មន្ត្រី និងអ្នកជំនាញបានឱ្យដឹងនៅក្នុងបទសម្ភាសកាលពីពេលថ្មីៗថា គម្រោងដែលស្ថិតនៅក្រោមគំនិតផ្តួចផ្តើមខ្សែក្រវាត់និងផ្លូវ (BRI) បាននិងកំពុងជួយទ្រទ្រង់ដល់ការអភិវឌ្ឍសេដ្ឋកិច្ចកម្ពុជា ដែលបានធ្លាក់ចុះដោយសារតែផលប៉ះពាល់នៃជំងឺកូវីដ ១៩។
លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជាបានមានប្រសាសន៍ថា គម្រោង BRI នៅទីនេះដូចជាការសាងសង់ផ្លូវល្បឿនលឿនភ្នំពេញ-ព្រះសីហនុ ព្រលានយន្តហោះអន្តរជាតិខេត្តសៀមរាបថ្មី ពហុកីឡដ្ឋានជាតិ និងតំបន់សេដ្ឋកិច្ចពិសេសក្រុងព្រះសីហនុ (SSEZ) បានផ្តល់អត្ថប្រយោជន៍យ៉ាងច្រើនដល់ការអភិវឌ្ឍសេដ្ឋកិច្ចកម្ពុជាក្នុងអំឡុងពេលមានជំងឺរាតត្បាត។
ទោះបីរងផលប៉ះពាល់ពីជំងឺកូវីដ ១៩ ក្តី ក៏ការសាងសង់គម្រោងធំៗ ដូចជាផ្លូវល្បឿនលឿនភ្នំពេញ-ព្រះសីហនុ និងរោងចក្រថាមពល ៧០០ មេហ្គាវ៉ាត់នៅខេត្តព្រះសីហនុ នៅតែដំណើរការទៅមុខ ដែលជាការជំរុញការអភិវឌ្ឍសេដ្ឋកិច្ចកម្ពុជា។ លោកបន្តថា នៅពេលបញ្ចប់, គម្រោងទាំង នោះនឹងដើរតួយ៉ាងសំខាន់ក្នុងការជួយលើកស្ទួយសេដ្ឋកិច្ចកម្ពុជាក្នុង សម័យក្រោយជំងឺរាតត្បាត។
លោកបានប្រាប់សារព័ត៌មានស៊ីនហួថា៖ «SSEZ បានរួមចំណែកយ៉ាងសំខាន់នៅក្នុងការគាំទ្រដល់ការនាំចេញរបស់ប្រទេស ហើយរោងចក្រវារីអគ្គិសនីទាំងអស់បានផ្គត់ផ្គង់អគ្គិសនីឱ្យមានស្ថិរភាព ដើម្បីធានាបាននូវប្រក្រតីភាពនៃជីវិតប្រចាំថ្ងៃ និងអាជីវកម្មរបស់ប្រជាជន»។
លោកស៊ីផាន បានបន្ថែមថា វាបាន រួមចំណែកយ៉ាងសំខាន់នៅក្នុងការជំរុញកិច្ចសហប្រតិបត្តិការក្នុងតំបន់ និងពិភពលោក ទាក់ទងនឹងហេដ្ឋារចនាសម្ព័ន្ធរឹង និងទន់ សេដ្ឋកិច្ច ពាណិជ្ជកម្ម ឱកាសវិនិយោគ ការផ្លាស់ប្តូរវប្បធម៌ និងការតភ្ជាប់រវាងប្រជាន និងប្រជាជន។
កំណើនសេដ្ឋកិច្ចកម្ពុជាត្រូវបានរំពឹងថានឹងស្ទុះឡើងវិញក្នុងរង្វង់ ២,៥ ភាគរយនៅក្នុងឆ្នាំ ២០២១ បន្ទាប់ពីបានធ្លាក់ចុះ -១,៩ % កាលពីឆ្នាំមុន នេះបើយោងតាមការព្យាករចុងក្រោយរបស់រដ្ឋាភិបាល។
លោក នាក់ ចិន្តារិទ្ធិ ប្រធានមជ្ឈមណ្ឌលកម្ពុជាសម្រាប់ការស្រាវជ្រាវផ្លូវសូត្រសមុទ្រសតវត្សទី២១ បានមានប្រសាសន៍ថា គម្រោង BRI បានដើរតួនាទីដ៏មានស្ថិរភាពនៅក្នុងការពង្រឹងការអភិវឌ្ឍសេដ្ឋកិច្ចនៅកម្ពុជា ក្នុងអំឡុងពេលមានជំងឺរាតត្បាត ខណៈមានការរំខាននៅកន្លែងដទៃ។ លោកថ្លែងថា យោងតាមរបាយការណ៍របស់ប្រតិបត្តិករ, SSEZ ត្រូវបានឃើញការកើនឡើង ៤៤.៥១ %ធៀបនឹងឆ្នាំមុន នៅក្នុងតម្លៃនៃការនាំចូលនិងនាំចេញ ដែលបានឈានដល់ ១ ១៨៥ ពាន់លានដុល្លារក្នុងរយៈពេល ៧ ខែដំបូង នៃឆ្នាំ ២០២១។
លោក ចិន្តារិទ្ធិ បានប្រាប់ Xinhua ថា៖«គម្រោង BRI ទាំងនេះនឹងក្លាយជាការរួមចំណែកយ៉ាងសំខាន់ដល់ការអភិវឌ្ឍសេដ្ឋកិច្ចរបស់កម្ពុជា នៅក្នុងការស្តារឡើងវិញក្រោយជំងឺកូវីដ ១៩ ក៏ដូចជាការធ្វើសមាហរណកម្មសេដ្ឋកិច្ចកម្ពុជា ជាមួយសេដ្ឋកិច្ចដទៃទៀតនៅក្នុងពិភពលោក»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានមានប្រសាសន៍ថា គម្រោង BRI គឺជាឱកាសដ៏ល្អ និងជាការអភិវឌ្ឍដ៏ត្រឹមត្រូវសម្រាប់ប្រទេសកម្ពុជា។
លោកថ្លែងថា ការអភិវឌ្ឍហេដ្ឋារចនាសម្ព័ន្ធ ដូចជាផ្លូវថ្នល់ ផ្លូវដែក អាកាសយានដ្ឋាន កំពង់ផែ រោងចក្រវារីអគ្គិសនី និងតំបន់សេដ្ឋកិច្ចពិសេសឬក៏តំបន់ឧស្សាហកម្ម នៅក្រោមគម្រោង BRI គឺមានសារៈសំខាន់ខ្លាំងណាស់នៅក្នុងការកាត់បន្ថយថ្លៃដឹកជញ្ជូននៅក្នុងព្រះរាជាណាចក្រកម្ពុជា ដែលជួយបង្កើនការប្រកួតប្រជែងសេដ្ឋកិច្ច និងធ្វើពិពិធកម្មប្រភពកំណើន។
ត្រូវបានស្នើឡើងក្នុងឆ្នាំ ២០១៣ «ខ្សែក្រវាត់សេដ្ឋកិច្ចផ្លូវគោកតាមបណ្តោយផ្លូវសូត្រ» និង «ផ្លូវសូត្រសមុទ្រសតវត្សរ៍ទី២១» មានគោលបំណងបង្កើតបណ្តាញពាណិជ្ជកម្ម និងហេដ្ឋារចនាសម្ព័ន្ធតភ្ជាប់អាស៊ីជាមួយអឺរ៉ុប ហើយបន្តឆ្ពោះទៅកាន់ទ្វីបអាហ្វ្រិក៕
By Mao Pengfei, Nguon Sovan