The Phnom Penh Post Search

Search form




Logo of Phnom Penh Post newspaper Phnom Penh Post - Aii : "​ដាំ​បណ្តុះ​នៅ​ក្នុង​សាលា ផ្លែផ្កា​នៅ​ក្នុង​សង្គម"

Aii : "​ដាំ​បណ្តុះ​នៅ​ក្នុង​សាលា ផ្លែផ្កា​នៅ​ក្នុង​សង្គម"

Content image - Phnom Penh Post

Aii : "​ដាំ​បណ្តុះ​នៅ​ក្នុង​សាលា ផ្លែផ្កា​នៅ​ក្នុង​សង្គម"

រយៈពេល​១២​ឆ្នាំ​កន្លង​មក​នេះ សិស្សានុសិស្ស​ជា​ច្រើន​ម៉ឺន​នាក់​បាន​ទទួល​ការ​អប់រំ​ប្រកប​ដោយ​គុណភាព ពី​មជ្ឈមណ្ឌល​ភាសា អេ អាយ អាយ (Aii Language Center) ។

ទន្ទឹម​នឹង​កំណើន​នៃ​ការ​គាំទ្រ​នៅ​តែ​បន្ត​តួលេខ​កើន​ឡើងជា​រៀង​រាល់​ឆ្នាំ តម្រូវឱ្យ​មជ្ឈមណ្ឌល​នេះ​ធ្វើការ​អភិវឌ្ឍ​ពង្រីក សាខា​ជា​បន្តបន្ទាប់​។

ជាក់ស្តែង​នៅ​ក្នុង​ឆ្នាំ​នេះ គណៈ​គ្រប់គ្រង​មជ្ឈមណ្ឌល​ភាសា អេ អាយ អាយ បាន​និង​កំពុង​សម្លឹង​មើល​ឱកាស​បើក​សាខា​របស់​ខ្លួន​ជាច្រើន​ទីតាំង​បន្ថែម​ទៀត ដើម្បី​ឆ្លើយតប​ទៅនឹង​តម្រូវការ​របស់​អ្នក​អាណា​ព្យាបាល និង​សិស្សានុសិស្ស ក្នុង​ការ​ចូលរួម​ចំណែក​អភិវឌ្ឍ​វិស័យ​អប់រំ និង​បង្កើន​ធនធាន​មនុស្ស​ជាមួយ​រាជរដ្ឋាភិបាល​ដែល​មាន​ក្រសួង​អប់រំ យុវជន និង​កីឡា ជា​សេនាធិការ​។

បើ​គិត​ត្រឹម​រយៈពេល​៥​ឆ្នាំ​ចុង​ក្រោយ​នេះ​មជ្ឈមណ្ឌល​ភាសា អេ អាយ អាយ បាន​ពង្រីក​ពីសា​ខា​ទី​ ១​ របស់​ខ្លួន​រហូត​ដល់​សាខា​ទី​ ២ ​នៅ​ទួលគោក និង​សាខា​ទី​ ៣ ​នៅ​ចាក់អង្រែ​ក្រោម​។

ជាមួយនឹង​ការ​រីក​ចម្រើន​នេះ ស្ថាបនិក របស់​មជ្ឈមណ្ឌល​ភាសា អេ អាយ អាយ លោក​ឧកញ៉ា វេជ្ជបណ្ឌិត គួច ម៉េង​លី បាន​និង​កំពុង​ពិនិត្យ​ទីតាំង​ដើម្បី​បើក​សាខា​ថ្មីៗ​ចំនួន​ ៥​ ទីតាំង​បន្ថែម​ទៀត​ផង​ដែរ​។

