ភ្នំពេញៈ គម្រោងអភិវឌ្ឍន៍ «ផ្សារទំនើបសិនជូរីផ្លាហ្សា» ដែលស្ថិតនៅបណ្តោយមហាវិថីសហព័ន្ធរុស្ស៊ី បានបញ្ចប់ការសាងសង់គ្រោងអគាររួចរាល់ហើយ ដោយគ្រោងបើកដំណើរការមុនពិធីបុណ្យចូលឆ្នាំខ្មែរខាងមុខ។
គម្រោងអភិវឌ្ឍន៍ផ្សារទំនើបសិនជូរី ផ្លាហ្សា បានបើកការដ្ឋានសាងសង់កាលពីថ្ងៃទី ២៧ ខែវិច្ឆិកា ឆ្នាំ ២០១៩ លើទីតាំងចាស់នៃផ្សារសិនជូរីផ្លាហ្សា ដែលវិនិយោគដោយក្រុមហ៊ុន JLECC និងមានកម្ពស់ ៦ ជាន់។ ជាន់ផ្ទាល់ដី គ្រោងប្រើប្រាស់ជាកន្លែងលក់ត្រី សាច់ បន្លែ ផ្លែឈើ, ជាន់ទី ១ កន្លែងលក់ទំនិញទូទៅ (គ្រឿងឧបភោគ បរិភោគ សម្លៀកបំពាក់ គ្រឿងអលង្ការ), ជាន់ទី ២ ហាងប្រណីត កន្លែងថែរក្សាសុខភាព និងសម្ផស្ស, ជាន់ទី ៣ ភោជនីយដ្ឋាន ជាន់ទី ៤, ៥ និង ៦ ជាសណ្ឋាគារលំដាប់ផ្កាយ ៤ ព្រមទាំងមានសួនច្បារនៅខាងលើផងដែរ។
នៅក្នុង «ពិធីប្រកាសបញ្ចប់ជាស្ថាពរការសាងសង់ផ្នែកគ្រឿងបង្គុំសំណង់នៃគម្រោងសាងសង់អគារផ្សារទំនើបសិនជូរីផ្លាហ្សា» កាលពីថ្ងៃទី ៣ វិច្ឆិកា លោក នួន ផារ័ត្ន អភិបាលរងរាជធានី-ភ្នំពេញបានលើកឡើងថា នៅពេលបើកឱ្យដំណើរការផ្សារទំនើបសិនជូរីផ្លាហ្សានឹងក្លាយជាមជ្ឈមណ្ឌលពាណិជ្ជកម្មថ្មីមួយទៀត ដែលជួយលើកស្ទួយកិត្យានុភាពរាជធានីភ្នំពេញ ពិសេសក្នុងឱកាសនៃកិច្ចប្រជុំធំៗដែលកម្ពុជាត្រូវធ្វើជាម្ចាស់ផ្ទះ ក៏ដូចជាការប្រកួតកីឡាប្រជាជាតិអាស៊ីអាគ្នេយ៍ឆ្នាំ ២០២៣ ខាងមុខផងដែរ។
អ្នកនាង គឹម គិនកេសា អ្នកគ្រប់គ្រងជាន់ខ្ពស់នៃក្រុមហ៊ុន CBRE Cambodia បានប្រាប់ ភ្នំពេញ ប៉ុស្តិ៍ នាថ្ងៃទី ៤ ខែវិច្ឆិកា ថា ចំណុចខ្លាំងរបស់ផ្សារទំនើបសិនជូរីផ្លាហ្សា គឺស្ថិតនៅទីតាំងមានមនុស្សរស់នៅច្រើន និងជិតព្រលានយន្តហោះអន្តរជាតិភ្នំពេញ ដែលជាកន្លែងមានការធ្វើដំណើរឆ្លងកាត់ច្រើន។ ដោយសារអគារផ្សារទំនើបនេះនឹងត្រូវប្រើប្រាស់ជាលក្ខណៈចម្រុះរាប់ចាប់តាំងពីកន្លែងលក់ម្ហូបអាហារ ហាងទំនើបៗ និងសណ្ឋាគារនោះ ដូច្នេះទីនោះនឹងអាចមានអតិថិជនច្រើនពេលបើកដំណើរការ។
អ្នកនាងអះអាងថា៖ «ជាមួយនឹងសក្តានុពលទីតាំង ខ្ញុំគិតថាផ្សារទំនើបនេះអាចនឹងឆាប់ទទួលជោគជ័យ»។
របាយការណ៍ស្រាវជ្រាវរបស់ក្រុមហ៊ុន CBRE Cambodia បង្ហាញថា ផ្ទៃក្រឡាទីតាំងលក់រាយ (Retail) នៅរាជធានីភ្នំពេញគិតត្រឹមដំណាច់ខែកញ្ញា ឆ្នាំ ២០២១ មានចំនួនប្រមាណ ៣៧០ ០០០ ម៉ែត្រការ៉េ ដោយអត្រាប្រើប្រាស់មានចំនួន ៦៧,៧ ភាគរយ៕ LA