The Phnom Penh Post Search

Search form




Logo of Phnom Penh Post newspaper Phnom Penh Post - រថយន្ត​ស្ព័រ Porsche ទៅ​ដល់​ណា​គេ​តាម​មើល​គ្រប់​គ្នា

រថយន្ត​ស្ព័រ Porsche ទៅ​ដល់​ណា​គេ​តាម​មើល​គ្រប់​គ្នា

រថយន្តស្ព័រ Porshe Panamera S។
រថយន្តស្ព័រ Porshe Panamera S។ ហុង មិនា

រថយន្ត​ស្ព័រ Porsche ទៅ​ដល់​ណា​គេ​តាម​មើល​គ្រប់​គ្នា

នៅ​រាជធានី​ភ្នំពេញ​ដែល​សម្បូរ​ដោយ​វត្តមាន​រថយន្ត​ប្រភេទ​ខ្ពស់ (SUVs) ស៊ាំ​ភ្នែក​ទៅ​ហើយ​នោះ អ្នក​ដែល​ជិះ​រថយន្ត​ស្ព័រ​អាល្លឺម៉ង់​ដ៏​ល្បី​ល្បាញ​ម៉ាក Porsche នោះ​ច្បាស់​ក្លាយ​ជា​តារា​ដ៏​លេច​ធ្លោ​បំផុត​ពេលធ្វើ​ដំណើរ​តាម​វិថី​នានា។

រថយន្ត​ស្ព័រ Panamera S E-Hybrid មិន​ត្រឹម​តែ​មាន​រាង​ស្អាត​អស្ចារ្យ​ប៉ុណ្ណោះ​ទេ ប៉ុន្តែ​វា​ថែម​ទាំង​បំពាក់​នូវ​បច្ចេកវិទ្យា​ទំនើប​ចុង​ក្រោយ​ដែល​នាំ​មក​នូវ​ភាព​ប្រណីត​ទាក់​ទាញ​អារម្មណ៍​ប្រកប​ដោយ​ផាសុខភាព ភាព​សន្សំ​សំចៃ​ជួយ​បរិស្ថាន និង​សុវត្ថិភាព​ដ៏​កក់​ក្ដៅ​ថែម​ទៀត​ផង។

ក្រុម​ហ៊ុន​ផលិត​រថយន្ត​ដ៏​ល្បី​ល្បាញ​របស់​អាល្លឺម៉ង់​ដែល​ជំនាញ​ខាង​បង្កើត​រថយន្ត​ស្ព័រ​មាន​សមត្ថភាព​ខ្ពស់​ពិត​ជា​បាន សាយ​ភាយ​កេរ្តិ៍​ឈ្មោះ​នៅ​ប្រទេស​កម្ពុជា​មែន។ រថយន្ត Panamera S ដែល​មាន​រាង​រៅ​ប្រកប​ដោយ​កិត្យានុភាព ជាមួយ​នឹង​ការ​រចនា​គម្លាត​កង់​វែង​លក្ខណៈ​ស្ព័រ បាន​ផ្ដល់​នូវ​ផ្ទៃ​ខាង​ក្នុង​ទូលាយ ជាង​មុន​សម្រាប់​អ្នក​ដំណើរ​កៅអី​មុខ និង​ក្រោយ។ មិន​ថា​ទៅ​ដល់​ទីណា​ទេ Panamera S បាន​ទាក់​ទាញ​ក្រសែ​ភ្នែក​មនុស្ស​ឲ្យ​សម្លឹង​មើល​វា​បី​ដូច​ជា​ត្បូង​មាន​តម្លៃ​ដ៏​កម្រ។ មនុស្ស​ដែល​បាន​ឃើញ​វា​នៅ​តែ​បន្ត​ជជែក​ពី​យាន​ជំនិះ​ដ៏​អស្ចារ្យ​នេះ​មិន​ដាច់​ពី​មាត់ ទោះ​ជា​រថយន្ត​បង្កើន​ល្បឿន​ចាក​ឆ្ងាយ​រាប់​សិប​គីឡូម៉ែត្រ​ហើយ​ក្ដី។

