The Phnom Penh Post Search

Search form

Logo of Phnom Penh Post newspaper Phnom Penh Post - អចលនទ្រព្យ​នៅ​កោះកុង​ នឹង​មាន​សញ្ញា​វិជ្ជមាន




អចលនទ្រព្យ​នៅ​កោះកុង​ នឹង​មាន​សញ្ញា​វិជ្ជមាន

Content image - Phnom Penh Post
ដីដាក់លក់ ១ កន្លែង ក្នុងខេត្តកោះកុង។ រូបថត ហ្វេសប៊ុក

អចលនទ្រព្យ​នៅ​កោះកុង​ នឹង​មាន​សញ្ញា​វិជ្ជមាន

ភ្នំពេញៈ អ្នកជំនាញ​អចលនទ្រព្យ​លើកឡើងថា ការត្រៀម​បើកទទួល​ភ្ញៀវទេសចរ​អន្តរជាតិ​ឱ្យមក​ទស្សនា​កម្ពុជា ព្រមជាមួយ​នឹង​ផែនការ​បើកដំណើរការ​អាកាសយានដ្ឋាន​អន្តរជាតិ​តារាសាគរ​ (​ខេត្តកោះកុង​) នៅ​ដំណាច់​ឆ្នាំនេះ​នឹង​រួមចំណែក​យ៉ាងច្រើន​នៅក្នុង​ការធ្វើឱ្យ​ទីផ្សារ​អចលនទ្រព្យ​ក្នុង​ខេត្តកោះកុង និង​តំបន់​ក្បែរ​ខាង​មាន​សម្ទុះ​កើនឡើង​។

លោកនាយក​រដ្ឋមន្ត្រី ហ៊ុន សែន កាលពី​ថ្ងៃទី​ ១៧ ខែកញ្ញា​ បានប្រកាស​ថា ការទទួល​ជោគជ័យ​នៃ​យុទ្ធនាការ​ចាក់​វ៉ាក់សាំង​ប្រឆាំងនឹង​ជំងឺ​កូវីដ​ ១៩ នឹង​ផ្តល់​លទ្ធភាព​ឱ្យ​ប្រទេស​កម្ពុជា​ អាច​បើកទ្វារ​ទទួលភ្ញៀវ​ទេសចរ​ចាក់​វ៉ាក់សាំង​រួចរាល់​ក្នុងពេល​ឆាប់ៗ​។

បន្ថែម​ពីលើ​នេះ​ក្នុងជំនួប​ជាមួយ​តំណាង​ក្រុមហ៊ុន​សាងសង់​អាកាសយានដ្ឋាន​អន្តរជាតិ​តារាសាគរ កាលពី​ថ្ងៃទី​ ២១ កញ្ញា លោក ម៉ៅ ហាវណ្ណាល់ រដ្ឋមន្ត្រី​ទទួលបន្ទុក​រដ្ឋលេខាធិការដ្ឋាន​អាកាសចរ​ស៊ីវិល​ក៏បាន​ឯកភាព​ឱ្យ​ក្រុមហ៊ុន​សាងសង់​ព្រលាន​យន្តហោះ​ត្រៀម​បើក​ដំណើរការ​សាកល្បង​តាម​លក្ខណៈ​បច្ចេកទេស​នៅ​ដំណាច់​ឆ្នាំនេះ​ផងដែរ​។

