ភ្នំពេញៈ ទោះបីវិបត្តិនៃការឆ្លងរាលដាលជំងឺកូវីដ ១៩ បានធ្វើឱ្យការដ្ឋានសំណង់មួយចំនួនត្រូវជាប់គាំង ឬបន្ថយល្បឿនសាងសង់ ក៏ចំនួនទឹកប្រាក់នាំចូលគ្រឿងសំណង់មិនបានធ្លាក់ចុះឡើយ ដោយក្នុងរយៈពេល ១០ ខែនៃឆ្នាំ ២០២១ ការនាំចូលគ្រឿងសំណង់មានតម្លៃសរុបជាង ១,៤ ពាន់លានដុល្លារ កើន ២០ ភាគរយបើធៀបនឹងរយៈពេលដូចគ្នាឆ្នាំ ២០២០។ នេះបើតាមក្រសួងពាណិជ្ជកម្ម។
ស្ថិតិនៃការនាំចូលមុខទំនិញសំខាន់ៗរបស់ក្រសួងពាណិជ្ជកម្ម បង្ហាញថា ចាប់ពីខែមករា ដល់ខែតុលា ឆ្នាំ ២០២១ កម្ពុជាបាននាំចូលគ្រឿងសំណង់ ក្នុងទឹកប្រាក់សរុប ១ ៤២៩ លានដុល្លារ កើនឡើង ២០,៨៩ ភាគរយបើធៀបរយៈពេលដូចគ្នាឆ្នាំ ២០២០ ដែលមាន ១ ១៨២ លានដុល្លារ។ ក្នុងនោះការនាំចូលសម្ភារសំណង់ មានទឹកប្រាក់ ១ ០៦៣ លានដុល្លារ កើន ៣៣ ភាគរយ និងការនាំចូលដែក មាន ៣២៦ លានដុល្លារ កើន ១ ភាគរយ។ ដោយឡែកការនាំចូលស៊ីម៉ងត៍ មានតម្លៃ ៤០ លានដុល្លារ ធ្លាក់ចុះ ៣៣ ភាគរយ។
ប្រធានគ្រប់គ្រងទូទៅនៃសមាគមអ្នកសាងសង់កម្ពុជា លោក ជីវ ស៊ីវផេង បានប្រាប់ភ្នំពេញប៉ុស្តិ៍ថា កំណើននៃការនាំចូលគ្រឿងសំណង់ បង្ហាញថា សកម្មភាពសាងសង់នៅកម្ពុជានៅក្នុងអំឡុងពេលជំងឺកូវីដ ១៩ រីករាលដាលក្នុងប្រទេសកន្លងមក (ព្រឹត្តិការណ៍សហគមន៍ ២០ កុម្ភៈ) មិនបានធ្លាក់ចុះទេ។ ការថយចុះអាចកើតមានខ្លះសម្រាប់គម្រោងធំៗដែលមានម្ចាស់ជាជនបរទេស ប៉ុន្តែសម្រាប់គម្រោងតូចៗលក្ខណៈលំនៅឋានដែលមានវិនិយោគិនជាអ្នកនៅក្នុងស្រុក គឺកើនជាងមុន។
លោកលើកឡើងថា៖ «ជារួមសកម្មភាពនៃការសាងសង់ក្នុងឆ្នាំ ២០២១ មិនបានធ្លាក់ចុះទេ។ នេះជាមូលហេតុដែលជំរុញឱ្យទឹកប្រាក់នាំចូលគ្រឿងសំណង់កើនឡើង។ កំណើនទឹកប្រាក់នាំចូលនេះ ក៏បណ្តាលមកពីតម្រូវការសម្ភារមានគុណភាពខ្ពស់ និងប្រណីតៗ កើនឡើងផងដែរ»។
លោកប្រាប់ទៀតថា ទឹកប្រាក់ពីការនាំចូលគ្រឿងសំណង់នឹងមានកំណើនខ្ពស់ថែមទៀតក្នុងឆ្នាំ ២០២២ នេះ ព្រោះនារយៈពេលចុងក្រោយនេះ លោកសង្កេតឃើញគម្រោងវិនិយោគធំៗចាប់កម្រើកឡើងវិញជាបណ្តើរៗហើយ ពិសេសបន្ទាប់ពីរដ្ឋាភិបាលប្រកាសបើកប្រទេសឡើងវិញចាប់ពីពាក់កណ្តាលខែវិច្ឆិកា ឆ្នាំ ២០២១។
