The Phnom Penh Post Search

Search form




Logo of Phnom Penh Post newspaper Phnom Penh Post - មោទនភាព​របស់​ហត្ថា​កសិករ​លីមីតធីត​ទទួល​បាន​ពាន​រង្វាន់ ៣ ក្នុង​ពេល​តែ​មួយ

មោទនភាព​របស់​ហត្ថា​កសិករ​លីមីតធីត​ទទួល​បាន​ពាន​រង្វាន់ ៣ ក្នុង​ពេល​តែ​មួយ

Content image - Phnom Penh Post

មោទនភាព​របស់​ហត្ថា​កសិករ​លីមីតធីត​ទទួល​បាន​ពាន​រង្វាន់ ៣ ក្នុង​ពេល​តែ​មួយ

រយៈពេល​ជាច្រើន​ឆ្នាំ​មក ហើយ ដែល​គ្រឹះស្ថាន​មីក្រូ​ហិរញ្ញវត្ថុ​ហត្ថា​កសិករ លីមីតធីត បាន​បើក​ប្រតិបត្តិការ​របស់ ខ្លួន​ប្រកប​ដោយ​វិជ្ជាជីវៈ ភាព​ទទួល​ខុស​ត្រូវ និង​ទទួល​បាន​ការ​គាំទ្រ​ប្រកប​ដោយ​ទំនុក​ចិត្ត​ខ្ពស់​ពី​សំណាក់​អតិថិជន​នៅ​ក្នុង​ប្រទេស​កម្ពុជា ក៏​ដូច​ជា​ការ​គាំទ្រ​ផ្នែក​ហិរញ្ញប្បទាន​ពី​ស្ថាប័ន​ហិរញ្ញវត្ថុ​អន្តរជាតិ​ផង​ដែរ​។

បន្ថែម​លើស​ពី​នេះ អ្វី​ដែល​ជា​មោទនភាព​ពុំ​ធ្លាប់​មាន​សម្រាប់ គណៈ​គ្រប់គ្រង ព្រម​ទាំង​បុគ្គលិក​ ទាំងអស់​របស់​ហត្ថា​កសិករ លីមីតធីត គឺ​នា​អំឡុង​ចុង​ខែ​មីនា នា​ដើម​ឆ្នាំ​២០១៥​កន្លង​មក​ថ្មីៗ​នេះ គ្រឹះស្ថាន​មីក្រូហិរញ្ញវត្ថុ​មួយ​នេះ ទើប​នឹង​ទទួល​បាន​ពាន​រង្វាន់​សំខាន់ៗ​ចំនួន ៣ ផ្សេង គ្នា ព្រម​គ្នា​តែ​ម្តង​។

ជាមួយ​នឹង​ពាន​រង្វាន់​ទាំង​បី​នេះ វា​ក៏​បាន​ធ្វើ​ឲ្យ​គ្រឹះស្ថាន​មីក្រូហិរញ្ញវត្ថុ ហត្ថា​កសិករ លីមីតធីត ក្លាយ​ជា​ស្ថាប័ន​ដំបូង​បំផុត​ប្រចាំ​ឆ្នាំ​ឈរ​នៅ​ជួរ​មុខ​គេ​ក្នុង​ចំណោម​ គ្រឹះស្ថាន​មីក្រូ​ហិរញ្ញវត្ថុ​ក្នុង​ប្រទេស​កម្ពុជា និង​នៅ​លើ​ឆាក​អន្តរជាតិ​ផងដែរ​។

​ពាន​រង្វាន់​ទាំង​បី​ប្រភេទ​ផ្សេងៗ​គ្នា​នេះ គឺ​គ្រឹះស្ថាន​ហត្ថា​កសិករ លីមីតធីត ទទួល​បាន​ពី​ស្ថាប័ន Association Other Ways Management & Consulting ដែល​មាន​ទីស្នាក់ការ​នៅ​ទីក្រុង​ប៉ារីស ប្រទេស​បារាំង​។

ពាន​រង្វាន់​ទាំងបី​នោះ​រួម​មាន ទី១ ពាន រង្វាន់​​ជា​ស្ថាប័ន​ដែល​យក​ចិត្ត ទុក​ដាក់​ខ្ពស់​ពី​បរិស្ថាន និង​សេដ្ឋកិច្ច​សង្គម, ទី២ ពាន​រង្វាន់​ស្ថាប័ន​ មានគុណ​ភាព​នៃ​ការ​គ្រប់គ្រង និង​ប្រតិបត្តិការ​ល្អ​ប្រសើរ​ព្រម ទាំង​មាន​ការ​ពេញ​ចិត្ត​ខ្ពស់​ពី​អតិថិជន និង​ទី​៣ ពាន​រង្វាន់​ជា​ស្ថាប័ន​ដែល​មាន​គុណភាព និង​ការ​អនុវត្ត​ល្អ​ដាច់​គេ​ជា​សកល​។ កម្មវិធី​ប្រកាស​ប្រគល់​ ពាន​រង្វាន់​នេះ​ត្រូវ​បាន​គេ​ប្រារព្ធ​ឡើង​យ៉ាង​ឱឡារិក​នៅ​ទីក្រុង​ប៊ែរឡាំង នៃ​ប្រទេស​អាល្លឺម៉ង់ កាលពី​ថ្ងៃទី​២៣ ខែមីនា ឆ្នាំ ២០១៥ កន្លង​ទៅ​ថ្មីៗ​នេះ ដោយ​មាន​ការ​ចូលរួម​ពី​សំណាក់​តំណាង​ក្រុមហ៊ុន​ធំៗ​ជាច្រើន​មក​ពី​បណ្តា​ប្រទេស​នានា​នៅ​លើ​សកល​លោក​។

