើតបទពិសោធថ្មីនៅភោជនីដ្ឋាន The Strand ក្រោមពាក្យស្លោក« បញ្ចូលថាមពល, ធ្វើឱ្យស្រស់ស្រាយ និងផាសុកភាព»។ បទពិសោធនៃការទទួលទានអាហារនៅភោជនីយដ្ឋាន The Strand កំពុងផ្តោតលើសមាសធាតុទាំងនេះ ដើម្បីបង្កើននូវបទពិសោធនៃការបរិភោគអាហារឱ្យកាន់តែឈ្ងុយឆ្ងាញ់។
លោក Scaife ថ្លែងថា៖ «អាហារដ៏អស្ចារ្យមួយពេលនឹងផ្តល់នូវថាមពលដល់ទាំងអារម្មណ៍ និងរាងកាយរបស់អ្នកឱ្យកាន់តែរឹងមាំ តាមរយៈគ្រឿងផ្សំប្រកបដោយភាពច្នៃប្រឌិត និងគុណភាពខ្ពស់។ អហាររបស់យើងត្រូវបានរៀបចំឡើង ដើម្បីធ្វើឱ្យដក់ជាប់នៅក្នុងអារម្មណ៍យូរអង្វែង មិនមែនគ្រាន់តែជាការញុំាអាហារធម្មតាប៉ុណ្ណោះទេ ប៉ុន្តែជាអាហារដែលផ្តល់នូវថាមពលធ្វើឱ្យអ្នកមានអារម្មណ៍ស្រស់ស្រាយ ហើយចង់វិលត្រឡប់មកវិញ»។
អ្នកគ្រប់គ្រងទូទៅនៃរមណីយដ្ឋានថ្ងៃបាំងឆត្រ លោក Estelle Bergandi បានឱ្យដឹងថា គុណសម្បត្តិដែលធ្វើឱ្យលោក Scaife ក្លាយជាចុងភៅកំពូល គឺតំណាងឱ្យការច្នៃប្រឌិតនូវបញ្ជីមុខម្ហូបថ្មីរបស់រមណីយដ្ឋាន។
លោក Bergandi បានថ្លែងថា៖ «ភាពរឹងមាំ ការសម្របខ្លួន និងការច្នៃប្រឌិតរបស់គាត់ក្នុងអំឡុងពេលដ៏លំបាកនេះ ត្រូវបានឆ្លុះបញ្ចាំងនៅក្នុងបញ្ជីមុខម្ហូបថ្មីនេះ។ មានការសហការគ្នាយ៉ាងល្អនៅក្នុងចំណោមបុគ្គលិកផ្ទះបាយ ហើយមូលហេតុគឺដោយសារតែគាត់គឺជាអ្នកដឹកនាំគំរូ»។
រមណីយដ្ឋានថ្ងៃបាំងឆត្រ ត្រូវបានទទួលស្គាល់ជាអន្តរជាតិចំពោះអាជីវកម្មប្រកបដោយនិរន្តរភាពរបស់ខ្លួន ដែលជារមណីយដ្ឋានប្រណីតនៅឆ្នេរសមុទ្រក្នុងខេត្តកែប ដែលផ្តោតលើការផ្តល់នូវបទពិសោធដ៏អស្ទារ្យក៏ដូចជាទទួលទានអាហារដ៏ឈ្ងុយឆ្ងាញ់។
លោក Scaife បញ្ជាក់ថា៖ «ភោជនីយដ្ឋាន The Strand គឺជាកន្លែងផ្តល់ថាមពលដល់ទាំងអារម្មណ៍ និងរាងកាយ ដើម្បីទទួលយកបទពិសោធនៃការបរិភោគអាហារដ៏រីករាយ បន្ទាប់ពីរវល់ជាមួយការងារក្នុងជីវិតប្រចាំថ្ងៃ។ ភោជនីយដ្ឋាន The Strand ផ្តោតលើរសជាតិក្នុងស្រុក និងបច្ចេកទេសចម្អិនអាហារអន្តរជាតិ ក៏ដូចជាគ្រឿងផ្សំក្នុងស្រុកដែលមានលក្ខណពិសេសប្លែកពីគេ»។
ហើយចំពោះភោជនីយដ្ឋាន និងបារ Sailing Club គ្រោងធ្វើបាងហ្គាឡូពីឈើបែបបុរាណនៅមាត់សមុទ្រ ដែលមានបរិយាកាសស្រស់ស្រាយលក្ខណៈគ្រួសារ ដែលធ្វើឱ្យវាក្លាយជាកន្លែងដ៏ល្អបំផុតសម្រាប់សម្រាកលម្ហែ និងរីករាយជាមួយទេសភាពថ្ងៃរៀបលិចដ៏ស្រស់ត្រកាលនៃខេត្តកែប។