អ្វី​ដែល​ធ្វើ​ឲ្យ​រថយន្ត Panamera S E-Hybrid មាន​សន្ទុះ​ល្បឿន​លឿន​ស្ងាត់​បែប​នេះ​គឺ​ម៉ាស៊ីន​ប្រភេទ 3-litre V6 ស៊ុបភើរ​ឆាច ដែល​សំយោគ​ជាមួយ​ម៉ូទ័រ​អគ្គិសនី​មាន​ថាមពល​ប្រព័ន្ធ​សរុប 416 hp (306 kW)។ ម៉ាស៊ីន​នេះ​ស្ងាត់ ដែល​សូម្បី​តែ​រថយន្ត​កំពុង​តែ​បញ្ឆេះ​ក៏​អ្នក​បើក​បរ​ស្ទើរ​តែ​មិន​ដឹង​ខ្លួន​ផង។

និយាយ​ពី​សន្ទុះ​វិញ គ្រាន់​តែ​ចំណាយ​ពេល​ត្រឹម​តែ ៥ វិនាទី​កន្លះ ក្នុង​ការ​ជាន់​ហ្គ៊ែរ​ប៉ុណ្ណោះ យើង​នឹង​អាច​បង្កើន​ល្បឿន​បាន​ពី​សូន្យ​រហូត​ដល់ ១០០ គីឡូម៉ែត្រ​ក្នុង ១ ម៉ោង​តែ​មួយ​ប៉ប្រិច​ភ្នែក ខណៈ​ដែល​វា​មាន​ល្បឿន​កំពូល​រហូត​ដល់ ២៧០ គីឡូម៉ែត្រ​ក្នុង ១ ម៉ោង​ឯណោះ។ បើ​ទោះ​ជា​នៅ​ទីក្រុង​មិន​អាច​ឲ្យ​អ្នក​បញ្ចេញ​សមត្ថភាព​ល្បឿន​លឿន​ដូច​ហោះ​បែប នេះ​ក្ដី ក៏​គុណ​សម្បត្តិ​សំខាន់ បំផុត​របស់ Panamera S E-Hybrid គឺ​ភាព​សន្សំ​សំចៃ​ដ៏​អស្ចារ្យ​របស់​វា​តែ​ម្ដង។

សម្រាប់​អ្នក​ដំណើរ​នៅ​ភ្នំពេញ ដែល​ឧស្សាហ៍​មាន​ការ​កកស្ទះ​ចរាចរណ៍​ធ្វើ​ឲ្យ​អ្នក​បើកបរ​ត្អូញ​ថា ខាត​សាំង​នោះ ភាព​សំចៃ​ថាមពល​គឺជា​កត្តា​ដ៏​សំខាន់​មួយ។ រថយន្ត​ស្ព័រ Porsche Panamera S E-Hybrid ស៊ី​សាំង​ត្រឹម​តែ ៣,១ លីត្រ​សម្រាប់​ការ​បើក​បរ​លើ​ផ្លូវ​ចម្ងាយ ១០០ គីឡូម៉ែត្រ ធ្វើ​ឲ្យ​វា​ក្លាយ​ជា​ជម្រើស​ដ៏​ឆ្លាត​វៃ។ ម្ចាស់​របស់​រថយន្ត​ស្ព័រ​ប្រណីត​នេះ​នឹង​មិន​ចាំបាច់​ចូល​ស្ថានីយ​ចាក់​សាំង​សឹង​ញឹក​ញាប់​នោះ​ទេ។

សម្រាប់​ការ​ប្រើ​ប្រាស់​ថាមពល​អគ្គិសនី​វិញ អ្នក​បើកបរ​នឹង​ទទួល​បាន​បទ​ពិសោធ​ថ្មី ជាមួយ​នឹង​ការ​ជាន់​ហ្គ៊ែរ​ដ៏​ស្ងាត់​ក្នុង​ការ​បង្កើន​ល្បឿន​រហូត​ដល់ ១៣៥ គីឡូម៉ែត្រ​ក្នុង ១ ម៉ោង។ បើ​ទោះ​ជា​ផ្លូវ​មួយ​ចំនួន​នៅ​ភ្នំពេញ​មាន​ជង្ហុក​រដិប​រដុប​ក្ដី ក៏​អ្នក​បើកបរ​នៅ​តែ​មាន​អារម្មណ៍​ថា ការ​បើក​បរ​ដំណើរការ​យ៉ាង​រលូន​។ ទោះ​ជា​រលាក់​ក៏​ស្រទន់​បើ​ទោះ​បីជា​ស្ថានភាព​ផ្លូវ​ជាក់ស្ដែង​វា​មាន​ភាព​កញ្ឆក់​កញ្ឆែង ក៏​ពិត​មែន។ សម្រាប់​ស្ថានភាព​ផ្លូវ​ពិបាក​បន្តិច យើង​អាច​ចុច​ប៊ូតុង​លើក​កម្ពស់​តួ​រថយន្ត​បន្តិច ដើម្បី​ឲ្យ​ការ​ធ្វើ​ដំណើរ​កាន់​តែ​ងាយ​ស្រួល។ ដោយ​ឡែក​ប៊ូតុង​ស្ព័រ​កាន់​តែ​បង្កើន​សមត្ថភាព​រថយន្ត​ឲ្យ​ពេញ​ទំហឹង​ថែម​ទៀត។

