ភ្នំពេញៈ និយ័តករអាជីវកម្មអចលនវត្ថុ និងបញ្ចាំ នាដើមសប្តាហ៍នេះបានធ្វើការក្រើនរំឭកទៅដល់អ្នកក្នុងវិស័យអចលនទ្រព្យ ឱ្យចូលរួមអនុវត្តឱ្យបានខ្ជាប់ខ្ជួនចំពោះកាតព្វកិច្ចដាក់របាយការណ៍ ដែលរដ្ឋាភិបាលបានកំណត់នាពេលកន្លងមក។
ការផ្សព្វផ្សាយនៅលើបណ្តាញសង្គមផ្លូវការរបស់និយ័តករអាជីវកម្មអចលនវត្ថុ និងបញ្ចាំ កាលពីថ្ងៃទី៣ ខែកក្កដា បានក្រើនរំឭកអំពីការអនុវត្តកាតព្វកិច្ចដាក់របាយការណ៍ សម្រាប់អ្នកប្រកបអាជីវកម្មអភិវឌ្ឍអចលនវត្ថុ អ្នកប្រកបអាជីវកម្មផ្តល់សេវាកម្មអចលនវត្ថុ និងអ្នកប្រកបអាជីវកម្មបញ្ចាំ និងប្រាតិភោគដោយអនុប្បទាន។
ខ្លឹមសារនៃលិខិតដែលចុះកាលបរិច្ឆេទ ថ្ងៃទី២៧ ខែមករា ឆ្នាំ២០២៣ បានសរសេរថា«និយ័តករអាជីវកម្មអចលនវត្ថុ និងបញ្ចាំ(ន.អ.ប.) នៃអាជ្ញាធរសេវាហិរញ្ញវត្ថុមិនមែនធនាគារ(អ.ស.ហ.) មានកិត្តិយសសូមក្រើនរំឭកដល់ អ្នកឧកញ៉ា/ឧកញ៉ា/លោក/លោកស្រី/អ្នកនាង/កញ្ញា ជាម្ចាស់ក្រុមហ៊ុន/សហគ្រាស/គម្រោង ដែលបានទទួលអាជ្ញាប័ណ្ណប្រកបអាជីវកម្មអភិវឌ្ឍលំនៅឋាន អាជីវកម្មអភិវឌ្ឍអគារសហកម្មសិទ្ធិ អាជីវកម្មអភិវឌ្ឍដីឡូត៍ អាជីវកម្មផ្តល់សេវាកម្មអចលនវត្ថុ និងអាជីវកម្មបញ្ចាំនិង/ឬអាជីវកម្មប្រាតិភោគដោយអនុប្បទាន ពី ន.អ.ប. ឬក្រសួងសេដ្ឋកិច្ច និងហិរញ្ញវត្ថុ ត្រូវធ្វើការបំពេញកាតព្វកិច្ចផ្តល់របាយការណ៍ឱ្យបានត្រឹមត្រូវ និងទាន់ពេលវេលាដូចមានក្នុងសេចក្តីជូនដំណឹង»។
យោងតាមខ្លឹមសានៃសេចក្តីជូនដំណឹងនោះ គឺផ្តោតជាសំខាន់ទៅលើការផ្ញើរបាយការណ៍សកម្មភាពប្រតិបត្តិការប្រចាំខែ ត្រីមាស ឆមាស និងឆ្នាំ របស់ក្រុមហ៊ុននានា មកកាន់ ន.អ.ប.។
ប្រធានសមាគមអចលនទ្រព្យសកល លោក សំ សុខនឿន បានប្រាប់ភ្នំពេញប៉ុស្តិ៍ក្នុងថ្ងៃទី៤ ខែកក្កដា ថា ក្នុងនាមជាក្រុមហ៊ុនដែលមានអាជ្ញាប័ណ្ណស្របច្បាប់ក្នុងវិស័យអចលនទ្រព្យនៅកម្ពុជា(ក្រុមហ៊ុនទិញ-លក់អចលនទ្រព្យ, ក្រុមហ៊ុនគ្រប់គ្រង, វាយតម្លៃ, ក្រុមហ៊ុនអភិវឌ្ឍន៍...ភ្នាក់ងារ) គឺតែងតែចូលរួមសហការ និងអនុវត្តយ៉ាងពេញលេញទៅតាមគោលការណ៍ និងសេចក្តីណែនាំរបស់និយ័តករអាជីវកម្មអចលនវត្ថុ និងបញ្ចាំ ដូចជារបាយការណ៍ប្រចាំខែ ត្រីមាស ឆមាស និងឆ្នាំជាដើម។
លោកបន្តថា បញ្ហាដែលនិយ័តករអាជីវកម្មអចលនវត្ថុ និងបញ្ចាំ ក្រើនរំឭកខាងលើ គឺអាចមានជាប់ទាក់ទងច្រើននឹងក្រុមហ៊ុន ឬភ្នាក់ងារដែលមិនមានវិជ្ជាជីវៈត្រឹមត្រូវ។
លោកថ្លែងថា៖«សម្រាប់ក្រុមហ៊ុនដែលមានអាជ្ញាប័ណ្ណ និងមានវិជ្ជាជីវៈត្រឹមត្រូវ គឺតែងអនុវត្តបានយ៉ាងល្អទៅតាមការណែនាំរបស់អាជ្ញាធរ»។
ទោះយ៉ាងណា ក្នុងនាមជាប្រធានសមាគមអចលនទ្រព្យសកល លោក សុខនឿន ក៏បានជំរុញ និងលើកទឹកចិត្តឱ្យម្ចាស់ក្រុមហ៊ុន/ភ្នាក់ងារ ដែលកន្លងមកមិនទាន់បានអនុវត្តពេញលេញទៅតាមសេចក្តីជូនដំណឹងខាងលើ ត្រូវខិតខំចូលរួមអនុវត្តឱ្យបានខ្ជាប់ខ្ជួនបន្ថែមទៀត ដើម្បីចូលរួមអភិវឌ្ឍសង្គម និងសេដ្ឋកិច្ច ព្រមទាំងទាក់ទាញអ្នកវិនិយោគថ្មីៗឱ្យចូលមកបើកអាជីវកម្មកាន់តែច្រើនបន្ថែមទៀតនៅកម្ពុជា។
ទិន្នន័យក្រសួងរៀបចំដែនដី នគរូបនីយកម្ម និងសំណង់ ឱ្យដឹងថា ចាប់ពីខែមករា ដល់ខែឧសភា ឆ្នាំ២០២៣ ក្រសួងបានផ្ដល់លិខិតអនុញ្ញាតឱ្យសាងសង់ចំនួន ១ ៤៦៣គម្រោង លើផ្ទៃក្រឡាអគារជាង ៥លានម៉ែត្រការ៉េ ក្នុងទុនវិនិយោគជាង ២ ២៧០លានដុល្លារ កើនឡើង ១៣៨,៥២ភាគរយ បើធៀបរយៈពេលដូចគ្នាកាលពីឆ្នាំមុន៕
