.jpg)
កម្មករដើរត្រួតពិនិត្យដែកនៅមុខការដ្ឋានសំណង់ ១ កន្លែង តាមបណ្ដោយផ្លូវ ២៩៤។ ហេង ជីវ័ន
ភ្នំពេញៈ កម្ពុជាបានបញ្ចេញប្រាក់ជាង ១៨៥ លានដុល្លារក្នុងឆមាសទី ១ ឆ្នាំ ២០២២ ទៅលើការនាំចូលដែក និងដែកថែប (Iron & Steel) ពីក្រៅប្រទេសមកបំពេញតម្រូវការក្នុងស្រុក ដោយកើនឡើងជាង ២០ ភាគរយបើធៀបនឹងរយៈពេលដូចគ្នាឆ្នាំ ២០២១។ នេះបើយោងតាមអគ្គនាយកដ្ឋានគយ និងរដ្ឋាករកម្ពុជា។
តារាងស្ថិតិទំនិញពាណិជ្ជកម្មនាំចូលរបស់អគ្គនាយកដ្ឋានគយ និងរដ្ឋាករកម្ពុជាបានឱ្យដឹងថា ក្នុងរយៈពេល ៦ ខែដើមឆ្នាំ ២០២២ ការនាំចូលដែក និងដែកថែប មានទឹកប្រាក់សរុប ១៨៥,៧៦ លានដុល្លារ កើន ២០,១ ភាគរយបើធៀបនឹងរយៈពេលដូចគ្នាឆ្នាំ ២០២២ ដែលមានចំនួន ១៥៤,៧២ លានដុល្លារ។ ទឹកប្រាក់ការនាំចូលដែក និងដែកថែប ស្មើនឹងប្រមាណ ១,២ ភាគរយនៃការចំណាយសរុបរបស់កម្ពុជាទៅលើការនាំចូលទំនិញក្នុងឆមាសទី ២ ឆ្នាំ ២០២២ ដែលមានតម្លៃជាង ១៥ ៨៦៤ លានដុល្លារ។
ដោយឡែកសម្រាប់ខែមិថុនា ឆ្នាំនេះការនាំចូលដែក និងដែកថែបមានតម្លៃ ៣៥,៩២ លានដុល្លារ កើន ២១,៣ ភាគរយពី ២៩,៦១ លានដុល្លារ។
លោក ហ៊ុយ វណ្ណា អគ្គលេខាធិការនៃសមាគមអ្នកអភិវឌ្ឍន៍លំនៅឋានកម្ពុជា បានប្រាប់ភ្នំពេញប៉ុស្តិ៍ក្នុងថ្ងៃទី ១៣ ខែកក្កដាថា វិស័យសំណង់មានភាពខុសប្លែកពីវិស័យផ្សេងៗទៀត ដោយនៅក្នុងសកម្មភាពសាងសង់ ឬអភិវឌ្ឍគម្រោងណាមួយ គឺត្រូវការពេលវេលាយូរ ដែលគម្រោងខ្លះអាចឈានដល់លើសពី ៥ ឆ្នាំ ដូចនេះតម្រូវការសម្ភារប្រើប្រាស់រួមទាំងដែក គឺមានជាប្រចាំ។ ដែកដែលកំពុងប្រើប្រាស់ក្នុងវិស័យសំណង់នៅកម្ពុជាភាគច្រើននាំចូលមកពីប្រទេសចិន និងមួយចំនួនទៀតមកពីប្រទេសវៀតណាម ខណៈបរិមាណដែកផលិតក្នុងស្រុកនៅមានចំនួនតិចតួចប៉ុណ្ណោះ។
លោកប្រាប់ទៀតថា សម្រាប់វិស័យសំណង់នៅកម្ពុជានៅក្នុងឆមាសទី ១ ឆ្នាំ ២០២២ គឺមិនទាន់មានការវិវឌ្ឍអ្វីគួរឱ្យកត់សម្គាល់ទេ បើធៀបរយៈពេលដូចគ្នាឆ្នាំ ២០២១ ជាពិសេសគម្រោងសាងសង់ធំៗ ខណៈគម្រោងវិនិយោគលក្ខណៈលំនៅឋាន ឬបុរី ដែលមានម្ចាស់ជាវិនិយោគិនក្នុងស្រុក គឺបានកើនឡើងតិចតួច។
