The Phnom Penh Post Search

Search form




Logo of Phnom Penh Post newspaper Phnom Penh Post - ជាង ១៣​ឆ្នាំ​អង្គការ Operation Smile កម្ពុជា ព្យាបាល​អ្នក​មាន​បញ្ហា​ឆែប​មាត់​ជាង​៣​ពាន់​នាក់

ជាង ១៣​ឆ្នាំ​អង្គការ Operation Smile កម្ពុជា ព្យាបាល​អ្នក​មាន​បញ្ហា​ឆែប​មាត់​ជាង​៣​ពាន់​នាក់

សកម្មភាព​របស់​ក្រុម​គ្រូពេទ្យ​ស្ម័គ្រ​ចិត្ត Operation Smile និង​អ្នក​ជំងឺ​ឆែប​មាត់​នៅ​កម្ពុជា
សកម្មភាព​របស់​ក្រុម​គ្រូពេទ្យ​ស្ម័គ្រ​ចិត្ត Operation Smile និង​អ្នក​ជំងឺ​ឆែប​មាត់​នៅ​កម្ពុជា។ រូបថត សហការី

ជាង ១៣​ឆ្នាំ​អង្គការ Operation Smile កម្ពុជា ព្យាបាល​អ្នក​មាន​បញ្ហា​ឆែប​មាត់​ជាង​៣​ពាន់​នាក់

កាលពី​សប្តាហ៍​មុន អំឡុង​ថ្ងៃទី​១៥-២០ ខែ​មីនា ក្រុម​គ្រូពេទ្យ​ស្ម័គ្រចិត្ត និង​អ្នក​ស្ម័គ្រចិត្ត​របស់​អង្គការ Operation Smile ចំនួន​៣៩​នាក់ មក​ពី ​១១​ ប្រទេស ក្នុង​នោះ​មាន​មក​ពី​អាមេរិក កាណាដា និង​ស្វីស ជាដើម ដោយ​ពួក​គេ​បាន​រួម​គ្នា​បំពេញ​បេសកកម្ម​របស់​ខ្លួន​ក្នុង​ការ​វះកាត់​ព្យាបាល​ដល់​អ្នក​ជំងឺ​ឆែប​បបូរ​មាត់ និង​ឆែប​ក្រអូម​មាត់​ចំនួន ៦៥ ​នាក់ និង​ផ្តល់​ការ​ត្រួត​ពិនិត្យ​សុខភាព​ទូទៅ​ចំនួន​ជាង ​១០០ ​នាក់​ទៀត​។

ក្នុង​អំឡុង​ពេល ១៣​ឆ្នាំ​កន្លង​មក​នេះ​អង្គការ Operation Smile Cambodia បាន​ផ្តល់​សេវាកម្ម​ផ្នែក​វះកាត់​អ្នក​ជំងឺ​មាន​បញ្ហា​មាត់​ឆែប​ជាច្រើន​នាក់ ដោយ​ឥត​គិត​ថ្លៃ។

«​រហូត​មក​ដល់​ឆ្នាំ​២០១៥​នេះ មាន​អ្នក​ជំងឺ​ជាង​៧០០០​នាក់ ហើយ​ដែល​ទទួល​បាន​ការ​ពិនិត្យ​ និង​ពិគ្រោះ​យោបល់​ និង​បាន​ធ្វើ​ការ​ព្យាបាល​ដល់​អ្នក​ជំងឺ​ចំនួន​៣,៦០០​នាក់​»។ នេះ​បើ​តាម​ការ​អះអាង​របស់​លោក Jay McCord នាយក​ប្រចាំ​ប្រទេស​នៃ​អង្គការ Operation Smile កម្ពុជា ប្រាប់​ប៉ុស្តិ៍ ភ្លឺស។

ខាង​ក្រោម​នេះ​គឺជា​សំណួរ​-​ចម្លើយ រវាង​លោក Jay និង​ប៉ុស្តិ៍ ភ្លឺស​។

សំណួរៈ តើ​អ្វី​ទៅ​ជា Operation Smile (​អូភើរ៉េស៊ិន ស្មាល)?

