ភ្នំពេញៈ កម្ពុជាបាននាំចូលដែកពីប្រទេសវៀតណាមចំនួន ៥៨៤ តោន ក្នុងរយៈពេល ៥ ខែដើមឆ្នាំ ២០២១ ធ្លាក់ចុះ ១,៥ ភាគរយធៀបនឹងរយៈពេលដូចគ្នាឆ្នាំ ២០២០។ នេះបើតាមការចុះផ្សាយរបស់គេហទំព័រវៀតណាម VN Express។
VN Express បានឱ្យដឹងថា ចាប់ពីខែមករា ដល់ខែឧសភា ឧស្សាហកម្មដែករបស់ប្រទេសវៀតណាមបាននាំចេញដែកទៅទីផ្សារអន្តរជាតិសរុប ៤,៨៨ លានតោន កើនឡើង ៦១,៦ ភាគរយធៀបនឹងរយៈពេលដូចគ្នាឆ្នាំ ២០២០ និងតម្លៃសរុប ៣,៦១ ពាន់លានដុល្លារ កើនឡើង ១១៧ ភាគរយ។
កម្ពុជាស្ថិតនៅលេខរៀងទី ៤ នៃទីផ្សារនាំចេញដែករបស់ប្រទេសវៀតណាម តាមពីក្រោយប្រទេសចិនដែលមានចំនួន ១,១ លានតោន សហភាពអឺរ៉ុប ៧១៣ ០០០ តោន និងម៉ិកស៊ិក ២៩៣ ០០០ តោន។
តម្លៃដែកនៅទីផ្សារប្រទេសវៀតណាមបានកើនពី ៤០ ទៅ ៥០ ភាគរយចាប់តាំងពីដើមឆ្នាំ ២០២១។ នេះបើតាមក្រសួងឧស្សាហកម្ម និងពាណិជ្ជកម្ម។
ប្រធានផ្នែកទីផ្សារក្រុមហ៊ុននាំចូលដែកដ៏ធំមួយពីប្រទេសវៀតណាម ដែលសុំមិនបញ្ចេញអត្តសញ្ញាណ និងឈ្មោះក្រុមហ៊ុនបានប្រាប់ភ្នំពេញប៉ុស្តិ៍នាថ្ងៃទី ១១ ខែសីហាថា ការបញ្ជាទិញដែកសម្រាប់សាងសង់នៅក្រុមហ៊ុនរបស់លោកបានធ្លាក់ចុះយ៉ាងគំហុកក្នុងឆ្នាំ ២០២១ នេះ ដោយពេលនេះក្រុមហ៊ុនបញ្ចេញដែកលក់បានតែចំពោះគម្រោងកំពុងសាងសង់ប៉ុណ្ណោះ គឺមិនមានគម្រោងថ្មីឡើយ។
លោកបន្តថា ភាពស្ងប់ស្ងាត់នាពេលនេះ ដោយសារអតិថិជនរបស់ក្រុមហ៊ុនប្រហែល ៧០ ភាគរយគឺជាជនបរទេស ដែលពួកគេមានការលំបាក ឬមិនចង់ធ្វើដំណើរឆ្លងប្រទេសក្នុងអំឡុងពេលវិបត្តិកូវីដ ១៩ ជាហេតុធ្វើឱ្យផែនការរបស់ពួកគេត្រូវពន្យារពេល។ ប៉ុន្តែសម្រាប់ក្រុមហ៊ុនដែលមានអតិថិជនជាវិនិយោគគិនក្នុងស្រុក គឺអាចដំណើរការជាធម្មតា។
លោកអះអាងថា៖ «បច្ចុប្បន្នមានតែគម្រោងកំពុងសាងសង់ប៉ុណ្ណោះដែលនៅបន្តបញ្ជាទិញដែកពីក្រុមហ៊ុន ប៉ុន្តែសម្រាប់គម្រោងថ្មីៗដែលបានសិក្សា និងមានការព្រមព្រៀងបញ្ជាទិញរួចហើយជាមួយក្រុមហ៊ុន គឺស្ទើរទាំងអស់សុទ្ធតែសម្រេចពន្យារពេល»។
ជាមួយគ្នានេះ លោកបានប្រាប់ទៀតថា តម្លៃដែកនៅលើទីផ្សារអន្តរជាតិ និងក្នុងស្រុកក៏បានកើនឡើងច្រើនផងដែរក្នុងរយៈពេលជាង ១ ឆ្នាំមកនេះ ដោយតម្លៃដែកប្រភេទខ្លះបានកើនឡើងដល់ ៤០ ភាគរយបើធៀបនឹងឆ្នាំ ២០២០។ លោកប្រាប់ថា៖ «ខ្ញុំគិតថា តម្លៃដែកកើនឡើងនៅពេលនេះ អាចបណ្តាលមកពីកត្តាមួយចំនួនដូចជា បញ្ហាកង្វះវត្ថុធាតុដើម, ការធ្លាក់ចុះកម្លាំងពលកម្ម និងការបើកដំណើរការរោងចក្រផលិតដែកដោយសារវិបត្តិជំងឺកូវីដ ១៩, ជម្លោះពាណិជ្ជកម្មរបស់ប្រទេសធំៗ, ការបង្កើនពន្ធ និងជាពិសេសការកើនឡើងនៃតម្លៃដឹកជញ្ជូន»។