Content image - Phnom Penh Post

ការ​ដែល​ហត្ថា​កសិករ លីមីតធីត ទទួល​បាន​ពាន​រង្វាន់​រហូត​ដល់​ទៅ​បី​ប្រភេទ​ផ្សេង​គ្នា នៅ​ក្នុង​ពេល​តែ​មួយ​ពី​ស្ថាប័ន​អន្តរជាតិ​ដ៏​ធំ​មួយ​នេះ ស​បញ្ជាក់​ឲ្យ​ឃើញ​ថា ហត្ថា​កសិករ លីមីតធីត ជា​ស្ថាប័ន​មួយ​ដែល​កំពុង​មាន​ការ​រីក​ចម្រើន​ខ្លាំង ប្រកប​ដោយ​និរន្តរភាព​យូរអង្វែង ទាំង​ផ្នែក​គុណភាព​នៃ​ការ​ប្រតិបត្តិការ និង​គុណភាព​នៃ​ការ​គ្រប់គ្រង​ផ្នែក​ហិរញ្ញវត្ថុ​។

ជាមួយ​គ្នា​នេះ​ដែរ ហត្ថា​កសិករ លីមីតធីត គឺជា​ស្ថាប័ន​ដែល​ទទួល​បាន​ការ​ទុក​ចិត្ត​ខ្ពស់​ពី​សំណាក់​អតិថិជន សាធារណជន អ្នក​វិនិយោគ និង​អ្នក​ដែល​ពាក់ព័ន្ធ​ផ្សេងៗ​ទៀត​។

បន្ថែម​លើស​ពី​នេះ​ពាន​រង្វាន់​ទាំង​បី​នេះ​បាន​បង្ហាញ​ឲ្យ​សាធារណជន​ទាំងអស់​ឃើញ​ថា ហត្ថា​កសិករ លីមីតធីត បាន​និង​កំពុង​ដើរ​លើ​ផ្លូវ​ដ៏​ត្រឹម​ត្រូវ​ស្រប​ទៅ​តាម​យុទ្ធសាស្ត្រ​របស់​ស្ថាប័ន​មីក្រូហិរញ្ញវត្ថុ​មួយ​នេះ ដែល​បាន​កំណត់​ថា កាន់​តែ​ទុក​ចិត្ត កាន់​តែ​ចម្រើន​ជាមួយ​អតិថិជន និង​ទស្សន​វិស័យ ព្រម​ទាំង​បេសកកម្ម​របស់​ខ្លួន​ដែល​ជា​ស្ថាប័ន​មិន​គិត​តែ​អំពី​ការ​រក​ប្រាក់​ចំណេញ​ប៉ុណ្ណោះ​ទេ ប៉ុន្តែ​ជា​ស្ថាប័ន​មាន​ការ​គិតគូរ​ខ្ពស់​ដល់​សង្គម និង​សុខុមាលភាព​របស់​ប្រជា​ពលរដ្ឋ​ទូទៅ​នៅ​ក្នុង​សង្គម​ផង​ដែរ​។

សូម​បញ្ជាក់​ថា កម្មវិធី​ផ្តល់​ពាន​រង្វាន់​ជា​លក្ខណៈ​អន្តរជាតិ របស់​ស្ថាប័ន Association Other Ways Management & Consulting នេះ បាន​រៀបចំ​ឡើង​អាស្រ័យ​ទៅ​លើ​ការ​ផ្តួចផ្តើម​ឲ្យ​មាន​ការ​យក​ចិត្ត​ទុក​ដាក់​ខ្ពស់​លើ​វិស័យ​មីក្រូសេដ្ឋកិច្ច​សម្រាប់​ស្ថាប័ន​ខ្នាត​តូច និង​មធ្យម ក្នុង​គោល​បំណង​ជំរុញ​លើ​ការ​អនុវត្ត​ស្ថាប័ន​ដែល​មាន​ស្រាប់ និង​ជំរុញ​ឲ្យ​មាន​ការ​បង្កើត​ស្ថាប័ន​ថ្មី​បន្ថែម​ទៀត​។ នេះ​ជា​ឱកាស​ដ៏​ប្រសើរ សម្រាប់​ការ​រៀបចំ​ឲ្យ​មាន​វេទិកា​ជា​លក្ខណៈ​អន្តរជាតិ​កើត​ឡើង ហើយ​មាន​ការ​ចូលរួម​ពី​គ្រប់​វិស័យ​ទាំង​អស់ ដើម្បី​ទទួល​បាន​ការ​ផ្តល់​ពាន​រង្វាន់ ដែល​ជា​កត្តា​ជំរុញ​សកម្មភាព​ជា​លក្ខណៈ​អន្តរជាតិ​លើ​ស្តង់ដារ​នៃ​គុណភាព​ប្រកប​ដោយ​ជឿជាក់ និង​ទទួល​ស្គាល់​ជា​លក្ខណៈ​សកល​ផង​ដែរ​។