ចម្លើយៈ «Operation Smile (វះ កាត់​ដើម្បី​ញញឹម​) គឺជា​សកម្មភាព​សប្បុរស​ធម៌​អន្តរជាតិ​ទ្រទ្រង់​សុវត្ថិភាព​សុខុមាល​កុមារ ក្នុង​ការ​ព្យាបាល​ដោយ​វះកាត់​ចំពោះ​អ្នក​មាន​បញ្ហា ឆែប​បបូរ​មាត់ និង​ឆែប​ក្រអូម​មាត់ នៃ​ផ្នែក​ខាង​ក្នុង​មាត់ រួម​ទាំង​ការ​ផ្តល់​សេវាកម្ម​ផ្គត់ផ្គង់​ថ្នាំ​សង្កូវ​ដល់​ពួក​គេ​បន្ទាប់​ពី​ការ​វះកាត់ និង​ការ​ថែទាំ​សុខភាព​ដែល​ត្រូវ​ការ​ចាំបាច់​។ កុមារ​ដែល​មាន​បញ្ហា​ឆែបមាត់ បង្ក​ឡើង​ដោយ​បញ្ហា​មួយ​ចំនួន រួមទាំង​កើត​មាន​មក​ពី​កំណើត​ផង​ដែរ​។

កុមារ​មាន​មាត់​ឆែប ដែល​នៅ​រស់រាន​មាន​ជីវិត​ពួក​គេ​មាន​ការ​ពិបាក​ក្នុង​ការ​ហូប​ចំណី​អាហារ និយាយ​ស្តី កា​ស្តាប់ឮ ឬក៏​ពិបាក​ដក​ដង្ហើម​ផង​ដែរ​។ នៅ​ទីកន្លែង​ខ្លះ​ពួក​គេ​ក៏​មាន​ការ​រើសអើង​ថែម​ទៀត​។ នៅ​ក្នុង​ករណី​ជាច្រើន​ទៀត​ឪពុក​ម្តាយ​របស់​ពួក​គេ ពុំ​មាន​លទ្ធភាព​ផ្តល់​ព្យាបាល ការ​វះកាត់ ដល់​ពួក​គេ ដើម្បី​ឲ្យ​ពួក​គេ​ទទួល​បាន​ជីវិត​រស់នៅ​ប្រកប​ដោយ​ផលិតភាព​នោះ​ទេ»។

សំណួរៈ តើ​ករណី​មាត់​ឆែប គឺជា​បញ្ហា​កើត​មាន​ចំពោះ​តែ​ប្រជាជន​កម្ពុជា​?

ចម្លើយៈ Operation Smile បាន​ចាប់​ផ្តើម​ឡើង​ក្នុង​ឆ្នាំ​ ១៩៨២ បន្ទាប់​ពី​សហ​ស្ថាបនិក គឺ​វេជ្ជបណ្ឌិត និង​អ្នក​ស្រី Kathy Magee បាន​ចូលរួម​ក្នុង​ការ​ព្យាបាល​កុមារ​នៅ​ប្រទេស​ហ្វីលីពីន និង​បន្ទាប់​មក​ពួក​គាត់​ស្វែង​យល់​ថា បញ្ហា​ឆែប​បបូរ​មាត់ និង​ឆែប​ក្រអូម​មាត់ គឺជា​បញ្ហា​សកល។ បញ្ហា ឆែប​បបូរ​មាត់ និង​ឆែប​ក្រអូម​មាត់ វា​បាន​កើត​ឡើង​លើ​ប្រជាជន​នៅ​គ្រប់​ប្រទេស​ក្នុង​ពិភពលោក ហើយ​វា​មិន​មែន​កើត​ឡើង​តែ​នៅ​ក្នុង​ប្រទេស​កម្ពុជា​ទេ ឬក៏​កើត​មក​ពី​ភាព​ក្រីក្រ​នោះ​ទេ​។

សំណួរៈ តើ​អ្នក​ដោះស្រាយ​បញ្ហា​នោះ​យ៉ាង​ដូច​ម្តេច នៅ​កម្ពុជា​?