អគ្គលេខាធិការនៃសមាគមអ្នកអភិវឌ្ឍន៍លំនៅឋានកម្ពុជា លោក ហ៊ុយ វណ្ណា កាលពីពេលថ្មីៗនេះនិយាយថា ទោះក្នុងអំឡុងពេលជំងឺកូវីដ ១៩ រីករាលដាលខ្លាំងនៅកម្ពុជាដែលឈានដល់ការបិទសកម្មភាពសេដ្ឋកិច្ច និងផលិតកម្មមួយរយៈពេលខ្លី ក៏ការសាងសង់សំណង់លក្ខណៈលំនៅឋាននៅកម្ពុជាមិនបានធ្លាក់ចុះទេ។ គម្រោងអភិវឌ្ឍន៍លំនៅឋានមានម្ចាស់ជាវិនិយោគិនក្នុងស្រុកបានលេចឡើងនៅស្ទើរគ្រប់ទីកន្លែងទូទាំងប្រទេស។ លោកបន្ថែមថា៖ «ចំនួននៃតម្រូវការលំនៅឋាន និងសកម្មភាពសាងសង់នឹងមានដំណើរការកាន់តែល្អនៅក្នុងឆ្នាំ ២០២២»។
ចំពោះការធ្លាក់ចុះចំនួនទឹកប្រាក់នាំចូលស៊ីម៉ងត៍ពីក្រៅប្រទេស លោក ពុត ចន្តារិទ្ធ អគ្គលេខាធិការសមាគមឧស្សាហកម្មស៊ីម៉ងត៍កម្ពុជា បានប្រាប់ថា ក្នុងឆ្នាំ ២០២១ ការផលិតស៊ីម៉ងត៍ក្នុងស្រុកសម្រេចបាន ៨ ៤៦៩ ៧៨២ តោន កើនក្នុងរង្វង់ ៧ ភាគរយបើធៀបនឹងឆ្នាំ ២០២១ ដែលមានជាង ៧,៩ លានតោន។ ការធ្លាក់ចុះបរិមាណនាំចូលស៊ីម៉ងត៍ពីក្រៅប្រទេស គឺមកពីសមត្ថភាពនៃការផ្គត់ផ្គង់ក្នុងស្រុកកាន់តែមានភាពរឹងមាំ។
លោកប្រាប់ភ្នំពេញប៉ុស្តិ៍ថា៖ «ស្ថានភាព និងទីផ្សារស៊ីម៉ងត៍ផលិតក្នុងស្រុកបង្ហាញភាពវិជ្ជមានជាបន្តបន្ទាប់។ ការផលិតរបស់យើងមិនបានធ្លាក់ចុះទេក្នុងឆ្នាំ ២០២១ ទោះបីជាមានផលរំខានខ្លះពីការរីករាលដាលជំងឺកូវីដ ១៩ ក៏ដោយ»។
លោកបន្ថែមថា ផលិតផលក្នុងស្រុកកំពុងដើរតួនាទីកាន់តែសំខាន់ដើម្បីជំនួសឱ្យការនាំចូល ខណៈកម្ពុជានាំចូលស៊ីម៉ងត៍ពីប្រទេសមួយចំនួនដូចជា ប្រទេសថៃ វៀតណាម និងប្រទេសចិន ជាដើម។
បច្ចុប្បន្ននៅប្រទេសកម្ពុជា មានរោងចក្រផលិតស៊ីម៉ងត៍ចំនួន ៥ កំពុងដំណើរការដែលរួមមាន រោងចក្រផលិតស៊ីម៉ងត៍របស់ក្រុមហ៊ុនកំពតស៊ីមេន, ក្រុមហ៊ុនជីបម៉ុង, អ៊ិនស៊ីស៊ីមេន ខបភើរេសិន, ស៊ីម៉ងត៍ ចក្រីទីង, ក្រុមហ៊ុនបាត់ដំបង ខនស៍ ស៊ីមេន និងក្រុមហ៊ុនស៊ីម៉ងត៍ ថៃ ប៊ុនរ៉ុង៕ LA
វីដេអូ៖