.jpg)
អគារខុនដូជាច្រើនកំពុងសាងសង់នៅក្នុងរាជធានីភ្នំពេញ។ ហុង មិនា
ភ្នំពេញៈ បន្ទប់ខុនដូសរុប ១ ២៧៣ យូនីត បានបញ្ចប់ការសាងសង់ និងដាក់ចូលទីផ្សារនៅក្នុងឆមាសទី១ ឆ្នាំ ២០២១ ដែលធ្វើឱ្យចំនួនបន្ទប់ខុនដូក្នុងរាជធានីភ្នំពេញគិតត្រឹមដំណាច់ឆមាសទី១ ឆ្នាំ ២០២១ កើនដល់ជាង ២៧ ០០០ យូនីត។ នេះបើយោងតាមការស្រាវជ្រាវរបស់ក្រុមហ៊ុនអចលនទ្រព្យ CBRE Cambodia។
របាយការណ៍ចេញផ្សាយកាលពីថ្ងៃទី ៦ ខែកក្កដា បង្ហាញថា ក្នុងឆមាសទី១ ឆ្នាំ ២០២១ មានគម្រោងខុនដូចំនួន ៥ ដែលមានបន្ទប់ស្នាក់នៅសរុប ១ ២៧៣ យូនីត បានបញ្ចប់ការសាងសង់ដែលធ្វើឱ្យចំនួនខុនដូនៅរាជធានីភ្នំពេញកើនដល់ជាង ៩០ គម្រោង និងមានបន្ទប់ជាង ២៧ ០០០ យូនីត។
ការស្រាវជ្រាវបានរកឃើញថា វិបត្តិនៃការឆ្លងរាលដាលជំងឺផ្តាសាយកូវីដ ១៩ ដែលមានវត្តមានលើភពផែនដីជាង ១ ឆ្នាំមកនេះបានធ្វើឱ្យទីផ្សារខុនដូនៅកម្ពុជាដែលពឹងផ្អែកភាគច្រើនលើអតិថិជនជាជនបរទេសនោះ មិនមានដំណើរការល្អប្រសើរទេ ទាំងតម្លៃទិញ លក់ និងជួល។
បើយោងតាម CBRE Cambodia តម្លៃលក់ជាមធ្យមរបស់ខុនដូទាំង ៣ ប្រភេទបានធ្លាក់ចុះព្រមៗគ្នាចន្លោះពី ០,៣-៧,១ ភាគរយក្នុងឆមាសទី ១ ឆ្នាំ ២០២១ ធៀបនឹងឆមាសទី ២ ឆ្នាំ ២០២០ ដោយប្រភេទខុនដូប្រណីត (High-end) មានតម្លៃជាមធ្យម ២ ៨០២ ដុល្លារក្នុង ១ ម៉ែត្រការ៉េ ធ្លាក់ចុះ ៦,២ ភាគរយ ប្រភេទមធ្យម (Mid-Range) តម្លៃ ២ ១១៣ ដុល្លារ ធ្លាក់ ៧,១ ភាគរយ និងប្រភេទតម្លៃសមរម្យ (Affordable) មានតម្លៃ ១ ៤៩២ ដុល្លារ ធ្លាក់ចុះ ០,៣ ភាគរយ។
ចំណែកការជួលនៅក្នុងឆមាសទី ១ ឆ្នាំ ២០២១ ខុនដូប្រណីតមានតម្លៃជាមធ្យម ១២,៣ ដុល្លារក្នុង ១ ម៉ែត្រការ៉េសម្រាប់រយៈពេល ១ ខែ ធ្លាក់ចុះ ២,៧ ភាគរយ និងប្រភេទមធ្យមមានតម្លៃ ១០,១ ដុល្លារ ធ្លាក់ចុះ ០,៧ ភាគរយ។ ដោយឡែកប្រភេទតម្លៃសមរម្យមានតម្លៃ ៨,៤ ដុល្លារ កើន ៧ ភាគរយ។
អ្នកនាង គឹម គិនកេសា អ្នកគ្រប់គ្រងជាន់ខ្ពស់ក្រុមហ៊ុន CBRE Cambodia បានប្រាប់ភ្នំពេញប៉ុស្តិ៍កាលពីថ្ងៃទី ៧ ខែកក្កដាថា ការរីករាលដាលនៃជំងឺកូវីដ ១៩ គឺជាមូលហេតុចម្បងដែលធ្វើឱ្យទីផ្សារខុនដូធ្លាក់ចុះជាបន្តបន្ទាប់ ជាពិសេសរលកនៃការឆ្លងរាលដាលកូវីដ ១៩ នៃព្រឹត្តិការណ៍សហគមន៍ ២០ កុម្ភៈបានជះឥទ្ធិពលកាន់តែខ្លាំងបន្ថែមទៀតដល់អ្នកអភិវឌ្ឍន៍ និងភ្នាក់ងារលក់ក្នុងការឈានដល់កិច្ចព្រមព្រៀងទិញ-លក់ជាមួយអតិថិជន។
អ្នកនាង គិនកេសា បាននិយាយថា៖ «ក្តីព្រួយបារម្ភអំពីសុវត្ថិភាពសុខភាព បានធ្វើឱ្យចំនួនអតិថិជនមកទស្សនាកន្លែងលក់មិនសូវមានទេ»។
សម្រាប់រយៈពេល ៦ ខែទៀត តម្លៃទំនងជានឹងមានស្ថិរភាព។ ការចាក់វ៉ាក់សាំងនឹងផ្តល់ទំនុកចិត្តដល់វិនិយោគិនផងដែរ។
តាមការព្យាករក្នុងឆមាសទី ២ ឆ្នាំ ២០២១ នេះនឹងមានខុនដូប្រមាណ ១២ គម្រោង ដែលស្មើនឹងបន្ទប់សរុប ៦ ៦៣៦ យូនីតបញ្ចប់ការសាងសង់ និងដាក់ចូលទីផ្សារ។ នេះបើយោងតាម CBRE Cambodia។
របាយការណ៍និន្នាការសេដ្ឋកិច្ចសង្គមនៃក្រសួងសេដ្ឋកិច្ច និងហិរញ្ញវត្ថុ ចេញផ្សាយនៅដើមខែកក្កដាឱ្យដឹងថា ក្នុងរយៈពេល ៥ ខែ ដើមឆ្នាំ ២០២១ រដ្ឋាភិបាលកម្ពុជាបានអនុម័តគម្រោងសាងសង់សរុប ១ ៨២៣ បើធៀបនឹងរយៈពេលដូចគ្នាឆ្នាំ ២០២០ ធ្លាក់ចុះប្រមាណ ២៧៨ គម្រោង។ ក្នុងនោះគម្រោងសំណង់លំនៅឋានមានចំនួន ១ ៦០៧ គម្រោងស្មើនឹង ៨៧,៩ ភាគរយនៃសំណើសុំសាងសង់សរុបធ្លាក់ចុះ ១៣៩ គម្រោង ធៀបនឹងរយៈពេលដូចគ្នាឆ្នាំមុន។ គម្រោងលំនៅឋានដែលបានអនុញ្ញាតសាងសង់ គិតជាប្រាក់មានប្រមាណ ២ ៣៤៩ លានដុល្លារធ្លាក់ ៣២,៦ ភាគរយ៕ LA
