ភ្នំពេញៈ ក្រុមហ៊ុន Monarchy Land & Investment បានសម្ពោធបុកគ្រឹះបើកការដ្ឋានសាងសង់ និងលក់គម្រោង «បុរីខេមរភូមិ» ជាលើកដំបូងដោយផ្តោតលើតម្លៃសមរម្យ និងគុណភាពជាចម្បង។
អ្នកស្រី សុខ បុរី ប្រធានផ្នែកលក់បុរីខេមរភូមិ បានឱ្យដឹងក្នុងពិធីបញ្ចុះបឋមសិលាបើកការដ្ឋានសាងសង់ និងលក់កាលពីថ្ងៃទី ១០ ខែមិថុនាថា គម្រោងនេះត្រូវបានវិនិយោគដោយក្រុមហ៊ុន Monarchy land & Investment លើផ្ទៃដីទំហំ ៣ ហិកតា និងមានចម្ងាយ ៧០០ ម៉ែត្រពីផ្លូវជាតិលេខ ២ ស្ថិតក្នុងឃុំជើងកើប ស្រុកកណ្តាលស្ទឹង ខេត្តកណ្តាល។
អ្នកស្រី សុខ បុរី បាននិយាយថា៖ «បុរីខេមរភូមិ នឹងអភិវឌ្ឍសំណង់លំនៅឋានជាង ១០០ ខ្នង ដោយចែកចេញជា ៣ ប្រភេទ គឺផ្ទះល្វែងអាជីវកម្ម វីឡាកូនកាត់ និងវីឡាទោល។ គម្រោងបុរីនេះនឹងប្រើពេលសាងសង់ ១២ ខែ ដោយនឹងបញ្ចប់ការសាងសង់ក្នុងខែមិថុនា ឆ្នាំ ២០២២»។
បើតាមអ្នកស្រី បុរី វីឡាកូនកាត់មានតម្លៃចាប់ពី ៤៨ ៨០០ ដុល្លារ ផ្ទះល្វែងអាជីវកម្មមានតម្លៃចាប់ពី ៩៨ ៨០០ ដុល្លារ និងវីឡាទោលមានតម្លៃចាប់ពី ១៣,៨៨ ម៉ឺនដុល្លារ។
អ្នកស្រីបន្តថា៖ «តម្លៃលំនៅឋានទាំង ៣ ប្រភេទនៅក្នុងបុរីខេមរភូមិនេះ មានតម្លៃសមរម្យ ឬទាបជាងទីផ្សារ បើធៀបនឹងសំណង់លំនៅឋាននៃបុរីផ្សេងៗ»។
អគ្គនាយិការងក្រុមហ៊ុន Monarchy land & Investment អ្នកស្រី ឃួន លក្ខិណា ដែលជាអ្នកតំណាង គម្រោងបុរីខេមរភូមិ បានប្រាប់ថា លក្ខណពិសេសនៃគម្រោងនេះគឺសំណង់មានភាពទំនើប ស៊ីវិល័យ រចនាប័ទ្មប្លែក រួមផ្សំនឹងទីតាំងមានបរិស្ថានល្អសម្រាប់រស់នៅ។
អ្នកស្រីនិយាយថា៖ «បុរីខេមរភូមិ មានទីតាំងភូមិសាស្ត្រអំណោយផល និងមានសក្តានុពល នៅក្បែរផ្លូវក្រវាត់ក្រុងទី ៣ និងក្បែរព្រលានយន្តហោះភ្នំពេញថ្មី ព្រមទាំងនៅមិនឆ្ងាយប៉ុន្មានពីផ្សារទំនើបអ៊ីអន ៣ ដែលតំបន់ពាណិជ្ជកម្មកំពុងរីកដុះដាលដូចផ្សិត»។
បើតាមលោកស្រី លក្ខិណា បន្ទាប់ពីគម្រោងបុរីខេមរភូមិនេះក្រុមហ៊ុនក៏មានគម្រោងអភិវឌ្ឍន៍លំនៅឋានបែបធម្មជាតិជាប់មាត់ទន្លេដែលជាគម្រោងទី ២ នៅទីក្រុងតាខ្មៅ ខេត្តកណ្តាល។ គម្រោងនេះនឹងសាងសង់លំនៅឋានលើផ្ទៃដីប្រមាណ ៣០ ហិកតា។ អ្នកស្រីបញ្ជាក់ថា៖ «នៅទីនោះយើងនឹងប្រែក្លាយជាគម្រោងបែបលំនៅឋានសួនបរិស្ថានធម្មជាតិបៃតងសុទ្ធសាធ ហើយយើងសង្ឃឹមថានឹងទទួលបានការគាំទ្រខ្លាំង»។
អ្នកស្រី អាន សុធីតា នាយិកាគ្រប់គ្រងក្រុមហ៊ុនអចលនទ្រព្យ CBRE Cambodia បានឱ្យដឹងថា ដោយស្ថានភាពការឆ្លងរាលដាលជំងឺកូវីដ-១៩ នៅកម្ពុជាមិនទាន់ធូរស្រាលបានធ្វើឱ្យទុនវិនិយោគវិស័យសំណង់ក្នុងឆ្នាំ ២០២១ អាចនឹងធ្លាក់ចុះទៀតធៀបនឹងឆ្នាំ ២០២០។ អ្នកស្រីបន្តថា សូម្បីវិស័យអចលនទ្រព្យក៏មិនទាន់ល្អឡើងវិញដែរក្នុងឆ្នាំនេះ។
អ្នកស្រីអះអាងថា៖ «ខ្ញុំយល់ឃើញថា ទុនវិនិយោគក្នុងឆ្នាំ ២០២១ នេះនឹងបន្តធ្លាក់ចុះទៀត ព្រោះមិនសូវមានគម្រោងវិនិយោគធំៗ និងការកសាងហេដ្ឋារចនាសម្ព័ន្ធថ្មីៗដូចមុនទេ។ ម្យ៉ាងទៀតចំនួនការដ្ឋានសាងសង់លំនៅឋានលក្ខណៈអគារខុនដូ និងបុរី ក៏ថយចុះផងដែរ»។
របាយការណ៍ FSR 2020 ធនាគារជាតិនៃកម្ពុជាបង្ហាញថា ដោយសារវិបត្តិជំងឺកូវីដ ១៩ បាននាំឱ្យទុនវិនិយោគក្នុងវិស័យសំណង់ឆ្នាំ ២០២០ មានតម្លៃសរុប ៧,៨ ពាន់លានដុល្លារ ធ្លាក់ចុះ ៣២,១ ភាគរយធៀបនឹងឆ្នាំ ២០១៩ មានតម្លៃ ១១,៤ ពាន់លានដុល្លារ។
ក្រឡាផ្ទៃសំណង់បានធ្លាក់ចុះ ២៦,៩ ភាគរយ ស្មើនឹងប្រហែល ១៧ លានម៉ែត្រការ៉េ។ ក្នុងនោះផ្ទៃក្រឡាគម្រោងអភិវឌ្ឍន៍លំនៅឋានមាន ៤៦,១ ភាគរយ អគារពាណិជ្ជកម្ម ៣១,៨ ភាគរយ និងឧស្សាហកម្ម ១៤,៦ ភាគរយ៕ LA