លោក ឡាយ សុភា (Sophea M. Lay) អនុប្រធាន​មជ្ឈមណ្ឌល​ភាសា អេ អាយ អាយ (Aii Language Center) បាន​ឱ្យ​ដឹង​ថា៖ «​យោង​តាម​ទស្សន​វិស័យ​របស់​លោក​ឧកញ៉ា វេជ្ជបណ្ឌិត គួច ម៉េងលី ដែល​តែង​តែ​ចង់​ចែក​រំលែក​ចំណេះ​ដឹង​តាម​រយៈ​ការ​អប់រំ​ល្អៗ​ដល់​យុវជន​ជំនាន់​ក្រោយ ហើយ​ក៏​ស្រប​ទៅ​នឹង​ការ​គាំទ្រ​ពី​មាតា​បិតា និង​អ្នក​អាណា​ព្យាបាល​របស់​សិស្ស​តែង​តែ​គាំទ្រ​សាលា​របស់​យើង​ផង​នោះ ខ្ញុំ​ជឿជាក់​ថា សាខា​ថ្មី​ទាំង ៥​ ទីតាំង​បន្ថែម​នោះ នឹង​ចាប់​ផ្តើម​លេច​ចេញ​ជា​រូបរាង​ជា​បណ្តើរៗ​នៅ​អំឡុង​ឆ្នាំ​២០១៧ ឬ យ៉ាង​យូរ​ត្រឹម​២០១៨ ខាង​មុខ​នេះ​»​។

បច្ចុប្បន្ន បរិមាណ​សិស្សានុសិស្ស​ដែល​កំពុង​សិក្សា​រៀនសូត្រ នៅ​មជ្ឈមណ្ឌល​ភាសា អេ អាយ អាយ ទាំង​៣​សាខា​មាន​ចំនួន​ជាង ៦០០០​ នាក់ ហើយ​តួលេខ នឹង​កើន​ឡើង​បន្ថែម​ទៀត​នៅ​ពេល​បើក​វគ្គ​សិក្សា​ថ្មី នៅ​ថ្ងៃទី​ ២៧ ខែ​វិច្ឆិកា ឆ្នាំ ២០១៧ នាពេល​ខាងមុខនេះ​។

ចំពោះ​សាខា​ចាក់​អង្រែ ដោយសារ​មាន​តម្រូវ​ការ​ជាច្រើន ពី​អ្នក​អាណា​ព្យាបាល​ក៏​ដូច​ជា​សិស្សានុសិស្ស​ទៅ​លើ​ភាសា​ចិន គណៈ​គ្រប់គ្រង​បាន​សម្រេច​ចិត្ត​បើក​កម្មវិធី ថ្នាក់​ភាសា​ចិន ដោយ​ផ្តល់​ជូន​អាហារូបករណ៍​រហូត​ដល់​មួយ​រយ​ភាគរយ (១០០%) នៅ​វគ្គ​សិក្សា​ថ្មី​ខាង​មុខ​នេះ​។ ក្នុង​នោះ​ដែរ សម្រាប់​សាខា​ទួលគោក នឹង​បន្ត​ផ្តល់​ជូន​អាហារូបករណ៍​រហូត​ដល់​មួយ​រយ​ភាគរយ (១០០%) ដល់​សិស្សានុសិស្ស​ផង​ដែរ​។

ដើម្បី​ឱ្យ​សង្គម​មួយ​មាន​ការ​រីកចម្រើន​ប្រកប​ដោយ​និរន្តរភាព គឺ​ត្រូវ​ពឹង​ផ្អែក​ទៅ​លើ​ធនធាន​មនុស្ស ដែល​ប្រកប​ដោយ​ចំណេះដឹង​ពិត​ប្រាកដ សីលធម៌​ថ្លៃថ្នូរ គឺ​មិន​ថា​ចេះតែ​ភាសា​ជាតិ​របស់​ខ្លួន​នោះទេ «​យើង​ក៏​ត្រូវ​ចេះ​ភាសា​មួយ​ពីរ​បន្ថែម​ទៀត​ដែរ​។ អ៊ីចឹង​ហើយ​បានជា​ស្ថាប័ន​អប់រំ​មួយ​នេះ បង្កើត​ជា​មជ្ឈមណ្ឌល​ភាសា អេ អាយ អាយ ដើម្បី​ផ្តល់​ការ​សិក្សា​ផ្នែក​ភាសា​អង់គ្លេស និង​ភាសា​ចិន កុំព្យូទ័រ រួមទាំង​មុខ​វិជ្ជា​ផ្តល់​នូវ​ចំណេះ​ដឹង​ទូទៅ​បន្ថែម​ជាច្រើន ហើយ​គណៈ​គ្រប់គ្រង​តែង​យក​ចិត្ត​ទុក​ដាក់​ខ្ពស់​ណាស់​នៅ​ក្នុង​កម្មវិធី​អប់រំ​របស់​សាលា​ទៅ​ដល់​សិស្ស​គ្រប់​កម្រិត​ទាំង​អស់​» នេះ​បើ​តាម​ការ​អះអាង​របស់​លោក សុភា​។ ទាំង​នេះ គឺ​វា​ស្រប ទៅ​នឹង​ពាក្យ​ស្លោក​របស់​សាលា​នេះ​ដែល​បាន​លើក​ឡើង​ថា «​ដាំ​នៅ​សាលា ផ្លែផ្កា​ក្នុង​គ្រួសារ និង​សង្គម​»​។