ចម្លើយៈ Operation Smile កម្ពុជា មាន​គម្រោង​ការ​ពីរ​សំខាន់ៗ​៖ ទី​១ គឺ​ធ្វើ​ការ​ព្យាបាល​ដល់​អ្នក​ជំងឺ​ណា​​ដែល​មាន​បញ្ហា​ដោយ​សារ​ឆែប​បបូរ​មាត់ និង​ឆែប​ក្រអូម​មាត់​។ ទី​២ គឺ​ការ​ពិនិត្យ​និង​ព្យាបាល​អ្នក​ជំងឺ​ទូទៅ​មួយ​ចំនួន​ដោយ​ក្រុម​គ្រូ​ពេទ្យ​ជំនាញ​ដល់​ប្រជាជន​ក្នុង​ស្រុក​។

បន្ថែម​លើ​ពី​នោះ​ទៀត ចាប់​តាំង​ពី​ឆ្នាំ ​២០០២ ​មក យើង​បាន​បង្កើត​ជា​បេសកកម្ម​ធំៗ ២-៣​ ដង ក្នុង​មួយ​ឆ្នាំ ដោយ​អង្កការ Operation Smile កម្ពុជា ដូចជា​បាន​ផ្តល់​ជូន​នឹង​វគ្គ​បណ្តុះ​បណ្តាល​ដល់​ក្រុម​គ្រូ​ពេទ្យ ដើម្បី​ធ្វើ​ការ​វះកាត់ របៀប​ដាក់​ថ្នាំ​សណ្តំ ជីវសាស្ត្រ (​ការ​ព្យាបាល​ដោយ​ថ្នាំ​ពេទ្យ​ជាមួយ​នឹង​ការ​ធ្វើ​លំហាត់​កាយសម្បទា​) និង​ជាមួយ​គិលានុបដ្ឋាយិកា​។

អង្គការ Operation Smile មាន​មោទនភាព​ណាស់ គឺ​នូវ​រៀង​រាល់​បេសកកម្ម​របស់​យើង​ម្តងៗ តែង​មាន​ក្រុម​អ្នក​ស្ម័គ្រចិត្ត គ្រូពេទ្យ​ស្ម័គ្រចិត្ត បាន​ចូល​រួម​នៅ​ក្នុង​សកម្មភាព​មនុស្សធម៌​នេះ ដើម្បី​ព្យាបាល​ដល់​អ្នក​ជំងឺ​ប្រកប​ដោយ​គុណភាព​ខ្ពស់​។

សំណួរៈ តើ​អ្វី​ដែល​ជា​បញ្ហា​ប្រឈម​នៅ​ក្នុង​ការ​ព្យាបាល​របស់​អ្នក នៅ​កម្ពុជា​?

ចម្លើយៈ ភារកិច្ច​ចម្បង​របស់​យើង គឺ​ការ​ស្វែងរក​អ្នក​ជំងឺ​ដើម្បី​ព្យាបាល​ដោយ​ទៅ​ឲ្យ​ដល់​ទីតាំង​របស់​ពួក​គាត់។ ពួក​គាត់​រស់នៅ​ឆ្ងាយ​ពី​ទីប្រជុំជន​គឺ​ពុំ​មាន​ទឹក​ស្អាត ភ្លើង​អគ្គីសនី ទូរទស្សន៍ ឬក៏​វិទ្យុ​ស្តាប់​ទេ​។ គ្មាន​នរណា​ម្នាក់​គិត​គូរ​យក​ចិត្ត​ទុក​ដាក់​អំពី​ពួក​អ្នក​ជំងឺ​ទាំង​នោះ​ទេ​។ នោះ​ហើយ​គឺ​អ្វី​ដែល​យើង​មក​ទីនេះ​ដើម្បី​ជួយ​ពួក​គេ​។ យើង​ត្រូវ​ការ​ឲ្យ​ប្រជាជន​កម្ពុជា​មាន​ការ​យល់​ដឹង​អំពី​បញ្ហា​ជំងឺ​ឆែប​មាត់ គឺ​វា​អាច​ព្យាបាល​ជា​បាន ហើយ​យើង​រង់ចាំ​ជួយ​សង្គ្រោះ​ពួក​គេ​។ បើ​មាន​មនុស្ស​ច្រើន​យល់​ដឹង​អំពី​បញ្ហា​នេះ គឺ​ប្រាកដ​ជា​មាន​មនុស្ស​ច្រើន​នឹង​ជួយ​ចែក​រំលែក​អំពី​ព័ត៌មាន​វិជ្ជមាន​ទាំង​នោះ​។

ដើម្បី​ស្វែង​យល់​ដឹង​អំពី​បញ្ហា​នេះ​ ជា​បញ្ហា​អាច​ព្យាបាល​បាន ក៏​ជា​ការ​អាច​ ជួយ​សង្គ្រោះ​ជីវិត​កុមារ​ទើប​នឹង​កើត ដែល​អាច​ប្រឈម​ទៅ​នឹង​ការ​បោះ​បង់​ចោល ឬ​ខ្វះខាត​ចំណី​អាហារ​សម្រាប់​ចិញ្ចឹម​ពួក​គេ​ជាដើម​។

សំណួរៈ តើ​ការ​ផ្តល់​ព័ត៌មាន​ដល់​ប្រជាជន​មាន​ប្រសិទ្ធភាព​យ៉ាង​ណា​ដែរ​?

