ភ្នំពេញៈ ទោះបីវិបត្តិជំងឺកូវីដ ១៩ នៅតែបន្តការគំរាមកំហែងដល់សេដ្ឋកិច្ចក៏វិស័យអចលនទ្រព្យកម្ពុជានៅតែមានសក្តានុពលខ្ពស់ និងមានតម្លៃសមរម្យសម្រាប់ការវិនិយោគ ជាពិសេសនៅតំបន់សំខាន់ៗ ដែលកំពុងមានកំណើននៃការចាប់អារម្មណ៍ និងសកម្មភាពវិនិយោគជាបន្តបន្ទាប់។ នេះបើតាមរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។
ក្នុងឱកាសបើកសមាជលើកទី ២៣ របស់សមាគមអ្នកវាយតម្លៃអាស៊ាន (The 23rd AS-EAN Valuers Association Congress) ដែលកម្ពុជាធ្វើជាម្ចាស់ផ្ទះ កាលពីថ្ងៃទី ២៥ ខែវិច្ឆិកា និងត្រូវបានធ្វើឡើងតាមរយៈប្រព័ន្ធវីដេអូ លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានលើកឡើងថា វិបត្តិជំងឺកូវីដ ១៩ មិនត្រឹមតែជាវិបត្តិសុខភាពសាធារណៈប៉ុណ្ណោះទេ ប៉ុន្តែថែមទាំងបង្កឱ្យមានផលប៉ះពាល់យ៉ាងច្រើនដល់ដំណើរការសេដ្ឋកិច្ច និងសង្គមគ្រប់វិស័យ។ លោកបន្តថា ទោះយ៉ាងណាជាមួយនឹងវិបត្តិនេះកម្ពុជាបាននិងកំពុងខិតខំយ៉ាងខ្លាំងក្នុងការរស់នៅ និងសម្របសម្រួលបរិយាកាសអាជីវកម្មរបស់ខ្លួនឱ្យស្របទៅបរិបទថ្មីនៃកូវីដ ១៩។
លោកថ្លែងថា៖ «ទោះបីកម្ពុជាកំពុងប្រឈមនឹងជំងឺកូវីដ ១៩ និងបន្តសម្របខ្លួនទៅនឹងប្រក្រតីភាពថ្មីក្ដី ក៏វិស័យអចលនវត្ថុក្នុងប្រទេសនៅតែមានសក្តានុពលខ្ពស់ និងមានតម្លៃទាបសមរម្យសម្រាប់ការវិនិយោគ បើធៀបនឹងប្រទេសជិតខាង»។
យោងតាមលោក ព័ន្ធមុនីរ័ត្ន តំបន់សំខាន់ៗចំនួន ៤ នៅកម្ពុជាដែលមានសក្តានុពលខ្ពស់សម្រាប់ការវិនិយោគ រួមមាន រាជធានីភ្នំពេញ និងខេត្តកណ្តាល ជាកន្លែងមានគម្រោងសាងសង់អាកាសយានដ្ឋានថ្មី, ខេត្តព្រះសីហនុ កំពុងត្រូវបានប្រែក្លាយជាតំបន់សេដ្ឋកិច្ចពិសេសពហុបំណង, ខេត្តសៀមរាប ជាតំបន់ទេសចរណ៍ប្រវត្តិសាស្ត្រ, និងក្រុងប៉ាវិត និងក្រុងប៉ោយប៉ែត ជាតំបន់មាត់ច្រកព្រំដែនកម្ពុជា-វៀតណាម និងកម្ពុជា-ថៃ។
ជាមួយគ្នានេះ លោក ព័ន្ធមុនីរ័ត្ន ក៏បានជំរុញឱ្យប្រតិបត្តិករអចលនទ្រព្យ និងអ្នកជំនាញផ្នែកវាយតម្លៃអចលនទ្រព្យនៅកម្ពុជា ព្រមទាំងអ្នកចូលរួមក្នុងសមាជលើកទី ២៣ របស់សមាគមអ្នកវាយតម្លៃអាស៊ានទាំងអស់ត្រូវបង្កើនការខិតខំពង្រឹងសមត្ថភាពរបស់ខ្លួនឱ្យកាន់តែប្រសើរ តាមរយៈកិច្ចសហការ និងពិភាក្សាគ្នាពីបញ្ហាប្រឈម និងកាលានុវត្តភាពថ្មីៗដែលកំពុងកើតមាន ដើម្បីឈានឈ្ពោះទៅការបង្កើតបាននូវស្តង់ដានៃការវាយតម្លៃមួយដែលមានលក្ខណៈស្តង់ដាសម្រាប់សមាជិកសមាគមអ្នកវាយតម្លៃអាស៊ានទាំងអស់។
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ដែលជាប្រធាននៃកិច្ចប្រជុំនេះបាននិយាយថា វិបត្តិជំងឺកូវីដ ១៩ បានបង្កឱ្យមានផលប៉ះពាល់យ៉ាងខ្លាំងសម្រាប់វិស័យអចលនទ្រព្យនៅកម្ពុជា ប៉ុន្តែទីផ្សារនេះរំពឹងមានដំណើរការល្អឡើងវិញ ខណៈយុទ្ធនាការនៃការចាក់ថ្នាំបង្ការជំងឺកូវីដ ១៩ របស់ប្រជាជនក្នុងស្រុក និងការបើកដំណើរការសេដ្ឋកិច្ចនៅកម្ពុជាបានចាប់ផ្តើមជាបន្តបន្ទាប់។
លោកអះអាងថា៖ «ខ្ញុំមានសុទិដ្ឋិនិយមខ្លាំងចំពោះឱកាសទីផ្សារវិស័យអចលនទ្រព្យនៅកម្ពុជា»៕ LA