.jpg)
ទិដ្ឋភាពមើលពីលើ អគារក្រសួង ស្ថាប័នរដ្ឋនិងឯកជន និងលំនៅឋានរបស់ប្រជាពលរដ្ឋក្នុងរាជធានីភ្នំពេញ។ ហេង ជីវ័ន
ភ្នំពេញ: ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម ស្វាគមន៍ចំពោះការអំពាវនាវរបស់លោកនាយករដ្ឋមន្ត្រីហ៊ុន សែន ស្នើដល់អ្នកអភិវឌ្ឍន៍អចលនទ្រព្យធ្វើការសាងសង់គម្រោងលំនៅឋានដែលមានតម្លៃសមរម្យឱ្យបានច្រើន ដើម្បីជួយដល់គ្រួសារដែលមានប្រាក់ចំណូលមធ្យមនិងទាបរស់នៅបានសមរម្យ។
ការថ្លែងរបស់លោកនាយករដ្ឋមន្ត្រី ហ៊ុន សែន ធ្វើឡើងកាលពីថ្ងៃទី ២៧ ខែធ្នូ នៅក្នុងពិធីបិទសន្និបាតប្រចាំឆ្នាំរបស់ក្រសួងរៀបចំដែនដី នគរូបនីយកម្ម និងផែនការជំរុញអ្នកវិនិយោគអភិវឌ្ឍលំនៅឋានតម្លៃសមរម្យស្របតាមគោលនយោបាយរបស់រដ្ឋាភិបាលដើម្បីឱ្យប្រជាពលរដ្ឋ មាន ប្រាក់ចំណូលទាបទទួលបានលំនៅឋានសម្រាប់ ជីវិតកាន់តែប្រសើរ។
លោកថ្លែងថា៖ «លើកទឹកចិត្តជាមួយការសាងសង់លំនៅឋានតម្លៃថោក ព្រោះមន្ត្រីរាជការ និងប្រជាពលរដ្ឋរបស់យើងដែលមានប្រាក់ចំណូលទាប មានតម្រូវការលំនៅឋានដោយតម្លៃថោក ហើយរកគ្រប់វិធីដើម្បីដោះស្រាយលំនៅឋាននៅ ក្នុងប្រទេសរបស់យើង ទៅលើអ្នកដែល មានប្រាក់ចំណូលមធ្យម ឬក៏តូចតាចដែលពុំមានលទ្ធភាពទិញផ្ទះបានក្នុងតម្លៃខ្ពស់។ លោកក៏បានមានប្រសាសន៍ថា រដ្ឋាភិបាលបានផ្តល់ការលើកទឹកចិត្តពន្ធរួចហើយសម្រាប់លំនៅឋានដែលតម្លៃក្រោម ៧ ម៉ឺន ដុល្លារក្នុង១យូនីតមិនត្រូវបង់ពន្ធ ៤ភាគរយនៃពន្ធប្រថាប់ត្រានោះទេ។
លោក ហ៊ុន សែន ថ្លែងថា៖ «សំណូមពរអំពាវនាវឱ្យអ្នកសាងសង់ផ្នែកអចលនទ្រព្យកសាងនូវលំនៅឋានដែលមានតម្លៃថោកដើម្បីលើកជូនប្រជាពលរដ្ឋរបស់យើង»។
លោក ច្រឹក សុខនីម បានប្រាប់ភ្នំពេញប៉ុស្តិ៍នៅថ្ងៃទី ២៨ ធ្នូថា បច្ចុប្បន្ននេះមានក្រុមហ៊ុនមួយចំនួនកំពុងសាងសង់លំនៅឋានតម្លៃសមរម្យសម្រាប់គ្រួសារដែលមានចំណូលមធ្យម និងទាប ស្របតាមគោលនយោបាយរបស់រដ្ឋាភិបាល។ ទោះជាយ៉ាងនេះក្តី លោកថា ហេតុផលដែលមិនមានអ្នកអភិវឌ្ឍន៍ច្រើនផ្តោតលើការសង់លំនៅឋានតម្លៃសមរម្យ ដោយសារតម្លៃដីកំពុងកើនឡើងខ្លាំងនៅពេលនេះ ដែលមិនអាចឱ្យពួកគេសាងសង់គម្រោងនេះបានច្រើនបំពេញតាមតម្រូវការ។
លោកថ្លែងថា៖ «តាមពិតទៅ យើងសប្បាយចិត្តនឹងធ្វើតាមគោលនយោបាយរបស់រដ្ឋាភិបាលក្នុងការសាងសង់លំនៅឋានតម្លៃសមរម្យសម្រាប់ប្រជាជនយើង។ ទោះជាយ៉ាងណាក៏ដោយ ដូចដែលយើងឃើញឥឡូវនេះ ដីនៅភ្នំពេញមានតម្លៃខ្ពស់ ដូច្នេះអ្នកអភិវឌ្ឍន៍មិនអាចសាងសង់គម្រោងលំនៅឋានដែលផ្ដោតលើអ្នកមានចំណូលទាបបានទេ ព្រោះមិនទទួលបានប្រាក់ចំណេញ»។
