ភ្នំពេញៈ បន្ទាប់ពីបានស្ងប់ស្ងាត់រយៈពេលជិត ២ ឆ្នាំ និន្នាការនៃការស្វែងរកអគារជួលសម្រាប់បម្រើសេវាកម្មជាសណ្ឋាគារ និងកន្លែងស្នាក់នៅ នៅកម្ពុជាបានចាប់ផ្តើមមានសកម្មភាពឡើងវិញជាបណ្តើរៗហើយ ខណៈតម្លៃជួលមិនបានប្រែប្រួលទេបើធៀបនឹងចុងឆ្នាំ ២០២០។ នេះបើតាមក្រុម-អ្នកជំនាញអចលនទ្រព្យនៅកម្ពុជា។
វត្តមាននៃជំងឺកូវីដ ១៩ កាលពីចុងឆ្នាំ ២០១៩ បានធ្វើឱ្យអាជីវកម្មកន្លែងជួលស្នាក់នៅរយៈពេលខ្លី (សណ្ឋាគារ និងផ្ទះសំណាក់) ជួបប្រទះនូវការធ្លាក់ចុះយ៉ាងគំហុក ដោយមួយចំនួនបានឈានដល់ការបិទអាជីវកម្មផងដែរ។ ទោះយ៉ាងណា សញ្ញាវិជ្ជមានចាប់ផ្តើមបង្ហាញឡើងវិញជាបណ្តើរៗហើយ។
អគ្គនាយកក្រុមហ៊ុនអចលនទ្រព្យ ឡាក់គី រៀលធី លោក ឌឹត ចណ្ណា បានប្រាប់ ភ្នំពេញ ប៉ុស្តិ៍ ក្នុងថ្ងៃទី ២៩ ខែធ្នូថា ការប្រកាសបើកប្រទេស និងសេដ្ឋកិច្ចឡើងវិញពីសំណាក់រាជរដ្ឋាភិបាល ធ្វើឱ្យចលនាស្វែងរកអគារជួលសម្រាប់បម្រើសេវាស្នាក់នៅដូចជា សណ្ឋាគារ និងផ្ទះសំណាក់ នាចុងឆ្នាំ ២០២១ នេះងើបឡើងជាសន្សឹមៗហើយ បន្ទាប់ពីជាប់គាំងជិត ២ ឆ្នាំ ដោយសារក្តីបារម្ភពីការឆ្លងជំងឺកូវីដ ១៩ និងការដាក់នូវវិធានការរឹតបន្តឹងការធ្វើដំណើរនៅពាសពេញពិភពលោក។
លោកបន្តថា និន្នាការនេះកំពុងផ្តើមចេញពីរាជធានីភ្នំពេញ និងក្រុងព្រះសីហនុ ហើយនឹងបន្តទៅខេត្តគោលដៅទេសចរណ៍ផ្សេងៗទៀត ជាមួយក្តីរំពឹងថា វិស័យដឹកជញ្ជូនផ្លូវអាកាសនឹងបើកទូលាយកាន់តែច្រើនចាប់ពីដើមឆ្នាំ ២០២២។
លោកបញ្ជាក់ថា៖ «ការប្រកាសបើកសេដ្ឋកិច្ច និងទទួលភ្ញៀវបរទេសចាក់វ៉ាក់សាំងប្រឆាំងជំងឺកូវីដ ១៩ គ្រប់ដូស បានជំរុញអ្នកវិនិយោគចាប់ផ្តើមស្វែងរកអគារជួល ដើម្បីរៀបចំជាសណ្ឋាគារ ឬផ្ទះសំណាក់ ទុកទទួលភ្ញៀវដែលរំពឹងថា នឹងមានកំណើនឡើងវិញចាប់ពីដើមឆ្នាំ ២០២២ ខាងមុខតទៅ»។
បើតាមលោក ចណ្ណា បច្ចុប្បន្នអគារធំៗសម្រាប់ជួល (មិនមែនអគារការិយាល័យជួលកម្រិត A និង B) ក្នុងរាជធានីភ្នំពេញ មានតម្លៃក្រោម ១០ ដុល្លារ ក្នុង ១ ម៉ែត្រការ៉េ សម្រាប់រយៈពេល ១ខែ ដែលតម្លៃនេះប្រហាក់ប្រហែលនឹងចុងឆ្នាំ ២០២០។
លោកលើកឡើងទៀតថា អ្នកវិនិយោគដែលកំពុងស្វែងរកអគារជួលទាំងនោះ គឺមានទាំងវិនិយោគិនក្នុងស្រុក និងបរទេស។
ស្របគ្នានឹងការលើកឡើងខាងលើ លោក សំ សុខនឿន ប្រធានសមាគមអចលនទ្រព្យសកល បានឱ្យដឹងថា បន្ទាប់ពីការប្រកាសបើកប្រទេសឡើងវិញ អ្វីដែលគេសង្កេតឃើញគឺការវិលចូលមកវិញបណ្តើរៗនៃអ្នកវិនិយោគ និងភ្ញៀវទេសចរ ដែលពួកគេសុទ្ធតែត្រូវការកន្លែងស្នាក់នៅ។ កំណើនចំនួនភ្ញៀវទេសចរ និងវិនិយោគិន ពិសេសជនជាតិចិន ត្រូវរំពឹងថា នឹងមានច្រើនបន្ទាប់ពីពិធីបុណ្យចូលឆ្នាំចិន។
លោកថ្លែងថា៖ «ពេលនេះមិនត្រឹមតែមានតម្រូវការជួលទេ សូម្បីការស្វែងរកទិញសណ្ឋាគារយកទៅវិនិយោគបន្ត ក៏ចាប់ផ្តើមកើតមានផងដែរ»។
លោកប្រាប់ទៀតថា កំណើនតម្រូវការជួល និងទិញអគារយកទៅរៀបចំជាសណ្ឋាគារ ឬកន្លែងស្នាក់នៅ អាចមកពីកត្តាសំខាន់ៗមួយចំនួនដូចជា តម្រូវការស្នាក់នៅរបស់ប្រជាជនក្នុងស្រុក, តម្រូវការកន្លែងស្នាក់នៅរបស់ភ្ញៀវទេសចរ និងអ្នកវិនិយោគ និងតម្រូវការយកទៅជួលបន្តឱ្យក្រុមការងារស្នាក់នៅរួមគ្នាដើម្បីធ្វើការ។
យោងតាមក្រសួងការបរទេស និងសហប្រតិបត្តិការអន្តរជាតិ គិតត្រឹមឆ្នាំ ២០២០ នៅកម្ពុជាមានសណ្ឋាគារសរុប ១ ០២៨ ស្មើនឹង ៤៤ ៤២៨ បន្ទប់ និងមានផ្ទះសំណាក់ ២ ៧៥៥ ស្មើនឹង ៣៥ ៧៩១ បន្ទប់៕ LA