ស្រាក្រឡុកម៉ាក Bottl''it គឺជាគំនិតច្នៃប្រឌិតរបស់អ្នកជំនាញខាងលាយស្រាជនជាតិបារាំងដ៏ឆ្នើម គឺអ្នកស្រី Mathilde Thillay ដែលផ្តល់ឱ្យ អ្នកចូលចិត្តស្រាក្រឡុកនៅកម្ពុជា នូវរសជាតិដ៏ឈ្ងុយឆ្ងាញ់ និងតម្លៃសមរម្យ។
អ្នកស្រី Thillay ថ្លែងថា ខណៈស្រាក្រឡុកកាន់តែមានប្រជាប្រិយភាពនៅក្នុងប្រទេសកម្ពុជា ប៉ុន្តែនៅខ្វះ អ្នកមានជំនាញចំពោះភេសជ្ជៈប្រភេទនេះ ដូច្នេះទើបអាជីវកម្មអនឡាញរបស់អ្នកស្រី បោះជំហានចូលមក បើកជាសិប្បកម្មផលិតស្រាក្រឡុកដបដ៏ពេញនិយមជាច្រើនប្រភេទ។
«ប្រជាជននៅកម្ពុជាចាប់អារម្មណ៍លើស្រាក្រឡុកកាន់តែច្រើន គឺដូចគ្នាកាលពី ១០ ឆ្នាំមុននៅប្រទេសបារាំងដែរ ហើយសព្វថ្ងៃវាមានទីផ្សារដ៏ធំ នៅទីនោះ»។
«ប៉ុន្តែ កម្រមានអ្នកក្រឡុកស្រាដែលទទួលបានការបណ្តុះបណ្តាលត្រឹមត្រូវ និងយល់ពីសារៈសំខាន់នៃការប្រើប្រាស់ផលិតផលដែលមានគុណភាពខ្ពស់ ឬការទទួលបានតុល្យភាពត្រឹមត្រូវនៅក្នុងស្រាក្រឡុកណាស់»។
អ្នកស្រី Thillay បន្តថា៖ «នៅក្នុងប្រទេសកម្ពុជា យើងរស់នៅក្នុងប្រទេសមួយដែលមានផលិតផលស្រស់ៗដ៏សម្បូរបែប ដូចជាផ្លែឈើ ប៉ុន្តែបារ៍មួយចំនួន នៅតែប្រើទឹកផ្លែឈើដែលមានគុណភាពទាប ឬទឹកស៊ីរ៉ូដប ជំនួសឱ្យការធ្វើវាដោយខ្លួនឯង។ សព្វថ្ងៃ ភាគច្រើនអ្នកចំណាយលើកន្លែងច្រើនជាងភេសជ្ជៈ»។
ដើម្បីដោះស្រាយបញ្ហានេះ អ្នកស្រីបានគិតជាយូរមកហើយថានឹងចាប់ផ្តើមអាជីវកម្មមួយដើម្បីផ្តល់ជូនស្រាក្រឡុកដ៏ល្អដែលកំពុងរីកចម្រើននៅកម្ពុជា ខណៈបច្ចុប្បន្នស្រាក្រឡុក Bottl''it មានជាច្រើនប្រភេទ ហើយអ្នកស្រី ចង់ប្រើគ្រឿងផ្សំក្នុងស្រុកឱ្យបានច្រើនបំផុតតាមដែលអាចធ្វើបាន។
«បច្ចុប្បន្នយើងមានស្រាក្រឡុកប្រហែល ១៧ ប្រភេទផ្សេងៗគ្នា។ យើងផ្តល់ជូននូវស្រាក្រឡុកបែបបុរាណដូចជា Negroni, Penicillin, Martini និងរសជាតិមួយចំនួនលាយគ្រឿងផ្សំបែបអាស៊ីដូចជា Mango Chili Margarita, Boulevardier ជាមួយកាហ្វេមណ្ឌលគិរី ឬ Manhattan ជាមួយការី»។
«យើងក៏អាចបង្កើតស្រាក្រឡុកថ្មីៗតាមតម្រូវការពិសេសផងដែរ។ ខណៈពេលដែលយើងព្យាយាមប្រើប្រាស់ផលិតផលដែលមានគុណភាពខ្ពស់ និងគ្រឿងផ្សំក្នុងស្រុកឱ្យបានច្រើនតាមតែអាចធ្វើទៅបាន ប៉ុន្តែយើងនៅមិនទាន់អាចស្វែងរកអ្វីគ្រប់យ៉ាងនៅកម្ពុជាក្នុងតម្លៃសមរម្យនៅឡើយ»។
«យើងផ្តល់ជូននូវសេវាកម្មប្រឹក្សាយោបល់ ដើម្បីជួយដល់ការរីកលូតលាស់ និងកែលម្អអាជីវកម្មអាហារ និងភេសជ្ជៈ រាប់ចាប់ពីការបង្កើតឧបករណ៍គ្រប់គ្រង រហូតដល់ការមកគ្រប់គ្រងកន្លែងនោះ ២-៣ ខែ ដើម្បីអនុវត្តការងារឱ្យកាន់តែមានប្រសិទ្ធភាព និងបណ្តុះបណ្តាលបុគ្គលិក។ ទាំងអស់នេះវាអាស្រ័យលើកញ្ចប់ថវិកា និងតម្រូវការរបស់អតិថិជន»។
