.jpg)
វិស័យអចលនទ្រព្យកម្ពុជាក្នុងឆ្នាំ ២០២២ អាចនឹងមានកំណើនទ្វេដងធៀបឆ្នាំ ២០២១។ ហ៊ាន រង្សី
ភ្នំពេញៈ អត្រាកំណើនវិស័យអចលនទ្រព្យនៅកម្ពុជា ត្រូវបានព្យាករណ៍ថា នឹងស្ទុះងើបឡើងវិញ ក្នុងអត្រា ២,៤ ភាគរយក្នុងឆ្នាំ ២០២១ ហើយនឹងកើនដល់ ៤,៨ ភាគរយក្នុងឆ្នាំ ២០២២ ខណៈការវិនិយោគ និងតម្រូវការក្នុងស្រុកនៅតែមានភាពល្អប្រសើរ។ នេះបើយោងតាមលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។
ថ្លែងក្នុងកម្មវិធីសមាជលើកទី២៣ របស់សមាគមអ្នកវាយតម្លៃអចលនវត្ថុអាស៊ាន ក្រោមប្រធានបទ «ការវាយតម្លៃអចលនវត្ថុ ក្នុងអំឡុងពេលនៃការរីករាលដាលជំងឺកូវីដ ១៩» កាលពីថ្ងៃទី ២៥ ខែវិច្ឆិកា លោក អូន ព័ន្ធមុនីរ័ត្ន បានឱ្យដឹងថា ស្របតាមនិន្នាការសកល សេដ្ឋកិច្ចកម្ពុជាក្នុងឆ្នាំ ២០២១ ត្រូវបានព្យាករ នឹងងើបឡើងវិញក្នុងកំណើនទាបប្រមាណ ២,៤ ភាគរយ និងកើនដល់ ៤,៨ភាគរយក្នុងឆ្នាំ២០២២ ដោយសារការងើបឡើងនៃសកម្មភាពសេដ្ឋកិច្ចក្នុងស្រុក និងសកល។
ដោយឡែកសម្រាប់វិស័យអចលនវត្ថុនៅកម្ពុជា ត្រូវបានព្យាករថា នឹងងើបឡើងវិញក្នុងកំណើនទាប ២,៤ ភាគរយ ក្នុងឆ្នាំនេះ និង ៤,៨ ភាគរយក្នុងឆ្នាំ ២០២២ ដោយសារការកើនឡើងសន្សឹមៗនៃលំហូរទុនវិនិយោគពីបរទេស ខណៈការវិនិយោគ និងតម្រូវការក្នុងស្រុក នៅលើវិស័យអចលនទ្រព្យដែលមានតម្លៃទាប និងមធ្យមនឹងបន្តរក្សាកំណើនល្អប្រសើរ។
ទោះយ៉ាងណា លោកអះអាងថា៖«ខ្ញុំសូមគូសបញ្ជាក់ថា ការព្យាករទាំងអស់នេះស្ថិតក្នុងភាពជាការប៉ាន់ស្មាននៅឡើយ ដោយសារហានិភ័យពីរលកថ្មីនៃការបំប្លែងខ្លួនថ្មីនៃវីរុស១៩ ដែលមានសភាពកាន់តែកាចសាហាវ នៅតែជាបញ្ហាប្រឈមសម្រាប់ការអភិវឌ្ឍក្នុងសកលលោក និងតំបន់»។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម កាលពីពេលថ្មីៗនេះ បាននិយាយថា វិបត្តិនៃការឆ្លងរាលដាលនៃជំងឺកូវីដ ១៩ បានធ្វើឱ្យទីផ្សារអចលនទ្រព្យកម្ពុជាក្នុងឆ្នាំ២០២០-២០២១ មិនមានសកម្មភាពល្អទេ ប៉ុន្តែលោករំពឹងថាវានឹងមានកំណើនឡើងវិញក្នុងឆ្នាំ២០២២ ខាងមុខ ជាពិសេសបន្ទាប់ពីពិធីបុណ្យចូលឆ្នាំចិនរួចរាល់៕