មហាជន​កម្ពុជា​អាច​នឹង​បាន​ជ្រាប​ខ្លះ​ហើយ​ថា ជា​រៀង​រាល់​ឆ្នាំ​តែង​មាន​ការ​ប្រកួត​ប្រជែង​លើ​ប្រធាន​បទ ផ្សេងៗ​គ្នា នៅក្នុង​ចំណោម​សិស្ស​និស្សិត និង​អ្នក​អាជីព​វ័យក្មេង​ទាំង​នៅ​ក្នុង​ព្រះរាជាណាចក្រ​កម្ពុជា នៅ​ក្នុង​តំបន់ និង​នៅ​លើ​ឆាក​អន្តរជាតិ​។ «​ជា​ញឹកញាប់​លទ្ធផល​ជា​ម្ចាស់​ជយលាភី គឺ​ភាគ​ច្រើន​បាន​ធ្លាក់​ទៅ​លើ​សិស្ស​របស់​មជ្ឈមណ្ឌល​ភាសា អេ អាយ អាយ ដូច​ជា កាលពី​ថ្ងៃទី​ ០១ ខែ​មេសា ឆ្នាំ​២០១៧ កន្លង​មក​ថ្មីៗ នេះ ក្នុង​វេទិកា​ប្រកួត​ប្រជែង​ពាន​រង្វាន់​វោហារ​ស័ព្ទ​ជា​សាធារណៈ និង អ្នក​តស៊ូ​មតិ​ដ៏​ឆ្នើម​ប្រចាំ​ឆ្នាំ​២០១៧ របស់ JCI ម្ចាស់​ជយលាភី​លេខ​១ គឺ យុវតី លី ទិត្យ​សុភាព ជា​សិស្ស​របស់​មជ្ឈមណ្ឌល​ភាសា អេ អាយ អាយ (Aii LC)»​។ គួរ​រំឭក​ថា អស់​រយៈពេល​ជាច្រើន​ឆ្នាំ​មក​ហើយ សិស្សានុសិស្ស​មជ្ឈមណ្ឌល​ភាសា អេ អាយ អាយ​តែង​ដណ្តើម​យក​ពាន​រង្វាន់ និង​ជយលាភី​លេខ​១ មក​ជូន​មជ្ឈមណ្ឌល និង​ក្រុម​គ្រួសារ​របស់​គេ ទាំង​នៅ​លើ​ឆាក​ជាតិ និង​អន្តរជាតិ​។

ភាព​លេច​ធ្លោ​នៅ​ក្នុង​ការ​សិក្សា​របស់​សិ​ស្សានុសិស្ស​នៃ​មជ្ឈមណ្ឌល​ភាសា អេ អាយ អាយ ពិតជា​ទទួល បាន​ពី​គុណភាព​អប់រំ បង្ហាត់​បង្រៀន ស្រប​ទៅ​តាម​កម្មវិធី​អប់រំ​ដ៏​ទំនើប​របស់​សាលា ដែលមាន​កិច្ច​សហការ​រួម​គ្នា រាប់ទាំង​គណៈ​គ្រប់គ្រង បុគ្គលិក​សិក្សា លោកគ្រូ​អ្នក​គ្រូ សិស្សានុសិស្ស និង​ជា​ពិសេស​គឺ​ការ​គាំទ្រ​ពី​អាណាព្យាបាល​ទៀត​ផង «​ពួក​យើង​ទាំង​អស់​គ្នា​បាន​ធ្វើ​ការ​ព្រម​គ្នា ដើម្បី​ឆ្ពោះ​ទៅ​អនាគត​ដ៏​ភ្លឺស្វាង ដែល​ទទួល​បាន​ពី​ការអប់រំ​»​នេះ​បើ​តាម​ប្រសាសន៍​របស់​លោក សុភា​។