អ្នកស្រី Thillay បញ្ជាក់ថា៖ «ថ្មីៗនេះយើងបានរៀបចំកម្មវិធីប្រារព្ធខួបមួយ ដែលមានភ្ញៀវចូលរួមប្រមាណ ៥០ នាក់ ដោយក្រុមការងាររបស់ខ្ញុំបានចាត់ចែងខាងភេសជ្ជៈ ហើយភោជនីយដ្ឋាន Pepe Bistrot រៀបចំម្ហូបអាហារ ដែលវាគឺជាបទពិសោធដ៏អស្ចារ្យ»។
ស្ត្រីដែលមានដើមកំណើតមកពីតំបន់ Normandy រូបនេះ បានលើកឡើងថា ខណៈដែលអ្នកស្រីបានចាប់ផ្តើមសហគ្រាសដំបូង ដើម្បីឆ្លើយតបនឹងកំណើនអ្នកចូលចិត្តស្រាក្រឡុកដែលកំពុងកើនឡើងនៅកម្ពុជា អ្នកស្រីក៏បានមើលឃើញឱកាសអាជីវកម្មកើនឡើងយ៉ាងឆាប់រហ័សដែរ។
«ពីដំបូង យើងផ្តោតតែទៅលើអ្នកដែលចូលចិត្តស្រាក្រឡុកជាលក្ខណៈបុគ្គលប៉ុណ្ណោះ ដែលមិនដឹងពីរបៀបធ្វើវាឱ្យបានត្រឹមត្រូវ ឬមិនចង់វិនិយោគច្រើនលើឧបករណ៍»។
អ្នកស្រី Thillay បានបន្តថា៖ «ប៉ុន្តែបន្តិចមក យើងបានដឹងថាក៏មានទីផ្សារសម្រាប់អាជីវកម្មផងដែរ ដែលភាគច្រើនជាភោជនីយដ្ឋាន និងបារ៍ ដែលមិនមានឧបករណ៍ ឬបុគ្គលិកធ្វើស្រាក្រឡុកបានត្រឹមត្រូវ ប៉ុន្តែមានអតិថិជនដែលពេញចិត្តពួកគេ។ ដូច្នេះ បច្ចុប្បន្នយើងផ្តល់ជូនផលិតផលរបស់យើងក្នុងបរិមាណកាន់តែច្រើនជាមួយនឹងតម្លៃលក្ខណៈអាជីវកម្ម (B2B)»។
អ្នកស្រីលើកឡើងថាសូម្បីតែអ្នកនៅក្នុងឧស្សាហកម្មនេះក៏អាចទទួលបានអត្ថប្រយោជន៍ពីការប្តេជ្ញាចិត្តរបស់អ្នកស្រីចំពោះជំនាញនេះដែរ បទពិសោធដ៏ច្រើនរបស់អ្នកស្រីជួយដល់អ្នកដែលចង់ស្វែងរកពិភពស្រាក្រឡុកដ៏អស្ទារ្យ។
«ខ្ញុំបានបញ្ចប់ការសិក្សាពីសាលា (bartending school) ប្រហែល ១០ ឆ្នាំមុននៅប្រទេសបារាំង។ បន្ទាប់មកខ្ញុំបានធ្វើការនៅបារ៍ផ្សេងៗរហូតដល់ខ្ញុំមានឱកាសចូលរួមជាមួយក្រុមដ៏អស្ចារ្យមួយ Quixotic Project នៅប្រទេសបារាំង ជាកន្លែងដែលខ្ញុំអាចរៀនបានច្រើនអំពីស្រាក្រឡុក។ ខ្ញុំចាប់ផ្តើមជាអ្នកក្រឡុកស្រា បន្ទាប់មកក្លាយជាអ្នកគ្រប់គ្រង»។
«ខ្ញុំបានទិញសៀវភៅជាច្រើន ហើយខ្ញុំតែងតែអានច្រើនអំពីបារ៍ដែលមានស្រាក្រឡុក និងអ្នកក្រឡុកស្រាដែលល្អបំផុត ក៏ដូចជាតាមដានព្រឹត្តិការណ៍អន្តរជាតិនានាដូចជាសន្និសីទ Tales of Cocktails និងការប្រកួតប្រជែង Speed Racks ជាដើម»។
អ្នកស្រីបានថ្លែងថា៖ «ខណៈដែលស្រាក្រឡុកម៉ាក Bottl''it អាចបម្រើក្នុងព្រឹត្តិការណ៍លក្ខណៈឯកជន ឬសាធារណៈជាមួយនឹងកញ្ចប់ផ្សេងៗ និងផ្តល់ការប្រឹក្សាសម្រាប់អាជីវកម្មដែលកំពុងស្វែងរកការកែលម្អរបារ៍របស់ពួកគេហើយនោះ យើងថែមទាំងអាចបង្រៀនសម្រាប់អ្នកដែលចង់ស្វែងយល់បន្ថែមអំពីស្រាក្រឡុក និងស្រាផងដែរ»៕