ភ្នំពេញៈ ឧបសគ្គធ្វើដំណើរឆ្លងប្រទេសរបស់វិនិយោគិនបរទេស ដែលបណ្តាលមកការរីករាលដាលជំងឺកូវីដ ១៩ បានធ្វើឱ្យទុនវិនិយោគវិស័យសំណង់កម្ពុជា រយៈពេល ៣ ត្រីមាស ឆ្នាំ ២០២១ សម្រេចបានជាង ៤,៦ ពាន់លានដុល្លារ ធ្លាក់ចុះជាង ២០ ភាគរយបើធៀបនឹងរយៈពេលដូចគ្នាឆ្នាំ ២០២០។ នេះបើយោងតាមទិន្នន័យក្រសួងសេដ្ឋកិច្ច និងហិរញ្ញវត្ថុ។
ទិន្នន័យឱ្យដឹងថា ចាប់ពីខែមករា ដល់ខែកញ្ញា ឆ្នាំ ២០២១ ក្រសួងរៀបចំដែនដី នគរូបនីយកម្ម និងសំណង់បានផ្តល់ការអនុញ្ញាតឱ្យគម្រោងសាងសង់ចំនួន ៣ ២៦៣ គម្រោង ធ្លាក់ចុះ ៤៧៦ គម្រោង បើធៀបនឹងរយៈពេលដូចគ្នាឆ្នាំ ២០២០ ក្នុងនោះគម្រោងប្រភេទលំនៅឋានមាន ២ ៩០៩ គម្រោង ធ្លាក់ចុះ ៣៤៤ គម្រោង។ សម្រាប់ទុនវិនិយោគដែលបានអនុញ្ញាតឱ្យសាងសង់មានចំនួន ៤ ៦៥៧ លានដុល្លារ ធ្លាក់ចុះ ២០,៦ ភាគរយ ធៀបរយៈពេលដូចគ្នាឆ្នាំ ២០២០ ដែលមានចំនួន ៥ ៨៦៨ លានដុល្លារ។
លោក ជីវ ស៊ីវផេង អ្នកគ្រប់គ្រងទូទៅនៃសមាគមអ្នកសាងសង់កម្ពុជាបានប្រាប់ភ្នំពេញ-ប៉ុស្តិ៍នៅថ្ងៃទី ២២ ខែធ្នូថា ហេតុផលដែលធ្វើឱ្យប្រាក់វិនិយោគវិស័យសំណង់ និងចំនួនគម្រោងសាងសង់ធ្លាក់ចុះ គឺមកពីការរឹតត្បិតការធ្វើដំណើរឆ្លងប្រទេស ដែលធ្វើឱ្យប៉ះពាល់ដល់វិនិយោគិនបរទេសក្នុងការចូលមកស្វែងរក និងសិក្សាឱកាសវិនិយោគនៅកម្ពុជា។ ទោះបីយ៉ាងណាបន្ទាប់ពីរដ្ឋាភិបាលសម្រេចបើកទទួលភ្ញៀវទេសចរ និងអ្នកវិនិយោគចាក់វ៉ាក់សាំងគ្រប់ដូស លោកសង្កេតឃើញសកម្មភាពក្នុងវិស័យសំណង់ និងការសិក្សាពីលទ្ធភាពវិនិយោគចាប់កម្រើកបណ្តើរៗវិញហើយ។
លោកនិយាយថា៖ «ការរីករាលដាលកូវីដ ១៩ បានបង្អាក់សកម្មភាពស្ទើរគ្រប់វិស័យ រួមទាំងវិស័យសំណង់។ ចំនួនទឹកប្រាក់វិនិយោគ និងចំនួនគម្រោង ដែលធ្លាក់ចុះនេះ ភាគច្រើនកើតមានចំពោះគម្រោងវិនិយោគដោយជនបរទេស ប៉ុន្តែសម្រាប់គម្រោងរបស់វិនិយោគនៅក្នុងស្រុក គឺដំណើរការធម្មតា»។
អគ្គលេខាធិការនៃសមាគមអ្នកអភិវឌ្ឍន៍លំនៅឋានកម្ពុជា លោក ហ៊ុយ វណ្ណា ទទួលស្គាល់ថា វត្តមានជំងឺកូវីដ ១៩ បានធ្វើឱ្យគម្រោងសាងសង់អគារធំៗជាច្រើនដែលមានម្ចាស់ជាជនបរទេសថយចុះសកម្មភាព ប៉ុន្តែសម្រាប់គម្រោងអភិវឌ្ឍន៍បុរី និងលំនៅឋាន ដែលមានម្ចាស់ជាវិនិយោគក្នុងស្រុកមិនមានអ្វីជាបញ្ហានោះទេ។
លោកបន្តថា៖ «ការធ្លាក់ចុះវិស័យសំណង់ គឺបណ្តាលមកពីការធ្លាក់ចុះសម្រាប់គម្រោងធំៗដែលវិនិយោគដោយជនបរទេសតែប៉ុណ្ណោះ»។
អគ្គនាយកក្រុមហ៊ុនអចលនទ្រព្យ ឡាក់គី រៀលធី លោក ឌឹត ចណ្ណា និយាយថា បន្ទាប់ពីស្ងប់ស្ងាត់មួយរយៈ វិស័យសំណង់ និងអចលនទ្រព្យកម្ពុជាបានរើបឡើងវិញជាបន្តបន្ទាប់ គ្រាន់តែក្នុងដំណាក់កាលនេះភាគច្រើនជាគម្រោងរបស់អ្នកវិនិយោគក្នុងស្រុក។
លោកលើកឡើងថា៖ «ទីផ្សារអចលនទ្រព្យមានចលនា និងក្លាយជាកម្លាំងចលករទាញឱ្យវិស័យសំណង់មានដំណើរការឡើងវិញព្រមគ្នា»៕ LA
វីដេអូ៖