សិស្សានុសិស្ស​មជ្ឈមណ្ឌល​ភាសា អេ អាយ អាយ ក៏​បាន​បង្ហាញ​ពី​ភាព​សកម្ម​រស់​រវើក​ផងដែរ នៅ​ក្នុង​កិច្ចការ​សង្គម​ជាច្រើន​ប្រភេទ​ដូចជា «​ការ​ធ្វើ​សកម្មភាព​ដើម្បី​ស្វែងរក​ថវិកា​ជួយ​ដល់​មន្ទីរពេទ្យ​គន្ធបុប្ផា កុមារ​ក្រីក្រ ជន​ចាស់ជរា ជនអនា​ថា រួម​ទាំង​ការ​ចូលរួម​បរិច្ចាគ​ថវិកា​ផ្ទាល់​ខ្លួន​របស់​ពួកគេ ដើម្បី​កសាង​អគារ សាលារៀន​មួយ​ខ្នង គឺ​សាលា​បឋម​សិក្សា គួច ម៉េងលី ទួល​បេង ខេត្ត​កំពង់ចាម ដែល​បាន​សម្ពោធ​ដាក់ឱ្យ​ដំណើរការ​ជា​ផ្លូវការ​កាលពី​ពេល​ថ្មីៗ​កន្លង​មក​នេះ​»​។

នៅ​រាជធានី​ភ្នំពេញ មាន​មាតាបិតា​សិស្ស​ជាច្រើន​បាន​បញ្ជូន​កូនៗ​របស់​គាត់ ឱ្យ​ទៅ​សិក្សា​នៅ​មជ្ឈមណ្ឌល​ភាសា អេ អាយ អាយ ដោយ​ពួកគេ​សម្លឹង​ឃើញ​ពី​គុណភាព វិន័យ និង​សេវាកម្ម នៃ​ស្ថាប័ន​មួយ​នេះ​ថា​មាន​ភាពល្អ ប្រសើរ និង ខុសប្លែក​ពី​សាលារៀន​ដទៃ​។

លោក សុភា បាន​ពន្យល់ថា ៖ «​មជ្ឈមណ្ឌល​ភាសា អេ អាយ អាយ គឺជា​សាលា​ដែល​មាន​គុណភាព​អប់រំ​ប្រហាក់​ប្រហែល​នឹង​សាលា​នៅ​បណ្តា​ប្រទេស​ជឿន​លឿន​ដែរ ដូចជា​បន្ទប់​សិក្សា​មាន​បំពាក់​គ្រឿង​សម្ភារ​ត្រឹមត្រូវ​តាម​ស្តង់ដារ​សាលា​អាមេរិក ឯកសារ​សម្បូរ​បែប លោកគ្រូ អ្នកគ្រូ មិន​ត្រឹម​តែ​មាន​សញ្ជាតិ​ជា​អ្នក​ប្រើ​ប្រាស់​ភាសា​អង់គ្លេស​ពី​កំណើត​នោះទេ តែ​ពួក​គាត់​ត្រូវ​មាន​សញ្ញាបត្រ​គរុកោសល្យ ផ្នែក​អប់រំ​ត្រឹមត្រូវ និង​មាន​បច្ចេកទេស​បង្រៀន​ល្អ សម​ស្រប​ទៅ​តាម​លក្ខខណ្ឌ​ពហុវប្បធម៌​ទៀត​ផង​»៕

អត្ថបទគួរចាប់អារម្មណ៍