លោក សាន សារិក បុគ្គលិកផ្នែកលក់ក្រុមហ៊ុន RS Group Cambodia ដែលមានរោងចក្រផលិតដែកនៅតាមផ្លូវជាតិលេខ ៥១ បានប្រាប់ថា ទីផ្សារដែកចាប់ពីដើមឆ្នាំ ២០២១ រហូតមកដល់ពេលនេះមិនសូវមានសកម្មភាពខ្លាំងដូចមុនទេ ចំណែកតម្លៃក៏បានកើនឡើងប្រមាណ ២០ ភាគរយផងដែរបើធៀបនឹងរយៈពេលដូចគ្នាឆ្នាំមុន។
ការកើនឡើងតម្លៃនេះបណ្តាលមកពីវត្ថុធាតុដើម និងតម្លៃដឹកជញ្ជូនកើនឡើងខ្ពស់។ លោកបន្ថែមថា៖ «នៅពេលនេះដែកថ្នាំងអំពៅរបស់ក្រុមហ៊ុនលោក មានតម្លៃពី ៦៨០-៦៩០ ដុល្លារក្នុង ១ តោន កើនពី ៥៨០ ដុល្លារកាលពីឆ្នាំមុន»។
លោកលើកឡើងទៀតថា ទីផ្សារនេះអាចនឹងមានសម្ទុះខ្លាំងឡើងវិញនៅពេលដែលការរីករាលដាលជំងឺកូវីដ ១៩ ត្រូវបានបញ្ចប់ ដែលពេលនោះវិស័យសំណង់ប្រាកដជាមានសម្ទុះឡើងវិញជាបន្តបន្ទាប់។
លោក ជីវ ស៊ីវផេង ប្រធានគ្រប់គ្រងទូទៅសមាគមអ្នកសាងសង់កម្ពុជាធ្លាប់និយាយថា ការធ្លាក់ចុះតម្រូវការដែកក្នុងវិស័យសំណង់ គឺបណ្តាលមកពីការឆ្លងរាលដាលជំងឺកូវីដ- ១៩ ដែលបង្ខំឱ្យការដ្ឋានមួយចំនួនបន្ថយល្បឿនសាងសង់ និងមួយចំនួនទៀតផ្អាកសកម្មភាពទាំងស្រុង។
លោកបន្តថា ការថមថយល្បឿនក្នុងវិស័យសំណង់ គេអាចមើលឃើញតាមរយៈការធ្លាក់ចុះចំនួនទុនវិនិយោគដែលក្រសួងរៀបចំដែនដី បានអនុម័តក្នុងរយៈពេលជាង ១ ឆ្នាំមកនេះ។
លោកប្រាប់ថា៖ «យើងទទួលស្គាល់ថា ការនាំចូលសម្ភារ និងទុនវិនិយោគវិស័យសាងសង់បានធ្លាក់ចុះក្នុងអំឡុងពេលនៃការរីករាលកូវីដ ១៩ ពិសេសសំណង់ធំៗដែលវិនិយោគដោយជនបរទេស។ ទោះយ៉ាងណាវានឹងមានកំណើនវិញនៅពេលការឆ្លងរាលដាលជំងឺកូវីដ-១៩ អាចគ្រប់គ្រងបាន»។
កាលពីខែធ្នូ ចុងឆ្នាំ ២០២០ រោងចក្រផលិតដែកថែបរបស់ក្រុមហ៊ុន ហុងឌីសេង (ខេមបូឌា) ស្ទីល ដែលវិនិយោគដោយវិនិយោគិនចិនក្នុងទឹកប្រាក់ប្រមាណ ១៦,៧ លានដុល្លារនៅខេត្តកំពង់ស្ពឺ ក៏បានដាក់ឱ្យដំណើរការផងដែរ ដោយមានទិន្នផលប្រចាំឆ្នាំ ៥០០ ០០០ តោននៅដំណាក់កាលដំបូង។
ទិន្នន័យក្រសួងពាណិជ្ជកម្មបង្ហាញថា នៅក្នុងឆ្នាំ ២០២០ កម្ពុជាបាននាំចូលដែក ក្នុងតម្លៃសរុប ៤០៣,៦៣ លានដុល្លារ ធ្លាក់ចុះ ២៧,៥២ ភាគរយពីចំនួន ៥៥៦,៨៥ លានដុល្លារក្នុងឆ្នាំ ២០១៩៕LA
វីដេអូ៖