ភ្នំពេញៈ បើទោះបីរដ្ឋាភិបាលបានប្រកាសបើកប្រទេសឡើងវិញតាំងពីខែវិច្ឆិកា ឆ្នាំ ២០២១ ហើយសកម្មភាពនៃការផ្លាស់ប្តូរពាណិជ្ជកម្មជាអន្តរជាតិរបស់កម្ពុជាចាប់ផ្តើមមានសម្ទុះឡើងវិញជាបន្តបន្ទាប់ ក៏វិស័យសំណង់មិនទាន់មានសញ្ញាវិជ្ជមាននោះទេក្នុងរយៈពេល ៥ ខែដើមឆ្នាំ ២០២២ នេះ ដោយចំនួនគម្រោងសាងសង់ដែលទទួលបានការអនុញ្ញាតឱ្យសាងសង់បន្តធ្លាក់ចុះជិត ១០ ភាគរយ បើធៀបនឹងរយៈពេលដូចគ្នាកាលពីឆ្នាំ ២០២១។
បើយោងតាមរបាយការណ៍និន្នាការសេដ្ឋកិច្ច-សង្គម របស់ក្រសួងសេដ្ឋកិច្ច និងហិរញ្ញវត្ថុ នៅក្នុងរយៈពេល ៥ ខែ ដើមឆ្នាំ ២០២២ គម្រោងដែលទទួលបានការអនុញ្ញាតឱ្យសាងសង់ មានចំនួនសរុប ១ ៦៧៩ ធ្លាក់ចុះ ៨,២ភាគរយពី ១ ៨២៩ នារយៈពេលដូចគ្នាឆ្នាំ ២០២១។ ក្នុងនោះប្រភេទសំណង់លំនៅឋានមាន ១ ៥២៤ គម្រោងស្មើនឹង ៩០,៨ ភាគរយ នៃសំណើសុំសាងសង់សរុប ដោយធ្លាក់ចុះ ៨៣ គម្រោង បើធៀបទៅនឹងរយៈពេលដូចគ្នាឆ្នាំ ២០២១។ ចំណែកទុនវិនិយោគមានចំនួនសរុប ៩៥២ លានដុល្លារ ធ្លាក់ចុះ ៥៩,៥ ភាគរយ។
អគ្គលេខាធិការនៃសមាគមអ្នកអភិវឌ្ឍន៍លំនៅឋានកម្ពុជា លោក ហ៊ុយ វណ្ណា បានប្រាប់ ភ្នំពេញ ប៉ុស្តិ៍ថា វិបត្តិកូវីដ ១៩ មិនត្រឹមតែធ្វើឱ្យគម្រោងសាងសង់ធំៗ ពិសេសគម្រោងដែលមានម្ចាស់ជាអ្នកវិនិយោគបរទេសត្រូវជាប់គាំង ឬថយល្បឿនសាងសង់ប៉ុណ្ណោះទេ ប៉ុន្តែវាក៏ធ្វើឱ្យអ្នកមានបំណងវិនិយោគនៅក្នុងវិស័យសំណង់ជាច្រើនសម្រេចពន្យារពេលដែរ។ ការវិនិយោគលើវិស័យសំណង់ គឺត្រូវការពេលវេលាយូរ និងទុនវិនិយោគច្រើន ដូច្នេះវិស័យនេះនឹងមិនមានសម្ទុះឡើងលឿនដូចវិស័យមួយចំនួនទៀតទេ។ លោកបន្ថែមថា វិបត្តិបណ្តាលពីកូវីដ ១៩ ដែលពិភពលោកនៅមិនទាន់អាចគ្រប់គ្រងបានក្នុងពេលបច្ចុប្បន្ននឹងបន្តជះឥទ្ធិពលអវិជ្ជមានបន្តទៀតក្នុងវិស័យសំណង់នៅគ្រប់ប្រទេសលើពិភពលោក រួមទាំងកម្ពុជា។
លោកថ្លែងថា៖ «សម្រាប់រយៈពេលខ្លីវិស័យសំណង់នៅកម្ពុជា នឹងមិនអាចមានសម្ទុះឡើងវិញទេ ពិសេសសំណង់ធំៗដែលមានម្ចាស់ជាអ្នកវិនិយោគបរទេស។ សម្រាប់សំណង់លំនៅឋានដែលវិនិយោគដោយអ្នកនៅក្នុងស្រុក គឺមានដំណើរទៅមុខជាធម្មតា ព្រោះតម្រូវការនេះ គឺនៅតែមានជាប្រចាំ»។