ទន្ទឹមនឹងនោះ លំនៅឋានតម្លៃសមរម្យអាចសាងសង់បាន ដរាបណាអ្នកអភិវឌ្ឍន៍អាចទទួលបានដីសម្បទាន បូករួមទាំងការគាំទ្រហេដ្ឋារចនាសម្ព័ន្ធផ្សេងទៀតពីរដ្ឋាភិបាល ដូចជាមានការតភ្ជាប់ប្រព័ន្ធទឹកស្អាត បណ្តាញអគ្គិសនីទៅដល់គម្រោងនេះ។ លើសពីនេះ ធនាគារក៏មិនបានផ្តល់កម្ចីច្រើនលើវិស័យនេះ ផងដែរ។ នេះបើតាមលោក សុខនីម។
លោកបន្តថា៖ «ក្នុងរយៈពេលប៉ុន្មាន ឆ្នាំចុងក្រោយនេះ យើងមើលឃើញក្រុមហ៊ុនមួយចំនួនបានវិនិយោគលើការសាងសង់គម្រោងលំនៅឋានដែលមានតម្លៃសមរម្យ ប៉ុន្តែវាមិនស្ថិតនៅក្នុងទីក្រុងនោះទេវានៅជាយទីក្រុងភ្នំពេញ ដូច្នេះពួកគេទទួលបានតម្រូវការទាប»។
លោកបានបន្ថែមថា លុះត្រាតែមានការជួយជ្រោមជ្រែងពីរដ្ឋាភិបាល និងបូកបន្ថែមការគាំទ្រពីវិស័យហិរញ្ញវត្ថុក្នុងការជួយប្រជាពលរដ្ឋអាចទទួលបានហិរញ្ញវត្ថុកាន់តែច្រើន ដូច្នេះគម្រោងនឹងអាចដំណើរការបាន។
នៅពាក់កណ្តាលខែធ្នូ គ្រឹះស្ថានមីក្រូហិរញ្ញវត្ថុ First Finance បានទទួលហិរញ្ញប្បទានបំណុលចំនួន ៧ លានដុល្លារពីស្ថាប័នអន្តរជាតិ GuarantCo ដើម្បីផ្តល់ហិរញ្ញប្បទានលំនៅឋានតម្លៃសមរម្យដល់គ្រួសារដែលមានចំណូលទាប និងមធ្យមនៅក្នុងប្រទេស។
យោងតាមសេចក្តីប្រកាសព័ត៌មាន ប្រតិបត្តិការនេះត្រូវបានគេរំពឹងថានឹងគាំទ្រដល់ប្រាក់កម្ចីថ្មីចំនួន ៤៧០ ដែលផ្តោតលើគ្រួសារដែលមានចំណូលទាប និងមធ្យម។ យោងទៅតាមលក្ខណៈវិនិច្ឆ័យមួយចំនួន រួមទាំងលក្ខខណ្ឌទីផ្សារ ទំហំទាំងមូលនៃហិរញ្ញប្បទានពីGuarant អាចនឹងកើនឡើងដល់ ២២ លានក្នុងរយៈពេល ២ឆ្ នាំខាងមុខ។
យោងតាមរបាយការណ៍របស់ក្រសួងរៀបចំដែនដី នគរូបនីយកម្មនិងសំណង់ តាមការប៉ាន់ប្រមាណ ប្រជាជនកម្ពុជា ចំនួន ៧,៩ លាននាក់នឹងរស់នៅក្នុងតំបន់ទីក្រុងនៅឆ្នាំ ២០៣០ កើនឡើងពី ៤,៥ លាននាក់ធៀបនឹងឆ្នាំ ២០១៤។ រាជរដ្ឋាភិបាលកម្ពុជា មានផែនការដើម្បីបំពេញតម្រូវការលំនៅឋានថ្មីដែលមានតម្លៃសមរម្យប្រមាណ ៥៥ ០០០ ក្នុង ១ ឆ្នាំ។ ត្រឹមឆ្នាំ ២០៣០ ក្រសួងបានព្យាករថា លំនៅឋានក្នុងទីក្រុងប្រមាណ ៨០០ ០០០ នឹងត្រូវចាក់បញ្ចូលទៅក្នុងទីផ្សារបើធៀបទៅនឹងឆ្នាំ ២០១៥ ដើម្បីបំពេញតម្រូវការរបស់ប្រជាជនក្នុងប្រទេសដែលរំពឹងទុកចំនួន ១៩ លាននាក់៕