ខណៈ​ដែល​អ្នក​ប្រើ​ប្រាស់ រថយន្ត​ប្រកប​ដោយ​ចំណេះ​ដឹង​ទូទាំង​ពិភពលោក​នាំ​គ្នា​ចាប់​អារម្មណ៍​លើ​វិស័យ​ថាមពល​ស្នេហា​បរិស្ថាន គុណ​សម្បត្តិ​មួយ ទៀត​នៃ​រថយន្ត Panamera S E-Hybrid គឺ​សមត្ថភាព​សាក អាគុយ​អំឡុង​ពេល​បើកបរ។ រាល់​តំណក់​ប្រេង​ដែល​ចំណាយ​លើ​ចំហេះ​ម៉ាស៊ីន​នឹង​ជួយ​សន្សំ​ថាមពល​អគ្គិសនី​សម្រាប់​ប្រើ​ប្រាស់​ជា​បន្ត​បន្ទាប់។ ដូច្នេះ​ហើយ​អ្នក​ប្រើ​ប្រាស់​រថយន្ត​ស្ព័រ Porsche Panamera S E-Hybrid ពិតជា​ទទួល​បាន​អារម្មណ៍​ពិសេស​មួយ។ រថយន្ត​ស្ព័រ ដ៏​ប្រណីត​ដែល​បញ្ចេញ​ឧស្ម័ន CO2 តិច ក៏​ជា​ការ​រួម​ចំណែក​កាត់​បន្ថយ​ការ​បំពុល​បរិយាកាស​ទីក្រុង​ភ្នំពេញ​ផង​ដែរ។

ចំពោះ​ប្រព័ន្ធ​សុវត្ថិភាព​វិញ រថយន្ត​ស្ព័រ​មាន​បួន​កៅអី​នេះ​មាន​បំពាក់​នូវ​ពោង​ចំហៀង ខាង​ក្រោម និង​ខាង​មុខ​សម្រាប់​អ្នក​បើក​បរ និង​អ្នក​ដំណើរ​ជួរ​មុខ។ នៅ​កៅអី​ជួរ​ក្រោយ​ក៏​មាន​ពោង​សុវត្ថិភាព​ផង​ដែរ។ អ្វី​ដែល​ផ្ដល់​ឲ្យ​អ្នក​បើក​បរ​នូវ​ជំនឿ​ចិត្ត​ជា​ពិសេស​សម្រួល​ដល់​ការ​ធ្វើ​ដំណើរ​ពេល​ផ្លូវ​កក​ស្ទះ​ដើម្បី​ចៀសវាង​ការ​ប៉ះពារ​នោះ គឺ​កាមេរ៉ា​ផ្ដល់​រូបភាព​ដ៏​ច្បាស់​ក្នុង​មុំ​មួយ​ជុំ​រថយន្ត​តែ​ម្ដង។

ទាំង​នេះ​ហើយ​គឺជា​គុណ​សម្បត្តិ​ដ៏​លើស​លប់​របស់ Porsche Panamera S ដែល​ផ្ដល់​ឲ្យ​អ្នក​បើកបរ​នូវ​អារម្មណ៍​ផាសុកភាព សុវត្ថិភាព ប្រណីត​ភាព ជាមួយ​នឹង​ល្បឿន​ពោរពេញ​ដោយ​ថាមពល​ទាក់​ទាញ​ចំណាប់​អារម្មណ៍​មនុស្ស​ម្នា​គ្រប់​ទិសទី៕

អត្ថបទគួរចាប់អារម្មណ៍