លោកបន្តថា វិស័យសំណង់នៅកម្ពុជា ពិសេសសំណង់ធំៗ នឹងមានសម្ទុះឡើងវិញនៅពេលដែលការធ្វើដំណើររបស់អ្នកវិនិយោគ និងភ្ញៀវទេសចរមានចំនួនច្រើនដូចមុនពេលមានវត្តមានរបស់ជំងឺកូវីដ ១៩។
ទិន្នន័យពីក្រសួងទេសចរណ៍ឱ្យដឹងថា ក្នុងឆ្នាំ ២០២១ កម្ពុជាទទួលបានភ្ញៀវទេសចរអន្តរជាតិសរុប ១៩៦ ៤៩៥ នាក់ ថយចុះ ៨៥ ភាគរយ ធៀបឆ្នាំ ២០២០។ ដោយឡែកចាប់ពីខែមករា-ខែឧសភា ឆ្នាំ ២០២២ ភ្ញៀវបរទេសដែលបានមកដល់ប្រទេសកម្ពុជា មានចំនួនសរុប ៣៤៣ ៤៦៤ នាក់ កើនឡើង ២៧៥ ភាគរយ បើធៀបនឹងរយៈពេលដូចគ្នាឆ្នាំ ២០២១។
ឆ្នាំ ២០១៩ ត្រូវបានចាត់ទុកជាពេលដែលប្រទេសកម្ពុជា ទទួលបានភ្ញៀវទេសចរអន្តរជាតិច្រើនបំផុតដោយមានចំនួន ៦,៦១ លាននាក់។
ប្រធានសមាគមអចលនទ្រព្យសកល លោក សំ សុខនឿន បានប្រាប់ថា សកម្មភាពនៃការស្វែងរកទិញ លក់អចលនទ្រព្យនៅកម្ពុជាចាប់ផ្តើមមានចលនាវិញជាបណ្តើរៗហើយពេលនេះ ប៉ុន្តែសម្រាប់ការអភិវឌ្ឍគម្រោងធំៗ គឺនៅមិនទាន់មានទេ ដោយវានៅត្រូវការពេលបន្ថែមទៀត ព្រោះការធ្វើដំណើររបស់អ្នកវិនិយោគ និងភ្ញៀវបរទេសមកកម្ពុជានៅមានកម្រិតទាបនៅឡើយបើធៀបទៅក្នុងអំឡុងឆ្នាំ ២០១៨-២០១៩។
លោកនិយាយថា៖ «វិស័យសំណង់ នៅត្រូវការពេលយូរថែមទៀតព្រោះមុននឹងសម្រេចវិនិយោគលើគម្រោងណាមួយ អ្នកវិនិយោគតែងតែពិនិត្យទៅលើទីផ្សារ និងចរន្តធ្វើដំណើររបស់ភ្ញៀវឱ្យបានហ្មត់ចត់»។
យោងតាមលោក សុខនឿន តម្រូវការប្រើប្រាស់អគារធំៗ និងខ្ពស់ៗមិនមានសម្ទុះកើនឡើងច្រើនទេនៅក្នុងពេលនេះ ប៉ុន្តែសម្រាប់សំណង់លំនៅឋាន គឺនៅតែមានទីផ្សារល្អ។
ទិន្នន័យក្រសួងរៀបចំដែនដី នគរូបនីយកម្ម និងសំណង់ បានបង្ហាញថា ក្នុងឆ្នាំ ២០២១ ក្រសួងបានអនុម័តលើគម្រោងសាងសង់ទូទាំងប្រទេសចំនួន ៤ ៣០៣ គម្រោង និងមានទុនវិនិយោគជាង ៥,៣៣ ពាន់លានដុល្លារ។
ទុនវិនិយោគនេះបើធៀបនឹងឆ្នាំ ២០២០ គឺថយចុះ ៣១,២១ ភាគរយ៕