Content image - Phnom Penh Post

គ្រឹះស្ថាន​មីក្រូហិរញ្ញវត្ថុ​ហត្ថា​កសិករ លីមីតធីត មាន​សាខា​របស់​ខ្លួន​ចំនួន​ជាង ១៤០ សាខា នៅ​ទូទាំង ២៥​ខេត្ត​ក្រុង នៃ​ព្រះរាជាណាចក្រ​កម្ពុជា​។

បន្ថែម​លើសពី​សាខា​ទាំង​នោះ គ្រឹះស្ថាន​មួយ​នេះ ក៏​បាន​បំពាក់​ម៉ាស៊ីន ATMS ចំនួន ៧២​ កន្លែង​ទៀត នៅ​តាម​បណ្តា​ខេត្ត​គោលដៅ​មួយ​ចំនួន ដើម្បី​ផ្តល់​ភាព​ងាយ​ស្រួល​ដល់​អតិថិជន​របស់​ខ្លួន​ក្នុង​ការ​ធ្វើ​ប្រតិបត្តិការ​ហិរញ្ញវត្ថុ​ប្រកបដោយ​សុវត្ថិភាព សុក្រឹតភាព រហ័ស​ទាន់​ចិត្ត​គ្រប់​ពេល​វេលា និង​ភាព​ទាន់​សម័យ​និយម​។

យោង​តាម​សេចក្តី​ប្រកាស​ព័ត៌​មាន​ជា​ផ្លូវ​ការ​របស់​ខ្លួន​កាល ពី​ពេល​ថ្មីៗ​នេះ បង្ហាញ​ថា ហត្ថា​ កសិករ លីមីតធីត បាន​ផ្តល់​ផល បត្រ​ឥណទាន (ប្រាក់​កម្ចី​) ចំនួន ជាង ២៧៥ លាន​ដុល្លារ​ដល់​អតិថិជន​ប្រមាណ ១០២១៣៥ ​អតិថិជន​។

ចំណែក​ឯ ​ប្រាក់​បញ្ញើ​សន្សំ​វិញ ហត្ថា​កសិករ លីមីតធីត ទទួល​បាន​ចំនួន​ជិត ១៨៤​លាន​ដុល្លារ ពី​អ្នក​សន្សំ​ប្រាក់​ចំនួន ២០១៤៣៥​នាក់​។ រីឯ​ដើម​ទុន​សរុប​របស់​គ្រឹះស្ថាន​មីក្រូ​ហិរញ្ញវត្ថុ​ហត្ថាកសិករ លីមីតធីត ក៏​បាន​កើន​ឡើង​ដល់ ៣៤៥,០៨ លាន​ដុល្លារ​ផង​ដែរ។

គួរ​រំឭក​ថា ក្រៅ​អំពី​សេវាកម្ម​ផ្តល់​ប្រាក់​កម្ចី​សម្រាប់​អតិថិជន​យក​ទៅ​បង្កើត ឬក៏​ពង្រីក​មុខ​របរ ​ដើម្បី​លើក​ស្ទួយ​ជីវភាព​រស់​នៅ​របស់​ប្រជាជន​កម្ពុជា ហត្ថា​កសិករ លីមីតធីត ក៏​មាន​ផ្តល់​ជា​កម្ចី សម្រាប់​សិស្ស និង​និស្សិត​ដើម្បី ចូលរួម​លើក​ស្ទួយ​វិស័យ​អប់រំ​នៅ​កម្ពុជា​ផង​ដែរ ដែល​ប្រភេទ​ហិរញ្ញប្បទាន​នេះ​ជា​ប្រភេទ​ផ្តល់​កម្ចី​រយៈ​ពេល​យូរ​មាន​អត្រាការ​ប្រាក់​ទាប ប៉ុន្តែ​ប្រកប​ដោយ​ទំនុក​ចិត្ត​ខ្ពស់​បំផុត​រវាង​អតិថិជន និង​គ្រឹះស្ថាន​ហិរញ្ញប្បទាន៕

អត្ថបទគួរចាប់អារម្មណ៍