«ភោជនីយដ្ឋាន និងបារ Sailing Club គឺជាភាពទាក់ទាញមួយទៀតដែលមិនគួរមើលរំលង នៅពេលអ្នកមកកម្សាន្តនៅខេត្តកែប ដោយសារតែភាពទាក់ទាញនៃមុខម្ហូប និងតម្លៃដ៏សមរម្យ ដែលសាកសម សម្រាប់គូស្វាមីភរិយា ក៏ដូចជាក្រុមគ្រួសារ ជាមួយមុខម្ហូបចម្រុះនៃអាហារសមុទ្រក្នុងស្រុក និងរសជាតិបែបបស្ចិមប្រទេសដ៏ឈ្ងុយឆ្ងាញ់»។
«ទស្សនៈនៃការចម្អិនម្ហូបរបស់ខ្ញុំតែងតែគិតអំពី «រសជាតិ សោភណភាព និងអារម្មណ៍»។ រសជាតិអនុញ្ញាតឱ្យអ្នកដែលជាមេចុងភៅបន្តការស្វែងរកភាពល្អឥតខ្ចោះ និងស្វែងរកអ្វីដែលល្អបំផុតដើម្បីបង្កើនរសជាតិ។ សោភណភាពគឺជារបៀបដែលអ្នកបង្កើតរសជាតិ និងបង្កើនបទពិសោធនៃការបរិភោគអាហារ ដើម្បីបង្កើតអារម្មណ៍ខុសៗគ្នា នៅពេលភ្លក្សរសជាតិអាហារទាំងនោះ»។
«ចំពោះអារម្មណ៍គឺវាមានអត្ថន័យទ្វេដង។ មេចុងភៅអាចមានអារម្មណ៍អស្ចារ្យនៅពេលអាហារមានរសជាតិដ៏ឈ្ងុយឆ្ងាញ់ ហើយភ្ញៀវមានអារម្មណ៍ល្អក្នុងការទទួលយកបទពិសោធបែបនោះ»។
លោក Scaif បន្ថែមថា៖ «អាហារគឺផ្តល់ថាមពលដល់រាងកាយរបស់យើង ហើយវាតែងតែធ្វើឱ្យយើងមានអារម្មណ៍ល្អជានិច្ច។ ខ្ញុំចង់ឱ្យអាហាររបស់ខ្ញុំផ្តល់នូវភាពរីករាយដល់អ្នកបរិភោគ ខណៈពួកគាត់រីករាយគយគន់ទេសភាព និងស្ថាបត្យកម្មដ៏ស្រស់ត្រកាលនៃរមណីយដ្ឋានដ៏អស្ចារ្យមួយនេះ»។
សណ្ឋាគារនៅរមណីយដ្ឋានថ្ងៃបាំងឆត្រគឺជាសណ្ឋាគារមួយក្នុងចំណោមសណ្ឋាគារតិចតួចបំផុតនៅលើពិភពលោក ដែលទទួលបានស្តង់ដា platinum ខ្ពស់បំផុតពី GreenGrowth 2050 ដែលជាក្រុមប្រឹក្សាទេសចរណ៍ប្រកបដោយនិរន្តរភាពជាសកល ដែលទទួលស្គាល់កម្រិតស្តង់ដា។
លោកថ្លែងថាបញ្ជីមុខម្ហូបនៅភោជនីយដ្ឋាន Strand តំណាងឱ្យអ្វីដែលគាត់មើលឃើញថា ជាការផ្លាស់ប្តូរនៅក្នុងបទពិសោធនៃការទទួលទានអាហារនៃអាជីវកម្មដែលផ្តោតសំខាន់លើនិរន្តរភាព។
«តាមទស្សនៈខ្ញុំ អនាគតនៃការទទួលទានអាហារដ៏ឈ្ងុយឆ្ងាញ់គឺមេចុងភៅត្រូវពង្រីកជំនាញរបស់ពួកគេឱ្យកាន់តែទូលំទូលាយ។ ការប្រើប្រាស់ទេពកោសល្យរបស់ពួកគេលើការច្នៃប្រឌិតគ្រឿងផ្សំធ្វើឱ្យពួកគេកាន់តែក្លាយជាចុងភៅដ៏ពូកែ»។
«មេចុងភៅដែលពូកែត្រូវតែដឹងអំពីរបៀបដាំដុះដូចកសិករ ដើម្បីងាយស្រួលគ្រប់គ្រងគ្រឿងផ្សំទាំងអស់នៅក្នុងផ្ទះបាយរបស់ពួកគេ គឺរាប់ចាប់ពីការដាំដុះ រហូតដល់ក្លាយជាអាហារនៅលើតុ។
លោក Scaif បន្ថែមថា៖ «ផ្នែកដ៏ល្អបំផុត គឺអាហារឈ្ងុយឆ្ងាញ់ដែលងាយស្រួលរក ហើយអាហារឈ្ងុយឆ្ងាញ់មិនមែនទាល់តែអាហារនោះមានតម្លៃថ្លៃនោះទេ ប៉ុន្តែវាគឺជាជំនាញនៃការចម្អិន និងច្នៃប្រឌិតនូវម្ហូបអាហារទាំងនោះឱ្យកាន់តែមានភាពទាក់ទាញ និងមានរសជាតិពិសេស»៕