អគ្គនាយក​ក្រុមហ៊ុន​អចលនទ្រព្យ ឡាក់គី រៀលធី លោក ឌឹត ចណ្ណា បាន​ប្រាប់​ ភ្នំពេញ ​ប៉ុស្តិ៍​ កាលពី​ថ្ងៃទី​ ២២ ខែកញ្ញា ថា នៅពេល​មានការ​អភិវឌ្ឍ ឬ​ការធ្វើដំណើរ​ឆ្លងកាត់​ច្រើន តម្លៃ​អចលនទ្រព្យ​នឹង​កើនឡើង​ដោយ​ស្វ័យប្រវត្តិ​។ អាកាសយានដ្ឋាន​អន្តរជាតិ​នេះ​នឹង​រួមចំណែក​ច្រើន​ដល់​ទីផ្សារ​អចលនទ្រព្យ​ក្នុង​តំបន់​នោះ ព្រោះ​នៅពេល​ព្រលានយន្តហោះ​ចាប់ផ្តើម​ដំណើរការ វិស័យ​សំខាន់ៗ​ដូចជា​វិស័យ​ដឹកជញ្ជូន និង​ទេសចរណ៍ ប្រាកដជា​នឹងមាន​ដំណើរ​ការល្អ ដូចជា​តម្រូវការ​កន្លែង​ស្នាក់នៅ កម្សាន្ត និង​ឃ្លាំង​ស្តុក​ទំនិញ​ជាដើម​។ នៅពេល​មាន​តម្រូវការ​កន្លែង​ទាំងអស់នេះ តម្លៃ​អចលនទ្រព្យ​នឹង​កើនឡើង​តាម​នោះដែរ​។

លោក​លើកឡើងថា​៖ «​ការត្រៀម​បើកទទួល​ភ្ញៀវទេសចរ​បរទេស​ឡើងវិញ ព្រមជាមួយ​ផែនការ​បើក​ដំណើរការ​ព្រលានយន្តហោះ​នេះ​នឹង​ធ្វើឱ្យ​ទីផ្សារ​អចលនទ្រព្យ​នៅ​តំបន់​ក្បែរ​ខាង​ព្រលានយន្តហោះ​តារាសាគរ កើនឡើង​មួយកម្រិត​។

លោក​បន្តថា ទោះយ៉ាងណា​ការកើនឡើង​តម្លៃ និង​តម្រូវការ​អចលនទ្រព្យ​នៅ​ទីនោះ​នឹង​មិនមាន​សម្ទុះ​ខ្លាំង​ដូច​ក្នុង​ខេត្ត​ព្រះសីហនុ ដែល​នៅជាប់​នោះទេ ដោយ​វា​នៅ​ត្រូវការ​ពេល​បន្ថែមទៀត​។

អគ្គនាយក​ក្រុមហ៊ុន​អចលនទ្រព្យ KFA លោក នួន រិទ្ធី និយាយ​ថា នៅពេល​ព្រលានយន្តហោះ​តារាសាគរ​បើក​ដំណើរការ ហើយ​ជើងហោះហើរ​លក្ខណៈ​អន្តរជាតិ​ចាប់ផ្តើម​ចូលមក កំណើន​ភ្ញៀវទេសចរ​បរទេស​ចូលមក​កម្ពុជា​នឹងមាន​ចំនួន​ច្រើន ដែល​វា​នឹង​ធ្វើឱ្យ​ទីផ្សារ​អចលនទ្រព្យ​នៅ​ទីនោះ​អាច​កើនឡើង​ច្រើន ឬ​អាច​ជិត​ទ្វេដង​បើ​ធៀប​នឹង​បច្ចុប្បន្ន​។

លោក​បន្តថា មួយវិញទៀត ដោយសារ​វា​ជា​ព្រលានយន្តហោះ​ខ្នាត​អន្តរជាតិ និង​នៅជាប់​មាត់សមុទ្រ ដូច្នេះ​វា​នឹងមាន​សក្តានុពល​ក្នុង​ការទាក់ទាញ​ការវិនិយោគ​ធំៗ ឱ្យទៅ​បណ្តាក់ទុន​នៅក្បែរៗ​នោះ​។

លោក​បន្ថែមថា​៖ «​ខ្ញុំ​គិតថា ការមកដល់​នៃ​យន្តហោះ​ធំៗ​នៅក្នុង​ព្រលានយន្តហោះ​ខេត្តកោះកុង នឹង​ចូលរួម​ចំណែក​ច្រើន​ក្នុងការ​ជំរុញ​កំណើន​តម្លៃ និង​តម្រូវការ​អចលនទ្រព្យ​ឱ្យមាន​សម្ទុះ​ខ្លាំង​។ តម្លៃ​អចលនទ្រព្យ​ក៏​នឹង​កើន​ទៅតាម​នោះដែរ​»៕ LA

អត្ថបទគួរចាប់អារម្មណ៍