ភ្នំពេញៈ ទីតាំងកន្លែងជួលលក់រាយ (Retail) ចំនួន ៣ បានបញ្ចប់ការសាងសង់ និងដាក់ចូលទីផ្សារក្នុងត្រីមាសទី ៣ ឆ្នាំ ២០២១ ដែលធ្វើឱ្យក្រឡាផ្ទៃកន្លែងលក់រាយគិតត្រឹមខែកញ្ញា ឆ្នាំ ២០២១ មានប្រមាណ ៣៧០ ០០០ ម៉ែត្រការ៉េ។ នេះបើយោងតាមការស្រាវជ្រាវរបស់ក្រុមហ៊ុនអចលនទ្រព្យ CBRE Cambodia។
របាយការណ៍បានឱ្យដឹងថា កាលពីត្រីមាសទី ៣ កន្លងមកក្នុងរាជធានីភ្នំពេញមានកន្លែងលក់រាយប្រភេទ Community Mall ចំនួន ៣ បានដាក់ចូលទីផ្សារដែលរួមមានគម្រោង SCG Design Village, The Commune និង MC Park។
យោងតាម CBRE Cambodia សម្រាប់អត្រាប្រើប្រាស់របស់កន្លែងលក់រាយនៅភ្នំពេញក្នុងត្រីមាសទី ៣ ឆ្នាំ ២០២១ គឺមានចំនួន ៦៧,៧ ភាគរយធ្លាក់ចុះ ៣,៨ ភាគរយបើធៀបនឹងត្រីមាសទី ២ ឆ្នាំ ២០២១។
ចំណែកតម្លៃជួលក្នុងត្រីមាសទី៣ គឺកន្លែងជួលលក់រាយប្រភេទ Prime High Street (ហាងលក់ទំនិញតាមផ្លូវធំៗ) មានតម្លៃជួលមធ្យម ២៣,៦០ ដុល្លារក្នុង ១ ម៉ែត្រការ៉េរយៈពេល ១ ខែ ធ្លាក់ចុះ ០,៤ ភាគរយធៀបត្រីមាសទី២ ឆ្នាំ ២០២១, Shopping Mall (ផ្សារទំនើបខ្នាតធំ) មានតម្លៃ ៤០,៨០ ដុល្លារ ធ្លាក់ចុះ ២,៤ ភាគរយ, Retail Podium (ហាងលក់ទំនិញតាមអគារពាណិជ្ជកម្ម) មានតម្លៃ ២៤,៣០ ដុល្លារ ធ្លាក់ចុះ ៩ ភាគរយ និង Community Mall មានតម្លៃថេរ ២១,៥០ ដុល្លារ។
អ្នកនាង គឹម គិនកេសា អ្នកគ្រប់គ្រងជាន់ខ្ពស់នៃក្រុមហ៊ុន CBRE Cambodia បានប្រាប់ ភ្នំពេញ ប៉ុស្តិ៍ ក្នុងថ្ងៃទី ២៧ ខែតុលាថា ចាប់តាំងពីការផ្ទុះជំងឺកូវីដ ១៩ លើពិភពលោកកាលពីដើមឆ្នាំ ២០២០ ទីផ្សារកន្លែងជួលលក់រាយបានធ្លាក់ចុះជាបន្តបន្ទាប់។ ប៉ុន្តែអ្វីដែលជាការដាក់សម្ពាធបន្ថែមនោះ គឺព្រឹត្តិការណ៍សហគមន៍ ២០ កុម្ភៈ ដែលបង្ខំឱ្យអាជ្ញាធរបិទកន្លែងលក់រាយមួយចំនួន ដើម្បីកាត់ផ្តាច់ការឆ្លងជំងឺកូវីដ ១៩។
អ្នកនាង គិនកេសា អះអាងថា៖ «ទោះបីពេលនេះរដ្ឋាភិបាលបានបើកដំណើរការសេដ្ឋកិច្ចជាច្រើនវិញហើយក៏ដោយ ក៏ទីផ្សារតម្រូវការកន្លែងជួល និងតម្លៃរបស់ទីតាំងលក់រាយមិនបានស្ទុះឡើងវិញភ្លាមៗទេ។ បើតាមការប៉ាន់ប្រមាណ ដើម្បីឱ្យទីផ្សារនេះមានចលនាឡើងវិញ គេត្រូវការពេលមិនតិចជាង ៦ ខែនោះទេ បន្ទាប់ពីស្ថានភាពសេដ្ឋកិច្ច និងសង្គមមានដំណើរការជាធម្មតា»។
ទាក់ទងនឹងតម្លៃជួល និងអត្រាប្រើប្រាស់ អ្នកនាង កេសា បានអះអាងថា នឹងមិនងាយងើបឡើងវិញទេនៅក្នុងអំឡុងពេលខាងមុខឆាប់ៗនេះ ព្រោះក្តីបារម្ភពីការផ្ទុះជាថ្មីនៃជំងឺកូវីដ-១៩ និងការដាក់ចូលទីផ្សារនៅតែមានជាបន្តបន្ទាប់៕ LA