ចម្លើយៈ អ្វី​ដែល​គួរ​ឲ្យ​ភ្ញាក់​ផ្អើល​នោះ គឺ​អង្គការ Operation Smile កម្ពុជា គឺជា​អង្គការ​មួយ​នៅ​ក្នុង​ចំណោម​ប្រទេស​គោលដៅ​ទាំង​៧​ប្រទេស ដែល​ឈាន​ទៅ​លុប​បំបាត់​បញ្ហា ឆែប​បបូរ​មាត់ និង​ឆែប​ក្រអូម​មាត់ នៅ​ក្នុង​ចំណោម​៦០​ប្រទេស ដែល​មាន​អង្គការ Operation Smile នៅ​ទីនោះ​។ គឺ​មាន​ន័យ​ថា យើង​គឺជា​ប្រទេស​ដំបូង​គេ ដែល​ស្ថិត​នៅ​ក្នុង​បញ្ជី​នៃ​ការ​លុប​បំបាត់​ជំងឺ​ឆែប​ក្រអូម​មាត់ ដែល​យើង​មានតែ​ករណី​កុមារ​ទើប​នឹង​កើត​ថ្មី​តែ​ប៉ុណ្ណោះ​ដែល​ត្រូវ​ព្យាបាល​។

សម្រាប់​រូប​ខ្ញុំ នេះ​គឺជា​ឱកាស​ដ៏​មោទនភាព​នៅ​កម្ពុជា ដែល​ប្រព័ន្ធ​សុខាភិបាល ក្រុម​គ្រូពេទ្យ និង​ក្រុម​អ្នក​ពាក់ព័ន្ធ​នៅ​ទីនេះ តែង​តែ​សម្រេច​បាន​ការ​វះកាត់​ឆែប​ក្រអូម​មាត់១​ករណី​។ ភារកិច្ច​នេះ​នឹង​ផ្តល់​ឲ្យ​ក្រុម​គ្រូពេទ្យ​កម្ពុជា និង​គិលានុបដ្ឋាយិកា អាច​ឈាន​ទៅ​ជួយ​ដល់​បណ្តា​ប្រទេស​ដែល​មាន​បញ្ហា​ឆែប​ក្រអូម​មាត់​ផង​ដែរ​។​

សំណួរៈ សូម​លោក​រៀបរាប់​ដោយ​សង្ខេប​អំពី​ភាព​ជោគជ័យ​នា​អំឡុង​ពេល​១៣​ឆ្នាំ នៃ​អង្គការ​របស់​លោក នៅក្នុង​ប្រទេស​កម្ពុជា​។​

ចម្លើយៈ អង្គការ Operation Smile កម្ពុជា ទទួល​បាន​ជោគជ័យ​ធំៗ​ពីរ​។ គឺ​ការ​ព្យាបាល​អ្នក​ជំងឺ​ដែល​មាន​បញ្ហា​ឆែប​ក្រអូម​មាត់ និង​ឆែប​បបូរ​មាត់ និង​បញ្ហា​ផ្សេងៗ​ទៀត​ដែល​ទាក់ទង​ទៅ​នឹង​បញ្ហា​ខូច​ទម្រង់​មុខ តាមរយៈ​ការ​ព្យាបាល​ដោយ​វេជ្ជសាស្ត្រ​ពី​អ្នក​ស្ម័គ្រចិត្ត​របស់​យើង​។

ម្យ៉ាង​ទៀត​អ្នក​ស្ម័គ្រចិត្ត​ម្នាក់ៗ បាន​យក​ចំណេះ​ដឹង​របស់​ពួក​គេ​ត្រឡប់​មក​មន្ទីរពេទ្យ ឬក៏​គ្លីនិក​របស់​គេ​វិញ ហើយ​ក៏​បាន​ជួយ​ពួក​គេ​ឲ្យ​មាន​បទ​ពិសោធ​ល្អ​នៅ​ក្នុង​វិជ្ជាជីវៈ​របស់​ពួក​គេ ផង​ដែរ៕

អត្ថបទគួរចាប់អារម្មណ៍