លោកប្រាប់ថា៖ «បើនិយាយពីការចាប់ផ្តើមគម្រោងសាងសង់ថ្មី ពិសេសគម្រោងធំៗ និងខ្ពស់ៗនៅពេលនេះគឺមិនសូវមានទេ ប៉ុន្តែសម្រាប់គម្រោងដែលកំពុងដំណើរការសាងសង់គឺមានសកម្មភាពទៅមុខជាប្រចាំ។ វិស័យសំណង់ពេលនេះ គឺមិនមានការធ្លាក់ចុះទេ បើធៀបទៅនឹងឆ្នាំមុន គឺវាមាននិរន្តរភាពល្អប្រសើរ»។
លោកលើកឡើងថា ការកើនឡើងចំនួនទឹកប្រាក់នាំចូលដែក និងដែកថែបក្នុងឆមាសទី១ កន្លងមក គឺអាចដោយសារតែតម្លៃដែកនៅលើទីផ្សារអន្តរជាតិកើនឡើង ចំណែកតម្រូវការប្រើប្រាស់អាចមានការកើនឡើងតិចតួចប៉ុណ្ណោះបើធៀបឆ្នាំ ២០២១។
លោកអះអាងថា៖ «តម្លៃដែកនៅពេលនេះ បើធៀបនឹងរយៈពេលដូចគ្នាកាលពីឆ្នាំមុនបានកើនឡើងប្រហែល ២០ ភាគរយ»។
អ្នកគ្រប់គ្រងទូទៅនៃសមាគមអ្នកសាងសង់កម្ពុជា លោក ជីវ ស៊ីផេង បាននិយាយថា ការសម្រេចរបស់រាជរដ្ឋាភិបាលក្នុងការបើកប្រទេសទទួលជនបរទេសឡើងវិញចាប់តាំងពីពាក់កណ្តាលខែវិច្ឆិកា ឆ្នាំ ២០២១ បានធ្វើឱ្យសញ្ញាវិជ្ជមានក្នុងវិស័យសំណង់ (ពិសេសគម្រោងដែលមានម្ចាស់ជាវិនិយោគិនបរទេស) ចាប់ផ្តើមមានពន្លឺឡើងវិញខ្លះៗ ក្រោយពីស្ងប់ស្ងាត់ប្រហែល ២ ឆ្នាំដោយសារវិបត្តិនៃការរីករាលដាលជំងឺកូវីដ ១៩។ សម្រាប់គម្រោងមានម្ចាស់ជាវិនិយោគិនក្នុងស្រុក គឺដំណើរការទៅមុខធម្មតា។
លោកប្រាប់ថា៖ «កំណើននៃការសង់លំនៅឋានឯកជន និងលក្ខណៈបុរី បានធ្វើឱ្យតម្រូវការនាំចូលដែកក្នុងវិស័យសំណង់កើនឡើង។ កំណើននេះនឹងបន្តកើនថែមទៀត»។
យោងតាមលោក ស៊ីវផេង ដែកនាំចូលមកកម្ពុជាមានមកពីប្រទេសចិន វៀតណាម ថៃ និងកូរ៉េ ជាដើម។
កាលពីដើមខែធ្នូ ២០២០ មានរោងចក្រផលិតដែកថែបមួយរបស់ក្រុមហ៊ុន ហុងឌីសេង (ខេមបូឌា) ស្ទីល ឯ.ក ដែលវិនិយោគដោយវិនិយោគិនចិនក្នុងទឹកប្រាក់ ១៦,៧ លានដុល្លារបើកដំណើរការនៅក្នុងខេត្តកំពង់ស្ពឺ ដោយអាចផលិតដែកបានចំនួន ៥០ ម៉ឺនតោនក្នុងដំណាក់កាលដំបូង។
ទិន្នន័យក្រសួងរៀបចំដែនដី នគរូបនីយកម្ម និងសំណង់ បង្ហាញថា ក្នុងឆ្នាំ ២០២១ គម្រោងសាងសង់ទូទាំងប្រទេសចំនួន ៤ ៣០៣ និងមានទុនវិនិយោគប្រមាណជាង ៥,៣៣ ពាន់លានដុល្លារត្រូវបានអនុម័ត។ ចំនួនទុនវិនិយោគនេះបើធៀបនឹងឆ្នាំ ២០២០ គឺថយចុះ ៣១,២១ ភាគរយ៕
